ភ្នំពេញ – ក្នុងពិធីប្រគល់រង្វាន់លើកទឹកចិត្តជូនអ្នកសារព័ត៌មានដែលបានចូលរួមប្រកួតប្រជែងអត្ថបទ ក្រោមប្រធានបទ «ជំរុញលើកកម្ពស់ទឹកស្អាត និងអនាម័យសម្រាប់ទាំងអស់គ្នា» នាថ្ងៃទី៣០ ខែមិថុនា ឆ្នាំ២០២៣កន្លងទៅ លោក យី គឹមថាន នាយករងប្រចាំប្រទេសទទួលបន្ទុកផ្នែកកម្មវិធី នៃអង្គការភ្លែនអន្តរជាតិកម្ពុជា មានប្រសាសន៍ថា អ្នកសារព័ត៌មានដើរតួនាទីសំខាន់ក្នុងការសរសេរអត្ថបទផ្សព្វផ្សាយដើម្បីឱ្យប្រជាជនកម្ពុជាយល់ដឹង និងចូលរួមលើកកម្ពស់ទឹកស្អាត និងអនាម័យ។

នាយករងប្រចាំប្រទេសទទួលបន្ទុកផ្នែកកម្មវិធី នៃអង្គការភ្លែនអន្តរជាតិកម្ពុជា បញ្ជាក់បន្ថែមថា បច្ចុប្បន្ននេះ ស្ថានភាពអនាម័យមានការកែលម្អច្រើន ដោយថ្មីៗនេះខេត្តមួយចំនួន៥ ទើបតែបានប្រកាសក្លាយជាខេត្តបញ្ចប់ការបន្ទោរបង់ពាសវាលពាសកាល (ODF) រួមមាន ខេត្តស្វាយរៀង ខេត្តព្រៃវែង ខេត្តកំពង់ឆ្នាំង ខេត្តកណ្ដាល និងខេត្តកំពង់ស្ពឺ។ ជាពិសេស នៅថ្ងៃទី០៥ ខែកក្កដា ឆ្នាំ២០២៣ ឆាប់ៗខាងមុខនេះ ខេត្តកែបនឹងប្រកាសជាខេត្តសម្រេចបាននូវ ODF ផងដែរ។

លោក យី គឹមថាន បន្ថែមថា អត្រាគ្របដណ្ដប់អនាម័យបានជិត ៩០ភាគរយតាមគម្រោងដែលបានគ្រោងទុក ដែលកិច្ចការងារទាំងនេះអាចសម្រេចទៅបានគឺសុទ្ធតែមានការចូលរួមពីភាគីពាក់ព័ន្ធទាំងអស់ ចាប់តាំងពីរាជរដ្ឋាភិបាល អង្គការសង្គមស៊ីវិល ជាពិសេសអ្នកសារព័ត៌មានដែលមានថ្វីដៃក្នុងការសរសេរជាសាច់រឿងដើម្បីឱ្យអ្នកអាន អ្នកមើលមានការចាប់អារម្មណ៍ហើយគិតថា ការមានបង្គន់អនាម័យប្រើប្រាស់សំខាន់។ លោកបន្តថា ក្រោមកិច្ចសហប្រតិបត្តិការជាមួយក្រសួងអភិវឌ្ឍន៍ជនបទ តែងតែទទួលបានការគាំទ្រ និងផ្ដល់ការទុកចិត្តដល់អង្គការភ្លែននៅក្នុងការសហការ ក៏ដូចជាអ្នកសារព័ត៌មានកន្លងមកបានចុះផ្សាយអត្ថបទជាច្រើនដើម្បីឧត្តមប្រយោជន៍កុមារកម្ពុជា។

លោក យី គឹមថាន នាយករងប្រចាំប្រទេសទទួលបន្ទុកផ្នែកកម្មវិធី នៃអង្គការភ្លែនអន្តរជាតិកម្ពុជា

“ការលាងសម្អាតដៃជាមួយសាប៊ូសុទ្ធតែជារឿងសំខាន់សម្រាប់សុខភាពបុគ្គល និងសាធារណៈ ដែលពីមុនមកគេធ្លាប់គិតថារឿងទាំងអស់នេះ មិនមានអ្វីចាំបាច់ លាងដៃក៏មិនចាំបាច់លាង បន្ទោរបង់ក្នុងព្រៃគិតថាជារឿងធម្មតា ប៉ុន្តែបន្ទាប់ពីមានការចូលរួមបំផុសបំផុលពីអ្នកសារព័ត៌មានមក មនុស្សម្នាក់ៗចាប់ផ្ដើមឱ្យតម្លៃហើយយល់ថា ការមានបង្គន់អនាម័យ គឺមានសារៈសំខាន់ខ្លាំងសម្រាប់គ្រួសារ និងមនុស្សនៅក្នុងសង្គម”

ជាមួយ​គ្នា​នេះដែរ ឯកឧត្ដម ថោង ពោជ រដ្ឋលេខាធិការក្រសួងអភិវឌ្ឍន៍ជនបទ ក៏​បានមានប្រសាសន៍ថ្លែងអំណរគុណដល់អ្នកសារព័ត៌មានទាំងអស់ដែលបានខិតខំជួយផ្សព្វផ្សាយព័ត៌មានទាក់ទងនឹងវិស័យទឹកស្អាត និងអនាម័យជនបទ ក៏ដូចជាបញ្ហាសង្គមផ្សេងៗ។ ឯកឧត្ដមបន្តថា ផ្ដោតលើបញ្ហា របស់ប្រជាពលរដ្ឋទាក់ទងនឹងការប្រើប្រាស់បង្គន់អនាម័យល្អ សំដៅដល់ការនៅជុំវិញខ្លួនរបស់យើងត្រូវមានបរិស្ថានល្អ ទើបក្រសួងអភិវឌ្ឍន៍ជនបទតែងតែជំរុញនៅគ្រប់តំបន់ទូទាំងប្រទេសធ្វើយ៉ាងណាឱ្យប្រជាពលរដ្ឋយល់ដឹងអំពីផលប៉ះពាល់នៃការបន្ទោរបង់ពាសវាលពាសកាលដោយផ្លាស់ប្ដូរឥរិយាបទមកបន្ទោរបង់នៅក្នុងបង្គន់វិញ ដើម្បីបង្ការប្រជាពលរដ្ឋគេចផុតពីជំងឺឆ្លងផ្សេងៗ ។

ឯកឧត្ដម ថោង ពោជ រដ្ឋលេខាធិការក្រសួងអភិវឌ្ឍន៍ជនបទ

“ខ្ញុំសង្ឃឹមថា អ្នកសារព័ត៌មានទាំងអស់នឹងបន្តខិតខំជួយផ្សព្វផ្សាយ និងសរសេរអត្ថបទដែលទាក់ទងនឹងការផ្គត់ផ្គង់ទឹកស្អាត និងអនាម័យជនបទរបស់ក្រសួងអភិវឌ្ឍន៍ជនបទ ដោយសហការជាមួយនាយកដ្ឋានថែទាំងសុខភាពដើម្បីទទួលបានព័ត៌មានឆ្នើលយតបទៅវិញទៅមក”

លោកវេជ្ជបណ្ឌិត លន់ សាយតេង ប្រធាននាយកដ្ឋានថែទាំសុខភាពជនបទ បញ្ជាក់បន្ថែមថា លោកមានសេចក្ដីសង្ឃឹមនិងជឿជាក់ក្រោយឆ្លងកាត់បទពិសោធន៍ជោគជ័យកន្លងមកក្នុងការសម្រេចបានការបញ្ឈប់បន្ទោរបង់ពាសវាលពាសកាល (ODF) ហើយនឹងបន្តជំរុញឱ្យមានការបញ្ចប់ការបន្ទោរបង់ពាសវាលពាសកាល (ODF) នៅខេត្តផ្សេងៗបន្ថែមទៀត។ លោកវេជ្ជបណ្ឌិត លន់ សាយតេង បន្តថា ដើម្បីអាចសម្រេចបានលទ្ធផលជោគជ័យនេះ ចាំបាច់ត្រូវលើកទឹកចិត្តដល់អ្នកសារព័ត៌ឱ្យចូលរួមចំណែកលើកកម្ពស់ទឹកស្អាត និងអនាម័យ ដើម្បីឱ្យប្រទេសកម្ពុជាអាចសម្រេចបានការបញ្ចប់ការបន្ទោរបង់ពាសវាលពាសកាលស្របតាមផែនការដែលបានគ្រោងទុក។

លោកវេជ្ជបណ្ឌិត លន់ សាយតេង ប្រធាននាយកដ្ឋានថែទាំសុខភាពជនបទ

“ឥឡូវនេះ យើងកំពុងធ្វើយ៉ាងណាឱ្យបង្គន់អនាម័យរបស់យើងឆ្លើយតបទៅតាមគោលការថ្នាក់ជាតិរបស់យើង គឺអនាម័យសម្រាប់ទាំងអស់គ្នា រាប់ទាំងជនមានពិការភាព មនុស្សចាស់ និងកុមារ”

គួរជម្រាបជូនថា នាយកដ្ឋានថែទាំសុខភាពជនបទ នៃក្រសួងអភិវឌ្ឍន៍ជនបទក្រោមកិច្ចសហប្រតិបត្តិការជាមួយអង្គការភ្លែនអន្តរជាតិកម្ពុជា បានរៀចំពិធីប្រកាសនិងប្រគល់បណ្ណជ័យលាភី ជូនអ្នកសារព័ត៌មានដែលបានផលិតនិងចុះផ្សាយព័ត៌មានជំរុញការបញ្ចប់ការបន្ទោរបង់ពាសវាសពាសកាល និងការផ្លាស់ប្តូរឥរិបទប្រតិបត្តិអនាម័យនៅកម្ពុជា។ អត្ថបទ និងការចុះផ្សាយចំនួន ៣៥ បានផ្ញើជូនមកគណៈកម្មាធិការវាយតម្លៃ។ តាមរយៈការវាយតម្លៃដោយសុក្រិត្យភាព អ្នកសារព័ត៌មានចំនួន៤ ត្រូវបានជ្រើសរើសជាជ័យលាភី៕