ភ្នំពេញ – ក្នុងសេចក្តីណែនាំចុះថ្ងៃទី១១ ខែមេសា ក្រសួងអប់រំ យុវជន និង​កីឡា បានកំណត់យក​ថ្ងៃទី០៦ ខែវិច្ឆិកា ឆ្នាំ​២០២៣ ជាសម័យប្រឡងសញ្ញាបត្រមធ្យមសិក្សា​ទុតិយភូមិ ឬបាក់ឌុប​ សម្រាប់ឆ្នាំសិក្សា​២០២២-២០២៣។

បើយោង​តាម​សេចក្តីណែនាំនោះ ការទទួលពាក្យ​សុំ​ចុះ​ឈ្មោះប្រឡងសញ្ញាបត្រមធ្យមសិក្សា​ទុតិយភូមិ នឹង​ធ្វើ​ឡើង​នៅ​តាម​វិទ្យាល័យ ដោយ​ចាប់ផ្តើមពីថ្ងៃទី០១ ដល់ថ្ងៃទី៣១ ខែឧសភា ឆ្នាំ​២០២៣ ។ ចំពោះបេក្ខជនដែលដាក់ពាក្យប្រឡង ត្រូវ​បំពេញ​សំណុំ​លិខិតមួយ​ចំនួនដូចជា ពាក្យ​សុំ​ចុះឈ្មោះប្រឡង​របស់បេក្ខជន​ចំនួន១ច្បាប់ (បំពេញដោយដៃបេក្ខជនផ្ទាល់), វិញ្ញាបនបត្របណ្តោះអាសន្នមធ្យមសិក្សា​បឋមភូមិ​ចំនួន ១សន្លឹក (ច្បាប់ថតចម្លង), សំបុត្រ​កំណើត ឬសំបុត្រ​បញ្ជាក់កំណើត ឬសេចក្តីចម្លងសំបុត្រ​កំណើត ឬសេចក្តីចម្លង​សំបុត្រ​បញ្ជាក់​កំណើត ចំនួន១សន្លឹក (ច្បាប់ថតចម្លង), បង្កាន់ដៃបង់សិទ្ធិប្រឡង ចំនួន១សន្លឹក និង​សៀវភៅសិក្ខាគារិក (ចំពោះសិស្សសាលាឯកជន)។

ក្នុងនោះដែរ សម្រាប់បេក្ខភាពប្រឡង ក៏ចាំបាច់ត្រូវមានលក្ខខណ្ឌដូចជា ៖ បានប្រឡងជាប់សញ្ញាបត្រមធ្យមសិក្សា​បឋមភូមិ, បានរៀនគ្រប់កម្រិតថ្នាក់​នៅមធ្យម​សិក្សា​ទុតិយភូមិ, បាន​រៀនចប់កម្មវិធី​សិក្សា​ថ្នាក់ទី១២, បានគោរពត្រឹមត្រូវ​តាមបទបញ្ជា​ផ្ទៃក្នុង​សម្រាប់គ្រឹះស្ថានមធ្យមសិក្សា, ត្រូវ​បាន​វាយតម្លៃផ្នែក​សីលធម៌​ប្រចាំឆ្នាំ ចាប់ពីមធ្យមឡើងទៅ និងមានមធ្យមភាគ​ពិន្ទុ​ប្រចាំឆ្នាំ​ចាប់ពី ២៥.០០ឡើងទៅ។

ដោយឡែកបេក្ខភាពដែលអាចនឹងត្រូវ​លុប​ឈ្មោះចេញវិញ ឬមិនអនុញ្ញាតឱ្យ​ចុះឈ្មោះប្រឡង គឺផ្អែកទៅលើករណីមួយចំនួនដូចជា ៖ សិស្សមានមធ្យម​ភាគពិន្ទុប្រចាំឆ្នាំក្រោម ២៥.០០ , សិស្សគ្មានមធ្យមភាគពិន្ទុ​ប្រឡង​ឆមាស, ឈប់ឥតច្បាប់​ក្នុងពេល​ប្រឡងឆមាស​មុខវិជ្ជាណាមួយ, ឈប់មានច្បាប់​ក្នុងពេលប្រឡងឆមាសចាប់ពី ៣មុខ​វិជ្ជាឡើងទៅ, សិស្សអវត្តមានឥតច្បាប់​លើសពី​៣០ដងឡើងទៅ, អវត្តមានឥតច្បាប់ និងមានច្បាប់​លើសពី ៤០ដងឡើងទៅ, អវត្តមានមានច្បាប់លើសពី ៥៥ដងឡើងទៅ ដោយអវត្តមានសិស្សថ្នាក់ទី១២ គិតត្រឹម ថ្ងៃទី០២ ខែកញ្ញា ឆ្នាំ​២០២៣។

យ៉ាងណាក៏ដោយ ដើម្បីឱ្យ​បញ្ជៀសបាន​នូវ​បាតុភាព និង​ភាពអសកម្ម​ក្នុង​ការ​លុបបេក្ខភាព នៅ​តាមគ្រឹះស្ថានមធ្យមសិក្សា ក្រសួងអប់រំ​បាន​កំណត់​ឱ្យ​ នាយក នាយិកា​គ្រឹះស្ថាន​មធ្យមសិក្សា ត្រូវ​បើក​ការប្រជុំ​ក្រុមប្រឹក្សា​វិន័យ​សិក្សា ដោយ​មាន​កំណត់ហេតុប្រជុំ និង​បញ្ជីវត្តមានច្បាស់លាស់, រួសរាន់បិទផ្សាយ​បញ្ជិដកបេក្ខភាពប្រឡង ដែលបានសម្រេច​ក្នុង​កិច្ច​ប្រជុំ​ក្រុមប្រឹក្សាវិន័យសិក្សា នៅ​លើ​បញ្ជរព័ត៌មាន​នៅមុខ​ទីចាត់ការសាលាប្រកបដោយស្មារតីទទួលខុសត្រូវ មុន​នឹង​បញ្ជូន​មកក្រសួងតាមកាលកំណត់, កោះប្រជុំក្រុមប្រឹក្សាវិន័យ​សិក្សា​ជាថ្មី ដើម្បី​ពិនិត្យ និង​សម្រេច ក្នុងករណីមានការប្តឹងតវ៉ា ដែលមានហេតុផល​ច្បាស់លាស់លើ​ការ​លុប​បេក្ខភាពប្រឡងនេះ៕