ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ចាប់តាំងពីព្រឹកព្រលឹមថ្ងៃទី៩ ខែធ្នូ ឆ្នាំ២០២៥ យុវជនរាប់រយនាក់ បានធ្វើដំណើរមកកាន់សាកលវិទ្យាល័យការពារជាតិ តាមការអំពាវនាវ ក្នុងការចូលរួមបរិច្ចាកឈាម ដើម្បីជាកម្លាំងចិត្តជួយដល់កងទ័ពជួរមុខ និងប្រជាជននៅតាមព្រំដែន ដែលកំពុងរងការឈ្លានពានពីសំណាក់យោធាថៃ។
លោក ពិសិដ្ឋ ពិសើរ សិក្ខាកាមនៃសាកលវិទ្យាល័យការពារជាតិ និយាយថា រូបលោកក៏ចូលរួមបរិច្ចាកឈាមនេះដែរ ព្រោះលោកចង់ចូលរួមធ្វើអំពើល្អជួយដល់សង្គមជាតិ។ ពិសើរ បន្តថា នេះជាលើកទីមួយហើយដែលលោកបរិច្ចាកឈាម ប៉ុន្តែលោកសប្បាយចិត្តដែលបានរួមចំណែកក្នុងកិច្ចការងារនេះ។
សម្រាប់បញ្ហាជម្លោះនៅតំបន់ព្រំដែនកម្ពុជា-ថៃ លោក ពិសើរ បានបង្ហាញអារម្មន៍តូចចិត្ត ដោយសារកម្ពុជាទើបតែបានចុះកិច្ចព្រមព្រៀងសន្តិភាពជាមួយថៃ ដែលមានការចូលរួមពីប្រធានាធិបតីអាមេរិក និងប្រធានអាស៊ានធ្វើជាសាក្សីផង ប៉ុន្តែភាគីថៃបែរជាមិនគោរពកិច្ចព្រមព្រៀងសន្តិភាព ហើយផ្ទុយទៅវិញបែរជាបង្កឱ្យផ្ទុះសង្គ្រាមឡើងវិញ ដែលផ្តល់ផលលំបាកខ្លាំងជាងគេ គឺប្រជាពលរដ្ឋនៅតាមព្រំដែនតែម្ដង។
មានស្រុកកំណើតនៅឯ ស្រុកជាំក្សាន្ត ខេត្តព្រះវិហារ ជាប់ព្រំដែនថៃ ហើយជាទីដែលកំពុងផ្ទុះអាវុធ លោក ពិសើរ បានបង្ហាញអារម្មណ៍ពិបាកចិត្តជាខ្លាំងដោយសារមានក្រុមគ្រួសារ ផ្ទះសម្បែងនៅទីនោះផ្ទាល់។ ពិសើរ បន្តថា ប៉ា បងប្រុស សុទ្ធតែជាទាហាន ពេលនេះ ពិសើរ មានអារម្មណ៍មួយនៅភ្នំពេញកំពុងសិក្សា តែអារម្មណ៍មួយទៀតបារម្ភពីក្រុមគ្រួសារ បងប្អូនដែលនៅទីតាំងនោះ។
«ខ្ញុំមានអារម្មណ៍ខកចិត្តចំពោះប្រទេសថៃដែលតែងតែឈ្លានពានមកលើប្រទេសកម្ពុជាម្ដងហើយម្ដងទៀត»
យ៉ាងណាក៏ដោយលោក ពិសិដ្ឋ ពិសើរ បានសំណូមពរបងប្អូនប្រជាពលរដ្ឋទាំងអស់ សូមស្ដាប់នូវប្រសាសន៍ណែនាំរបស់ថ្នាក់ដឹកនាំ ក៏ដូចជាជឿជាក់លើរាជរដ្ឋាភិបាលកម្ពុជា ធ្វើយ៉ាងណារក្សាឱ្យបាននូវសន្តិភាព ព្រោះសន្តិភាពជួយឱ្យប្រទេសមានការអភិវឌ្ឍរីកចម្រើនទៅមុខទៀត។ ជាពិសេស យុវជនអាចចូលរួមបានតាមរូបភាពកិច្ចការសង្គម ក៏ដូចជាការចូលរួមជាមួយរាជរដ្ឋាភិបាល ធ្វើយ៉ាងណាថែរក្សានូវសុខសន្តិភាព ដើម្បីឈានទៅដល់ការអភិវឌ្ឍប្រទេសជាតិ។
ជាមួយគ្នានេះ កញ្ញា គី សុខហ័ង ដែលបានមកចូលរួមបរិច្ចាគឈាម និយាយថា ពេលខ្លួនដឹងថាប្រទេសកម្ពុជារងការឈ្លានពានពីយោធាថៃ កញ្ញាមានអារម្មណ៍ រន្ធត់ចិត្ត អាណិតប្រជាជនដែលនៅតាមតំបន់ព្រំដែន ដែលពួកគាត់រងគ្រោះខ្លាំង និងមានជនស៊ីវិលស្លាប់ច្រើននាក់ទៀត។ សុខហ័ង បន្តថា កញ្ញាមិនអាចជួយអ្វីបានទេ គឺមានតែការបរិច្ចាគឈាមនៅពេលសង្គមជាតិកំពុងមានតម្រូវការ។
«ខ្ញុំជឿជាក់លើរាជរដ្ឋាភិបាល និងកងទ័ពខ្មែរយ៉ាងពេញទំហឹង ក្នុងការរក្សាសុខសន្តិភាព និងទឹកដី ហើយក៏សូមជូនពរឱ្យសុវត្ថិភាពគ្រប់ៗគ្នា»
លោកបណ្ឌិត យង់ ពៅ អ្នកជំនាញភូមិសាស្រ្តនយោបាយ បានសាទរចំពោះការរួបរួមរបស់យុវជនកម្ពុជានៅកាលៈទេសៈនេះ ដោយថា យុវជនត្រូវតែចូលរួមជាធ្លុងមួយសាមគ្គីឯកភាពជាតិ ហើយបើមិនអាចជួយអ្វីបានក៏យើងត្រូវជឿទៅលើចំណាត់ការរបស់រាជរដ្ឋាភិបាល មានសាមគ្គីភាពរវាងប្រជាជាតិ និងប្រជាជាតិ តតាំងជាមួយសត្រូវ ដែលមានមហិចតាលេបត្របាក់ទឹកដីរបស់យើង។
លោកបណ្ឌិត យង់ ពៅ មានប្រសាសន៍ថា ក្នុងអំឡុងពេលដែលយោធាថៃប្រកាសធ្វើសង្គ្រាមជាមួយកម្ពុជា និងបានបាញ់ស្រោចមកលើកម្ពុជាយ៉ាងសាហាវឃោឃៅព្រៃផ្សៃ ក្នុងនាមជាយុវជនកម្ពុជា ត្រូវតែរួបរួមសាមគ្គីឯកភាពជាតិជាមួយរាជរដ្ឋាភិបាលជាស្មារតីរួមនៃប្រជាជាតិ។ លោកបណ្ឌិតបន្តថា យុវជនមិនគួរធ្វើឱ្យមានការបែកបាក់សាមគ្គីជាតិទាំងការប្រើប្រាស់ជាសារបង្ហោះ សំណេរ រូបភាពណាដែលបំបាក់ស្មារតីជាតិ បំបាក់ស្មារតីកងកម្លាំងស្មារតីជួរមុខ។
បើតាមអ្នកជំនាញភូមិសាស្រ្តនយោបាយរូបនេះ អ្វីដែលអាចធ្វើបានថែមទៀត ដើម្បីជួយជាតិ យុវជនត្រូវប្រើចំណេះដឹងដែលខ្លួនមានជួយផ្សព្វផ្សាយ ជួយបំភ្លឺទៅអន្តរជាតិ ជួយផ្សាយព័ត៌មានពិតចេញទៅ ជួយសរសេរជាសារអំពាវនាវដល់អង្គការអន្តរជាតិ ឬស្ថាប័នព័ត៌មានអន្តរជាតិធំៗនូវអ្វីដែលថៃបានឈ្លានពានកម្ពុជា។
គួរជំរាបជូនថា នៅអង្គារ ទី៩ ខែធ្នូ ឆ្នាំ២០២៥នេះ គ្រូពេទ្យស្ម័គ្រចិត្តយុវជនសម្តេចតេជោ TYDA បានរៀបចំកម្មវិធីបរិច្ចាគឈាម ដើម្បីជាកម្លាំងចិត្តជួយដល់កងទ័ពជួរមុខ និងប្រជាជននៅតាមព្រំដែន ដោយផ្តើមចាប់ពីម៉ោង ៨ព្រឹក ដល់ម៉ោង ៤ល្ងាច នៅសាកលវិទ្យាល័យការពារជាតិ៕
