សៀមរាម – ឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការ​ក្រសួងអប់រំ យុវជន និងកីឡា មានប្រសាសន៍ថា គុណភាពអប់រំរបស់សិស្សកើតពីសមត្ថភាពគ្រប់គ្រង និងការដឹកនាំរបស់នាយកសាលា ព្រមទាំងគុណភាពគ្រូបង្រៀន ។ ការពង្រឹងសមត្ថភាពនាយកសាលា និងគ្រូបង្រៀនបានល្អ ជួយឱ្យគុណភាពអប់រំរីកចម្រើន ព្រមទាំងដើរទាន់ល្បឿននៃបច្ចេកវិទ្យានៅក្នុងសង្គម ។

ឯកឧត្តមបណ្ឌិតសភាចារ្យ ណាត ប៊ុនរឿន មានប្រសាសន៍បញ្ជាក់ថា ក្លាយជានាយកសាលាជាមោទកភាពមួយសម្រាប់លោកគ្រូអ្នកគ្រូ ហើយនាយកសាលាត្រូវមានភារកិច្ចចម្បងចូលរួមពង្រឹងគុណភាពសិស្ស និងលទ្ធផលសិក្សារបស់សិស្សឱ្យបានប្រសើរជានិច្ច ។ ភាពជានាយកសាលាឆ្នើមត្រូវចេះទាក់ទាញចិត្តឱ្យបុគ្គលិកក្នុងអង្គភាពចូលរួមឱ្យសកម្ម ព្រមទាំងមានការចូលរួមពីអាជ្ញាធរមូលដ្ឋាន និងសហគមន៍ ។

ឯកឧត្តមបណ្ឌិតសភាចារ្យ ណាត ប៊ុនរឿន

“ដើម្បីបានលទ្ធផលសិក្សារបស់សិស្សល្អប្រសើរ តួអង្គដើរតួនាទីសំខាន់ជាងគេក្នុងវិស័យអប់រំ គឺគ្រូបង្រៀន ហើយគ្រូបង្រៀនល្អនេះហើយបង្កើតបានសិស្សល្អ… ថ្នាក់វិទ្យាល័យបើយើងទុកគ្រូត្រឹមថ្នាក់ទី១២ បូកពីរគឺទំពារមិនបែកទេ ព្រោះកម្មវិធីសព្វថ្ងៃគេនិយាយពីអាយធី ឌីជីថល និយាយពីបច្ចេកវិទ្យាអស់ហើយ ពិសេសកម្មវិធីសិក្សានិយាយពីស្ទែម (STEAM) ដូច្នេះគ្រូហ្វឹកហាត់ដុះខាត់បន្ត… ”

ទន្ទឹមគ្នានេះដែរ ឯកឧត្តមបណ្ឌិតសភាចារ្យ រដ្ឋលេខាធិការក្រសួងអប់រំ យុវជន និងកីឡា បានឱ្យដឹងទៀតថា កត្តាដែលនាំឱ្យការសិក្សារបស់សិស្សល្អប្រសើរ ហើយសាលារៀនផលិតសិស្សមានគុណភាព ត្រូវពឹងលើការចូលរួមពីភាគីសំខាន់ៗទាំងប្រាំ រួមមាន នាយកសាលា គ្រូបង្រៀន អាណាព្យាបាលសិស្ស សហគមន៍ និងសិស្សខ្លួនឯងផ្ទាល់ ។ ភាគីទាំប្រាំត្រូវទំនាក់ទំនងគ្នាឱ្យសកម្មនិងចូលរួមលើកកម្ពស់គុណភាពអប់រំ ។

គួរបញ្ជាក់ថា ក្រសួងអប់រំ យុវជន និងកីឡា កំពុងអនុវត្តគម្រោងកែលម្អការអប់រំចំណេះទូទៅ (GEIP) ដែលមានរយៈពេលអនុវត្តប្រាំឆ្នាំ ចាប់ពីឆ្នាំ២០២២ ដល់ឆ្នាំ២០២៦ ក្រោមការគាំទ្រពីថវិការួមគ្នារវាងឥណទានកម្ចីពីធនាគារពិភពលោក និងមូលនិធិសកលសម្រាប់ការអប់រំ GPE ។ គម្រោងនេះ បានបង្កើតឡើងដើម្បីបន្តគាំទ្រដល់កម្មវិធីកំណែទម្រង់វិស័យអប់រំ ជាពិសេសកំណែទម្រង់ការគ្រប់គ្រងសាលារៀន ។

ការរៀបចំគម្រោងកែលម្អការអប់រំចំណេះទូទៅ (GEIP) របស់ក្រសួងអប់រំ បានឆ្លើយតបទៅនឹងការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការកសាងមូលធនមនុស្សកម្ពុជា ដូចមានចែងនៅក្នុងយុទ្ធសាស្ត្រចតុកោណដំណាក់កាលទី៤ ព្រមទាំងឆ្ពោះទៅសម្រេចឱ្យបាននូវចក្ខុវិស័យកម្ពុជា នៅឆ្នាំ២០៣០ និង២០៥០ ។  គម្រោងក៏បានឆ្លើយតបទៅនឹងកំណែទម្រង់សំខាន់ៗ ដូចជា កំណែទម្រង់ការគ្រប់គ្រងហិរញ្ញវត្ថុសាធារណៈ កម្មវិធីកំណែទម្រង់វិមជ្ឈការ និងវិសហមជ្ឈការ និងកំណែទម្រង់រដ្ឋបាលសាធារណៈ ជាពិសេសក៏ជាមូលដ្ឋានគ្រឹះក្នុងការសម្រេចបាននូវគោលនយោបាយអប់រំទាំងពីររបស់ផែនការយុទ្ធសាស្ត្រវិស័យអប់រំ ២០១៩ – ២០២៣ ៕