អ៊ីនធឺណិត បានក្លាយជាផ្នែកមួយដ៏សំខាន់សម្រាប់ការរស់នៅរបស់មនុស្សក្នុងពេលបច្ចុប្បន្ន។ បើទោះជាវត្តមានរបស់អ៊ីនធឺណិតផ្ដល់អត្ថប្រយោជន៍ច្រើន ប៉ុន្តែវាក៏អាចបង្ករជាហានិភ័យផងដែរ ដូច្នេះយើងត្រូវដឹងអំពីរបៀបប្រើប្រព័ន្ធឌីជីថលប្រកបដោយសុវត្ថិភាព។

យោងតាម WE Forum បានបង្ហាញពីទម្លាប់ចំ​នួន ៤ ដែលគួរជៀសវាង ដើម្បីគ្រប់គ្រងសុវត្ថិភាពឌីជីថល។

១. ការធ្វេសប្រហែសលេខកូដសម្ងាត់ ៖ នេះគឺជាកំហុសមួយដែលមើលទៅសាមញ្ញ ប៉ុន្តែវាប៉ះពាល់ខ្លាំងដល់ការរក្សាសុវត្ថិភាពប្រព័ន្ធអ៊ីនធឺណិត។ ការធ្វេសប្រហែសនោះអាចជា ការប្រើលេខកូដសម្ងាត់តែមួយសម្រាប់ធ្វើការ និងអ៊ីម៉ែលផ្ទាល់ខ្លួន វាប្រៀបដូចជាអ្នករក្សាទុកទិន្នន័យសំខាន់ៗក្នុងហានិភ័យដែរ។ នៅពេលដែលនរណាម្នាក់ដឹងពីលេខកូដសម្ងាត់នេះ គេអាចលួចទិន្នន័យរបស់អ្នកទាំងនៅកន្លែងធ្វើការ និងជីវិតផ្ទាល់ខ្លួន។ ហេតុនេះ អ្នកជំនាញណែនាំឱ្យអ្នកប្រើប្រាស់មិនគួរចែករំលែកលេខសម្ងាត់របស់ខ្លួនទៅនរណាម្នាក់ឡើយ។ ក្រៅពីនេះ អ្នកប្រើគួរបង្កើតលេខកូដដែលមានសុវត្ថិភាពខ្ពស់ យ៉ាងហោចណាស់មានតួរអក្សចំនួន១២ ដែលមានទាំងអក្សរធំ អក្សរតូច លេខ និងតួរអក្សរពិសេស។ ម្យ៉ាងទៀត គួរផ្លាស់ប្ដូរលេខកូដនោះ ជារៀងរាល់ ៤ ទៅ៦ខែម្ដង។

២. មិនធ្វើបច្ចុប្បន្នភាព Software ៖ ប្រព័ន្ធ និងឧបករណ៍ប្រើប្រាស់ទាំងអស់ តម្រូវឱ្យមានការធ្វើបច្ចុប្បន្នភាពជាប្រចាំ ដើម្បីពង្រឹង និងកែតម្រូវចំណុចខ្វះខាតមួយចំនួនរបស់ប្រព័ន្ធ។ ក្រៅពីនេះ វាក៏ជួយពង្រឹងសុវត្ថិភាពប្រព័ន្ធទៀតផង។ ការមិនខ្វាយខ្វល់ក្នុងការធ្វើបច្ចុប្បន្នភាពប្រព័ន្ធ ក៏ជាមូលហេតុមួយ ដែលនាំឱ្យមានការវាយប្រហារ ឬលួចទិន្នន័យនៅបណ្ដាញឌីជីថលដែរ ។ ដូច្នេះ សូមកុំភ្លេចធ្វើបច្ចុប្បន្នភាព ឧបករណ៍ប្រើប្រាស់ជាប្រចាំ ដើម្បីការពារខ្លួនពីការវាយប្រហារផ្សេងៗ។

៣. ការប្រើសេវាអ៊ីនធឺណិតសាធារណៈ ៖ ការប្រើសេវាអ៊ីនធឺណិតនៅតាមទីសាធារណៈដូចជា នៅតាមភោជនីយដ្ឋាន ស្ថានីយ៍រថភ្លើង សណ្ឋាគារ និងទីប្រជុំជនផ្សេងៗ បានក្លាយជាទៅរឿងធម្មតាសម្រាប់សាធារណជន។ យ៉ាងណាមិញ ក្រុមអ្នកស្រាវជ្រាវផ្នែកសុវត្ថិភាពឌីជីថល បានបង្ហាញថា ការប្រើបណ្ដាញអ៊ីនធឺណិតសាធារណ​ជនបែបនេះ គឺមិនមានសុវត្ថិភាពឡើយ។ ជាពិសេស គួរជៀសវាងការបញ្ចូលលេខកូដសម្ងាត់ ឬប្រើកម្មវិធីទូរស័ព្ទដែលផ្ទុកទិន្នន័យសំខាន់ៗដូចជា វេទិការបង់ប្រាក់ ឬការចូលប្រើប្រាស់សេវាធនាគារជាដើម។

៤. ទទួលយកគោលការណ៍ផ្សេងៗ ដោយមិនអានលក្ខខណ្ឌ៖ ក្រុមអ្នកវាយប្រហារតាមប្រព័ន្ធអ៊ីនធឺណិត ជានិច្ចជាកាលគេប្រើកម្មវិធីទូរស័ព្ទ ឬវេទិកាដែលមានប្រជាប្រិយភាពមួយចំនួន ដើម្បីចែករំលែក ឬផ្ញើទៅកាន់អ្នកប្រើ ដោយមានបង្កប់នូវឃ្លាមួយចំនួន ដែលអនុញ្ញាតឱ្យមានការផ្ទេរសិទ្ធិគ្រប់គ្រង ប្រមូល និងផ្ទេរទិន្នន័យ។ ដូច្នេះ ដើម្បីការពារពីការវាយប្រហារផ្សេងៗ អ្នកប្រើប្រាស់គួរចំណាយពេលអាន និងស្វែងយល់ពីលក្ខខណ្ឌមួយចំនួន ដើម្បីចុចលើតំណភ្ជាប់ ឬទាញយកកម្មវិធីអ្វីមួយ។

ជារួម ចំណេះដឹងក្នុងការប្រើប្រាស់ប្រព័ន្ធឌីជីថល គឺពិតជាមានសារៈសំខាន់ ក្នុងការជួយការពារអ្នកប្រើប្រាស់ពីក្រុមអ្នកវាយប្រហារតាមអ៊ីនធឺណិត។ ដូច្នេះ យើងត្រូវរួបរួមសហការគ្នា ក្នុងការជំរុញឱ្យមានអប់រំអំពីចំណេះដឹងឌីជីថល ទៅកាន់​សាធារណជនឱ្យមានកាន់តែទូលំទូលាយ ដើម្បីធានាបានថា អ្នកប្រើប្រាស់បណ្ដាញឌីជីថល អាចការពារខ្លួនពីការវាយប្រហារ៕