កំពង់ស្ពឺ – ជាថ្មីម្តងទៀតនៅក្នុងពិធីជួបសំណេះសំណាលជាមួយបងប្អូនកម្មករកម្មការិនីជិត២ម៉ឺននាក់នៅក្រុងច្បារមន ខេត្តកំពង់ស្ពឺ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រ​កម្ពុជា បានបង្ហាញបំណងចង់ឱ្យម្ចាស់រោងចក្រ និង​កម្មករ ត្រូវ​ធ្វើការ​រួមគ្នា ដើម្បីឱ្យរោងចក្រ​ក្លាយទៅជា​សហគមន៍សុខសាន្តមួយ ជារោងចក្រដែលមានសុវត្ថិភាព គ្មានអំពើហិង្សា គ្មានការ​ប្រើប្រាស់គ្រឿងញៀន គ្មានបងតូចបងធំ និង​គ្មានជម្លោះ។

បើតាមសម្តេចតេជោ រោងចក្រសហគមន៍សុខសាន្តនេះ ថៅកែរោងចក្រ ឬនិយោជក ត្រូវ​យកចិត្ត​ទុកដាក់​ពីសុខទុក្ខ​របស់កម្មករ ឯកម្មករមានសុខភាពល្អ ក៏​ប្រឹងប្រែងធ្វើការ ដែលនេះជាការបំពេញ​ឱ្យ​គ្នា​ទៅវិញ​ទៅមក។ ជាមួយ​គ្នានេះ នៅពេល​ដែលមានរឿងកើតឡើង ភាគីទាំងពីរត្រូវដោះស្រាយឱ្យឆាប់រហ័ស។

សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា

“…កិច្ចការបន្តដែលពូចង់បាន គឺចង់​ឱ្យរោងចក្រក្លាយ​ទៅជា​សហគមន៍​សុខសាន្តមួយ ធ្វើ​ម៉េច​ឱ្យ​រោងចក្រ​របស់យើង​ទៅជា​រោងចក្រ​ដែលមានសុវត្ថិភាព គ្មានអំពើហិង្សា គ្មានការប្រើប្រាស់គ្រឿងញៀន ឬចែកចាយគ្រឿងញៀន គ្មានបងតូច បងធំ គ្មានជម្លោះ “

ឆ្លៀតក្នុងឱកាសនោះ សម្តេចតេជោនាយករដ្ឋមន្រ្តី ក៏​បានអបអរសាទរចំពោះ​រោងចក្រ​ទាំងអស់​នៅទូទាំងប្រទេស ដែល​បាន​កែលម្អ​នូវ​ស្ថានភាពទាក់ទងជាមួយនឹងសិទ្ធិការងារ ការរក្សានូវសុខភាពកម្មករឱ្យ​កាន់តែប្រសើរ។

តាមប្រសាសន៍របស់សម្តេចនាយករដ្ឋមន្រ្តី បច្ចុប្បន្នរាជរដ្ឋាភិបាលកំពុងតែខិតខំក្នុងការទាក់ទាញទាំងវិនិយោគក្នុងស្រុក ទាំងវិនិយោគក្រៅស្រុកឱ្យ​មកធ្វើការវិនិយោគ​នៅ​កម្ពុជា ដោយមិន​គ្រាន់តែសំដៅ​លើវិស័យកាត់ដេរ និងស្បែកជើងប៉ុណ្ណោះទេ ប៉ុន្តែក៏មានវិស័យដទៃ​ទៀតផងដែរ ក្នុងការផលិតទំនិញ​ជំនួស​ឱ្យ​ទំនិញប្រើប្រាស់ក្នុងស្រុក ជំនួស​ឱ្យ​ការ​នាំចូល ក៏​ដូចជាផលិតទំនិញ​សម្រាប់ការ​នាំចេញទៅ​កាន់ទីផ្សារ, ជាមួយ​គ្នានេះ រាជរដ្ឋាភិបាលក៏​ខិតខំបើកទីផ្សារ​ខាងក្រៅ តាមរយៈនយោបាយរក្សា និង​ពង្រីកទីផ្សារ​ចាស់ និងពង្រីកបន្ថែម​ទៅ​លើ​ទីផ្សារ​ថ្មីៗ។

សម្តេចតេជោនាយករដ្ឋមន្រ្តី បានសង្កត់ធ្ងន់ថា ច្បាស់វិនិយោគថ្មីត្រូវ​បានដាក់​ឱ្យ​ប្រើប្រាស់ ដែលមានចំណុចទាក់ទាញ ហើយ​ខាងក្នុង​ក៏​មានការប្រឹងសាងហេដ្ឋារចនាសម្ព័ន្ធ​ទាំងរឹង និង​ទន់ ដោយហេដ្ឋារចនាសម្ព័ន្ធរឹង ចង់សំដៅទៅ​លើ​ផ្លូវ ព្រលានយន្តហោះ កំពង់ផែ ក៏​ដូចជា​អគ្គិសនីសម្រាប់ផ្គត់ផ្គង់, រីឯហេដ្ឋារចនាសម្ព័ន្ធទន់ គឺសំដៅទៅលើ​ប្រព័ន្ធច្បាប់ នីតិវិធីដែលមិនស៉ាំញ៉ាំ បន្ថែម​ទៅ​ដោយ​ការ​បណ្តុះបណ្តាល​បច្ចេកទេស និង​វិជ្ជាជីវៈ។

ការបណ្តុះបណ្តាលបច្ចេកទេស និង​វិជ្ជាជីវៈ បើតាមប្រសាសន៍សម្តេចតេជោ កម្ពុជានឹងបណ្តុះបណ្តាលប្រជាពលរដ្ឋ​ក្នុង​មួយ​ឆ្នាំ​៣០ម៉ឺននាក់ ក្នុងគម្រោងរយៈពេល​៥ឆ្នាំខាងមុខ ដែលនឹងត្រូវបណ្តុះបណ្តាល​ឱ្យ​បាន ១លាន៥សែននាក់។

គួរបញ្ជាក់ផងដែរថា បើតាមផែនការយុទ្ធសាស្ត្ររបស់រាជរដ្ឋាភិបាលកម្ពុជា បានកំណត់ចក្ខុវិស័យក្នុងការប្រែក្លាយកម្ពុជាឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលកម្រិតខ្ពស់នៅឆ្នាំ២០៥០។ តាមការចាត់ចំណាត់ថ្នាក់ដោយធនាគារពិភពលោកបានបង្ហាញថា ប្រទេសដែលមានប្រាក់មធ្យមកម្រិតទាប គឺត្រូវមានចំណូលជាតិដុលក្នុងពលរដ្ឋម្នាក់ៗ (GNI per capita)ចន្លោះពី ១.០៨៦ ទៅ៤.២៥៥ ដុល្លារអាមេរិកក្នុងមួយឆ្នាំ, ប្រទេសចំណូលមធ្យមកម្រិតខ្ពស់ ត្រូវមានចំណូលជាតិដុលក្នុងពលរដ្ឋម្នាក់ៗចន្លោះពី ៤.២៥៦ ទៅដល់១៣.២០៥ ដុល្លារក្នុងមួយឆ្នាំ ខណៈប្រទេសចំណូលខ្ពស់ត្រូវមានលើពី ១៣.២០៥ដុល្លារឡើងទៅ៕