ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីសម្ពោធអគារសិក្សា អគារបណ្ណាល័យ អគារសយណដ្ឋាន និងសមិទ្ធផលនានាក្នុងវិស័យអប់រំខេត្តរតនៈគិរី កាលពីចុងសប្តាហ៍កន្លងទៅនេះ សម្ដេចបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា មានប្រសាសន៍ថា រាជរដ្ឋាភិបាល និងប្រជាជនត្រូវរួមគ្នាអភិវឌ្ឍន៍ធនធានមនុស្សតាមរយៈការផ្ដល់ឱកាសរៀនសូត្រពេញលេញ។
ឆ្លៀតក្នុងឱកាសនោះ សម្ដេចធិបតី ក៏បានកោតសរសើរវិស័យអប់រំក្នុងខេត្តរតនៈគិរីដែលសិស្សមានសមត្ថភាពប្រឡងបាននិទ្ទេស A និងចូលរួមប្រកួតទទួលបានមេដាយមាសជាច្រើន។ ក្នុងនោះសាលាគំរូនៅខេត្តរតនៈគិរី មានចំនួន២សាលា ហើយសាលារៀនចំនួន៤ នៅខេត្តរតនៈគិរី បានចូលរួមប្រកួតប្រជែងអង្គភាពផ្ដល់សេវាសាធាណៈគំរូក្នុងវិស័យអប់រំ ឆ្នាំ២០២៤ ផងដែរ។
“រឿងឱកាស សមត្ថភាព ខួរក្បាលមិនចាញ់គ្នាទេ អ្នកខេត្តរតនៈគិរីមិនចាញ់អ្នកភ្នំពេញទេ ឱ្យតែផ្ដល់ឱកាសតភ្ជាប់សាលា តភ្ជាប់ផ្លូវ មានកុំព្យូទ័រ មានភ្លើង ដាក់អ៊ីនធឺណិតឱ្យរៀនស្រាវជ្រាវ ធ្វើបានដូចតែគ្នា”
សម្តេចនាយករដ្ឋមន្រ្តីបញ្ជាក់ថា រាជរដ្ឋាភិបាល និងប្រជាជនត្រូវរួមគ្នាតែមួយ។ រដ្ឋាភិបាលបានត្រឹមតែបង្កលក្ខណៈ ផ្ដល់សិទ្ធិសេរីភាព ផ្ដល់ហិរញ្ញវត្ថុ គោលការណ៍គោលនយោបាយតម្រង់ទិស ប៉ុន្តែការប្រើប្រាស់ឱកាស គឺប្រជាពលរដ្ឋខ្លួនឯង។
សម្ដេចបវរធិបតី ហ៊ុន ម៉ាណែត លើកឡើងទៀតថា សមិទ្ធផលដែលបានមកពីការប្រកួតប្រជែង ទាំងសាលាគំរូ ទាំងសិស្សនិទ្ទេស A បង្ហាញពីការប្រើប្រាស់ឱកាសនេះបានល្អសម្រាប់ប្រជាជនខេត្តរតនគិរី។ សម្ដេចបវរធិបតី កោតសរសើរ និងជំរុញប្រើប្រាស់ឱកាសនេះ ដើម្បីធ្វើយ៉ាងណាឱ្យឱ្យខេត្តរតនៈគិរីកាន់តែរីកចម្រើន។
គួរជំរាបជូនថា នៅក្នុងរាជរដ្ឋាភិបាលអាណត្តិទី៧ នៃរដ្ឋសភា ក្រសួងអប់រំ យុវជន និងកីឡា បានកំណត់នូវកំណែទម្រង់សាលារៀនជាអាទិភាព។ ក្នុងនោះ ក្រសួង នឹងពង្រឹងការគ្រប់គ្រងតាមសាលារៀនឆ្ពោះទៅលើកកម្ពស់លទ្ធផលសិក្សារបស់សិស្ស ការផ្លាស់ប្តូរវប្បធម៌សាលារៀន និងការពង្រឹងវិន័យ សីលធម៌ ចរិយាធម៌ សុជីវធម៌ គុណធម៌ និងឥរិយាបទល្អរបស់បុគ្គលិកអប់រំ និងសិស្សានុសិស្ស៕
