ខណៈ​ពិធីបុណ្យ​ចូលឆ្នាំថ្មីប្រពៃណីជាតិខ្មែរ គ្រោង​នឹង​ប្រារព្ធធ្វើ​នៅ​ថ្ងៃទី១៤ ខែមេសា ខាងមុខនេះ ដែលជា​ពេលវេលា​នៃការជួបជុំ​ក្រុមគ្រួសារ​សាច់ញាតិ ប៉ុន្តែ​សម្រាប់​និស្សិត​កំពុង​សិក្សា​នៅ​ក្រៅប្រទេស​ភាគច្រើន​ពួក​គេ​មិន​អាច​ត្រឡប់​មក​ចូលរួមពិធីចូលឆ្នាំនៅកម្ពុជាបានទេ ដោយ​ខ្លះ​ត្រូវ​ជាប់ប្រឡង ខ្លះជាប់កិច្ច​ការ​រវល់ផ្សេងៗ​ជាដើម។ យ៉ាងណាក៏ដោយ ស្ថានទូត​កម្ពុជា​នៅ​តាមបណ្តាប្រទេស​នីមួយៗ ក៏​តែងប្រារព្ធពិធីបុណ្យចូលឆ្នាំ ដោយ​មានការអញ្ជើញប្រជាពលរដ្ឋ​ខ្មែរ ក៏​ដូចជា​និស្សិត​មកចូលរួម និង​កម្សាន្ត​សប្បាយផងដែរ។

លោក ខ្វែង ភារម្យ ប្រធានសមាគមន៍និស្សិតកម្ពុជាប្រចាំប្រទេសរុស្សីបានឱ្យដឹងថា នៅក្នុងឱកាសបុណ្យចូលឆ្នាំប្រពៃណីជាតិឆ្នាំនេះមិនមានសិស្សនិស្សិតណាត្រឡប់មកលេងប្រទេសកម្ពុជាទេ ដោយហេតុថាមានជំនាន់ខ្លះត្រូវប្រឡងបញ្ចប់ឆមាស ជំនាន់ខ្លះត្រូវត្រៀមប្រឡងចេញ និងត្រៀមនិក្ខេបបទការពារសារណាសិក្សាជាដើម ។

ដោយឡែកអគ្គស្ថានទូតកម្ពុជាប្រចាំប្រទេសរុស្សីនឹងប្រារព្ធកម្មពីធីសង្ក្រាន្តអបអរឆ្នាំថ្មីដើម្បីជួបជុំជាមួយនិស្សិតកម្ពុជាដែលកំពុងសិក្សា និងស្នាក់នៅសាធារណៈរដ្ឋបេឡារុស អាមេនី និងអេស្តូនី នៅថ្ងៃទី១៥ ខែមេសាខាងមុខនេះ ។ កម្មពីធីនេះផងដែរនឹងជាឱកាសមួយសម្រាប់សិស្សានុសិស្សា និងប្រជាពលរដ្ឋខ្មែរដែលរស់នៅសហព័ន្ធរុស្សីបានជួបជុំគ្នានិងការសំណេះសំណាលជាមួយឯកឧត្ដមឯកអគ្គរាជទូត ការញាំអាហារសាមគ្គី និងលេងល្បែងប្រជាប្រិយជាដើម ។

ជាមួយគ្នានេះ លោក ខ្វែង ភារម្យ ក្នុងនាមជាប្រធានសមាគមន៍និស្សិតខ្មែរប្រចាំប្រទេសរុស្សី ក៏ដូចជាប្រជាពលរដ្ឋខ្មែរម្នាក់ពិតជាមានសេចក្ដីសោមនស្សរីករាយដែលអាចត្រឡប់មកជួបជុំបងប្អូនជាប្រជាពលរដ្ឋខ្មែរក្រោយផ្អាកការជួបជុំប៉ុន្មានឆ្នាំកន្លងទៅដោយសារវិបត្តិកូវីដ-១៩ ៕