ថ្លែងក្នុងទិវាគ្រូបង្រៀន ៥ តុលា ក្រោមប្រធានបទ «គ្រូបង្រៀនជាសសរស្ដម្ភ នៃកំណែទម្រង់សាលារៀនឆ្ពោះទៅរកឧត្ដមភាព» សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ថា គ្រូបង្រៀនជាឪពុកម្តាយទីពីរ ជាអ្នកផ្ដល់បំណិនជីវិត និងសមត្ថភាពដល់សិស្ស និស្សិតគ្រប់ៗរូប។

សម្តេចធិបតីបញ្ជាក់ថា អត្ថន័យដ៏ធំធេងរបស់ទិវាគ្រូបង្រៀន គឺជាការបំផុសវប្បធម៌ដល់សិស្ស និស្សិត និងយុវជន ក្នុងការបន្តដឹងគុណដល់លោកគូអ្នកគ្រូ និងសាស្ត្រាចារ្យ ។ ក្នុងនោះដែរ សម្តេចធិបតី ហ៊ុន ម៉ាណែត ក៏បានកោតសរសើរ និងវាយតម្លៃខ្ពស់ចំពោះក្រសួងអប់រំយុវជន និងកីឡា ដែលបានខិតខំយ៉ាងសកម្មក្នុងការលើកកម្ពស់គុណវុឌ្ឍិ និងគុណតម្លៃ របស់លោកគ្រូ អ្នកគ្រូ ក្នុងរយៈកាលកន្លងមក ព្រមជាមួយនឹងការអរគុណដល់ដៃគូ និងភាគីពាក់ព័ន្ធទាំងអស់ ដែលបានផ្តល់កិច្ចសហការ និងការគាំទ្រផ្សេងៗ សំដៅជំរុញការអនុវត្តនូវគោលនយោបាយរបស់រាជរដ្ឋាភិបាល គឺការបន្តការយកចិត្តទុកដាក់លើវិស័យអប់រំ ។

សម្តេចធិបតីនាយករដ្ឋមន្ត្រី បញ្ជាក់បន្ថែមថា យុទ្ធសាស្ត្របញ្ចកោណដំណាក់កាលទី១ គឺផ្ដោតលើការបន្តធ្វើកំណែទម្រង់តាមរយៈវិធានគន្លឹះចំនួន ៥ រួមមាន ១. ពង្រឹងមុខងារសាធារណៈ ២. ពង្រឹងវិស័យអប់រំ ៣.ពង្រឹងវិស័យសុខាភិបាល ៤. ពង្រឹងការគ្រប់គ្រង និងប្រឆាំងគ្រឿងញៀន និង ៥. កំណែទម្រង់ច្បាប់ និងប្រព័ន្ធតុលាការ។

ក្នុងនោះ វិស័យអប់រំដែលជាវិធានការគន្លឹះទី២ នៃការអនុវត្តយុទ្ធសាស្ត្របញ្ចកោណ គឺជាសសរស្តម្ភសំខាន់ ហើយនឹងទទួលបានការយកចិត្តទុកដាក់ខ្ពស់ ដោយសម្ដេចធិបតីនាយករដ្ឋមន្ត្រី បានសម្រេចដាក់ចេញនូវការពង្រឹងការបណ្ដុះបណ្ដាលមូលដ្ឋានពីមត្តយ្យសិក្សា រហូតដល់ថ្នាក់ទី១២ តាមរយៈវិធានគន្លឹះអាទិភាពចំនួន ៤ គឺ ១. ការពង្រឹងអភិបាលកិច្ច ២. ការពិនិត្យសម្រួល និងការរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របទៅតាមតម្រូវការ ក្នុងការពង្រឹងចំណេះដឹង, វិន័យ, សីលធម៌ និងឥរិយាបថរបស់សិស្ស ៣. ការយកចិត្តទុកដាក់លើសុខភាពសិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន និង៤. ការជំរុញ និងលើកទឹកចិត្តការចូលរួមរបស់មាតាបិតា អាណាព្យាបាល និងសហគមន៍ក្នុងការអប់រំ ស្របតាមពាក្យស្លោក “ភាពជាដៃគូរដ្ឋ និងសហគមន៍ ដើម្បីការអប់រំ/Public-Community Partnership for Education (PCPE)”។

បើតាមការបញ្ជាក់របស់ សម្តេចធិបតីហ៊ុន ម៉ាណែត ដើម្បីអនុវត្តវិធានការគន្លឹះទាំង ៤ ឱ្យបានជោគជ័យ រាជរដ្ឋាភិបាលបានបង្កើត “គណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំ” ដែលជាយន្តការរបស់រាជរដ្ឋាភិបាល ហើយតម្រូវឱ្យមានការចូលរួមពីគ្រប់ក្រសួង-ស្ថាប័ន និងតួអង្គពាក់ព័ន្ធទាំងអស់ សំដៅឱ្យគុណភាពរបស់សាលារៀនរដ្ឋកាន់តែប្រសើរឡើង ហើយសិស្សានុសិស្សនឹងក្លាយជាទំពាំងស្នងឫស្សីយ៉ាងពិតប្រាកដ និងដ៏រឹងមាំ ដែលប្រកបដោយចំណេះដឹង ជំនាញ វិន័យ សីលធម៌ ព្រមទាំងឥរិយាបថថ្លថ្នូរ។

គួរជម្រាបជូនថា «ទិវាគ្រូបង្រៀនពិភពលោក» ត្រូវបានប្រារព្ធឡើងក្នុងគោលបំណងលើកកម្ពស់ និង ផ្ដល់កិត្តិយសឱ្យគ្រូបង្រៀនជុំវិញពិភពលោក និងដើម្បីឱ្យដឹងពីសារៈសំខាន់នៃគ្រូបង្រៀន ដែលជាធនធានក្នុងការផ្ដល់ចំណេះដឹង និង ការអភិវឌ្ឍដល់យុវជនជំនាន់ក្រោយ៕