ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល បានថ្លែងថា ក្រសួងសុខាភិបាល បានដាក់ចេញនៅយុទ្ធសាស្រ្ត អនុវត្តកាត់បន្ថយអត្រាមរណៈភាពមាតា និងទារក និងកង្វះអាហារូបត្ថម្ភ ដែលបានដាក់បញ្ចូលទៅក្នុងផែនការយុទ្ធសាស្រ្ត ដែលជាគោលដៅអទិភាពមួយក្នុងចំណោម គោលដៅអទិភាពទាំងបួននៃវិស័យសុខាភិបាល ដើម្បីធ្វើឱ្យប្រសើរឡើងនូវសុខភាពបន្តពូជ និងការកាត់បន្ថយអត្រាស្លាប់ទារក កុមារ ក៏ដូចជាបង្កើនអត្រាគ្របដណ្តប់ ការទទួលបាននូវសេវាអាហារូបត្ថម្ភ ក្នុងការកាត់បន្ថយបញ្ហាកង្វះថាមពល ប្រូតេអ៊ីន និងកង្វះសារធាតុ ក្នុងចំណោមស្រ្តី និងកុមារអាយុក្រោម៥ឆ្នាំ។
វេជ្ជបណ្ឌិត សោភ័ណនារី បន្ថែមថា ទោះកម្ពុជាបានសម្រេចវឌ្ឍនភាពជាច្រើនក្នុងការលើកកម្ពស់សុខភាពមាតា ទារក និងកុមារក៏ដោយ តែបើក្រឡេកមើលបញ្ហាកង្វះអាហាររូបត្ថមនៅកម្ពុជា គឺស្ថិតក្នុងការព្រួយបារម្ភ ពីសំណាក់រាជរដ្ឋាភិបាល ក៏ដូចជាអង្គការដៃគូអភិវឌ្ឍទាំងអស់គ្នាផងដែរ។
រដ្ឋលេខាធិការក្រសួងសុខាភិបាលបន្តថា ចាប់ពីឆ្នាំ២០១១ ក្រសួងសុខាភិបាល បានព្យាបាលកុមារកង្វះអាហាររូបត្ថម្ភ ស្រួចស្រាលធ្ងន់ធ្ងរ ចំនួនប្រហែល ៥ម៉ឺននាក់តាមរយៈសេវាព្យាបាលនៅមណ្ឌលសុខភាព និងមន្ទីរពេទ្យនានា ដោយបានកសាងសមត្ថភាពមន្រ្តីសុខាភិបាល ក្នុងការស្រាវជ្រាវកុមារស្គមស្គាំង ក៏ដូចជាធ្វើការព្យាបាល និងថែទាំកុមារទាំងនោះ។ ចាប់តាំងពីឆ្នាំ២០១៨មក រាជរដ្ឋាភិបាលកម្ពុជាបានចាប់ផ្តើមដាក់បន្ថែមថវិកាជាតិសម្រាប់ទិញអាហារព្យាបាលដល់កុមារកង្វះអាហាររូបត្ថម្ភស្រួចស្រាល់ ធ្ងន់ធ្ងរ រួមជាមួយកិច្ចសហការណ៍គ្នាជាមួយអង្គការយូនីសេហ្វក្នុងការជួយគាំទ្រនូវកញ្ចប់ថវិកាមួយនេះ។ តាមការប៉ានប្រមាណកម្ពុជាមានបញ្ហាកង្វះអាហាររូបត្ថម្ភប្រមាណ ៦ម៉ឺននាក់ ហើយនៅក្នុងចំណោមនោះ មានប្រមាណតែ១០ភាគរយប៉ុណ្ណោះដែលទទួលបានការព្យាបាល ។
“អ៊ីចឹងយើងឃើញថា យើងនៅមានគម្លាតជាច្រើនតទៅទៀតដែលត្រូវការយកចិត្តទុកដាក់ និងធ្វើការថែទាំព្យាបាល ក៏ដូចជាស្វែងរកកុមារកង្វះអាហាររូបត្ថម្ភនោះឱ្យទាន់ពេលវេលា”
– លោកជំទាវវេជ្ជបណ្ឌិត ប្រាក់ សោភ័ណនារី
បើតាមលោកជំទាវវេជ្ជបណ្ឌិត បច្ចុប្បន្នថវិកា របស់រាជរដ្ឋាភិបាល និងដៃគូអភិវឌ្ឍសម្រាប់ការព្យាបាលកុមារដែលមានការកង្វះអាហាររូបត្ថម្ភ ស្រួចស្រាលធ្ងន់ធ្ងរបានប្រហែលតែ១០ភាគរយប៉ុណ្ណោះ ដែលវានៅពុំទាន់អាចសម្រេចបានពេញលេញនូវគោលដៅក្នុងការព្យាបាលកុមារកង្វះអាហាររូបម្ភស្រួចស្រាល់ ធ្ងន់ធ្ងរប្រមាណ២.៥០០០ នាក់ ជារៀងរាល់ឆ្នាំ នៅត្រឹមឆ្នាំ២០២០នៅឡើយ។
យ៉ាងណាក៏ដោយដើម្បីចូលរួមចំណែកក្នុងការដោះស្រាយកង្វះអាហារូបត្ថម្ភស្រួចស្រាល់មធ្យម និងធ្ងន់ធ្ងរនៅកម្ពុជា អង្គការហេឡែន ខេលល័រ អន្តរជាតិ គាំទ្រដោយក្រសួងសុខាភិបាល បានចាប់ផ្តើមដាក់ឱ្យដំណើរការជាផ្លូវការនូវគម្រោងព្យាបាល និងថែទាំកុមារកង្វះអាហារូបត្ថម្ភស្រួចស្រាល់មធ្យម និងធ្ងន់ធ្ងរនៅក្នុងខេត្តគោលដៅចំនួន ៣ គឺខេត្តតាកែវ សៀមរាប និងកំពង់ឆ្នាំង ដោយមានរយៈពេលប្រាំឆ្នាំចាប់ពីឆ្នាំ២០២៣ រហូតដល់ឆ្នាំ២០២៧ ហើយតាមរយៈការដាក់ដំណើរការគម្រោងខាងលើនេះ គេរំពឹងថា នឹងជួយកាត់បន្ថយកម្រិតនៃកង្វះអាហារូបត្ថម្ភក្នុងចំណោមកុមារកម្ពុជា នាំពួកគេឱ្យមានសុខភាពល្អ មានប្រាជ្ញាឆ្លាតវាងវៃ មាន IQ ខ្ពស់ និងជួយកាត់បន្ថយអត្រាមរណៈភាពកុមារកម្ពុជាថែមទៀត៕
