ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីសម្ពោធអគារសិក្សា អគារទីចាត់ការ ផ្ទះស្នាក់នៅគ្រូ និងសមិទ្ធផលនានា នៅក្នុងខេត្តកំពង់ស្ពឺ នាព្រឹកថ្ងៃទី៨ ខែកក្កដា ឆ្នាំ២០២៥ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានជំរុញឱ្យគ្រូបង្រៀន និងឪពុកម្ដាយ សហការគ្នាដើម្បីជួយឱ្យសិស្សមានលទ្ធផលសិក្សា និងឥរិយាបទរស់នៅល្អ។
សម្តេចធិបតី ហ៊ុន ម៉ាណែត មានប្រសាសន៍ថា គ្រូបង្រៀន និងឪពុកម្ដាយ ជាតួអង្គ២សំខាន់ណាស់ក្នុងការអប់រំ។ ក្នុងនោះ ការអប់រំមាន៣កន្លែង គឺនៅសាលារៀន នៅផ្ទះ និងនៅក្នុងសង្គម។
នាយករដ្ឋមន្ត្រីកម្ពុជា បញ្ជាក់ថា មានតែនៅផ្ទះទេ ដែលឪពុកម្ដាយបារម្ភខ្វល់ខ្វាយពីកូន សួរនាំកូន ខ្លាចកូនរៀនមិនចេះ។ ទន្ទឹមគ្នានេះ មានតែនៅសាលារៀនទេ ដែលគ្រូបង្រៀន បារម្ភខ្លាចសិស្សរៀនមិនចេះ។ ប៉ុន្តែពេលចូលទៅក្នុងសង្គមមានមនុស្សមិនច្រើនទេដែលយកចិត្តទុកដាក់ពីសិស្ស ក៏ដូចជាកូនដូចឪពុកម្ដាយ និងគ្រូបង្រៀន។
សម្តេចធិបតីបន្ថែមថា គ្រូបង្រៀន និងឪពុកម្ដាយសិស្ស ត្រូវបង្កើតជាសហគមន៍មួយរួមគ្នាដើម្បីកសាងធនធានមនុស្ស។ លើសពីនេះ គ្រូបង្រៀន និងឪពុកម្ដាយសិស្ស ត្រូវទុកចិត្តគ្នា មានការសហការគ្នា ដើម្បីអប់រំសិស្ស ក៏ដូចជាអប់រំកូនឱ្យបានល្អ។ សម្តេចធិបតី ក៏បានលើកទឹកចិត្តឱ្យសាលារៀនបង្កើតក្រុមបណ្តាញសង្គមរវាងឪពុកម្ដាយ និងគ្រូប្រចាំថ្នាក់ ដើម្បីងាយស្រួលផ្ដល់ព័ត៌មានទៅគ្នាទៅវិញទៅមក ដូចជាសិស្សអវត្តមានជាដើម។
“សាលារៀនមួយចំនួនដែលអនុវត្តកន្លងទៅ ដោយគ្រូបានបង្រៀនឱ្យសិស្សពេលត្រឡប់ទៅផ្ទះ ត្រូវចេះជំរាបសួរឪពុកម្ដាយ ចេះទទួលខុសត្រូវលើកិច្ចការងារផ្ទះ ហូបបាយហើយត្រូវលាងចាន បត់ខោអាវកុំឱ្យរញ៉េរញ៉ៃ…។ ចំណុចទាំងនេះ សិស្សក៏យកទៅអនុវត្តនៅផ្ទះ ដែលធ្វើឱ្យឪពុកម្ដាយសប្បាយចិត្ត ព្រោះរបៀបរបបរស់នៅរបស់កូនចូលក្នុងគន្លងវិន័យមួយល្អ។ នៅពេលឪពុកម្ដាយប្រាប់គ្រូថាកូនកែប្រែឥរិយាបទរបស់នៅល្អ គ្រូក៏សប្បាយចិត្ត“
ជាមួយគ្នានេះដែរ សម្តេចធិបតី ហ៊ុន ម៉ាណែត ក៏បានស្នើឱ្យសាលារៀននីមួយខិតខំអភិវឌ្ឍ និងទទួលយកការវាយតម្លៃពីឪពុកម្ដាយសិស្ស ធ្វើយ៉ាងណាឱ្យពួកគាត់ទុកចិត្តសាលា និងមានភាពកក់ក្ដៅជាមួយគ្រូ បង្រៀន កាន់តែគាំទ្រគ្រូ។ សម្តេចបញ្ជាក់ថា ការវាយតម្លៃពីឪពុកម្ដាយសិស្ស ចង់យកកូនមកចូលរៀននៅសាលា សិស្សចង់មករៀន ហើយគ្រូបង្រៀន ឪពុកម្ដាយ សិស្ស មានសុខដុមរមណីកម្មល្អ នេះហើយទើបជាពិន្ទុដែលគណៈគ្រប់គ្រងសាលាចង់បាន៕
