ការទទួលបានតួនាទីថ្មី មិនថាតាមរយៈការប្រូម៉ូត ការផ្លាស់ប្ដូរក្រុមហ៊ុន ឬទទួលយកការងារថ្មីនៅកន្លែងការងារដែលកំពុងធ្វើបច្ចុប្បន្ននោះទេ គឺសុទ្ធតែអាចជំរុញ និងលើកកម្ពស់អាជីពរបស់បុគ្គលម្នាក់បានឆាប់រហ័ស ។ ទោះជាយ៉ាងណាក៏ដោយ នៅក្នុងបរិយាកាសការងារ ដែលមានការសហការគ្នាខ្លាំង និងមានការផ្លាស់ប្ដូរបរិយាកាសជាប្រចាំ បានធ្វើឱ្យការផ្លាស់ប្ដូរប្រកបដោយភាពជោគជ័យ មានលក្ខណៈតានតឹងជាងកាលពីអតីតកាល ។ សូម្បីតែចំពោះបុគ្គលដែលមានជំនាញច្បាស់លាស់ និងឧស្សាហ៍ព្យាយាមខ្លាំងក៏ដោយ។ ដូច្នេះ ទាមទារឱ្យបុគ្គលិកមានការប្តេជ្ញាចិត្តខ្ពស់ និងមានភាពបត់បែន សម្រាប់ការរីកចម្រើនអាជីពរបស់បុគ្គលម្នាក់ៗ និងភាពជោគជ័យរបស់ក្រុមហ៊ុន។ ខាងក្រោមនេះ គឺជាវិធីបីយ៉ាង ដើម្បីធានាបាននូវការសម្របខ្លួនដោយរលូន។

១. ស្វែងយល់ពីដំណើរការរបស់ក្រុមហ៊ុន ៖​ នៅពេលដែលតួនាទីថ្មីត្រូវបានបង្កើតឡើងក្នុងអង្គភាពមួយ វាអាចទៅរួចដែលរ​បៀបធ្វើការចាស់ ត្រូវបានជំនួសដោយរបៀ​បថ្មីមួយ ដើម្បីបំពេញគោលបំណងយុទ្ធសាស្ត្រថ្មី ដែលបង្កើតឡើងដោយសារនិន្នាការទីផ្សារដែលកំពុងរីកចម្រើន, ការរីកចម្រើនបច្ចេកវិទ្យា និងបទបញ្ញាត្តិថ្មីៗ។ នៅពេលណាដែលរបៀបធ្វើការថ្មីត្រូវបានណែនាំក្នុងអង្គភាព វាមានសក្តានុពលក្នុងការជះឥទ្ធិពលដល់សីលធម៌នៅកន្លែងធ្វើការ។ ដំណើរការថ្មី អាចកែប្រែការប្រតិបត្តិភារកិច្ច និងការរៀបចំរចនាសម្ព័ន្ធឡើងវិញ។ ដូច្នេះ វាពិតជាសំខាន់ដែលអ្នកត្រូវស្វែងយល់ពីរបៀបធ្វើការក្នុងអង្គភាពឱ្យបានច្បាស់ ដើម្បីធ្វើការប្រកបដោយទំនុកចិត្ត និងងាយស្រួលប្រាស្រ័យទាក់ទងជាមួយក្រុមការងារ។

២. ប្រមូលព័ត៌មានអំពីវប្បធម៌ក្រុមហ៊ុន ៖ ពេលខ្លះបញ្ហាដែលកើតឡើងនៅពេលកាន់តួនាទីថ្មីមិនទាក់ទងនឹងជំនាញរបស់បុគ្គលនោះទេ។ ប៉ុន្តែវប្បធម៌កន្លែងការងារដើរតួ​នាទីយ៉ាងធំ លើរបៀបដែលបុគ្គលទទួលបានអារម្មណ៍ផាសុកភាពនៅក្នុងក្រុមហ៊ុន។ ភាពជោគជ័យនាពេលអនាគតនៅក្នុងក្រុមហ៊ុនមួយ ពឹងផ្អែកលើឥទ្ធិពលដែលផលិតភាពការងាររបស់បុគ្គលិកដែលពួកគេអាចសម្របខ្លួនទៅក្នុងបរិយាកាសការងារដែលក្នុងកំពុងធ្វើការ។ ដូច្នេះហើយ វាពិតជាមានសារៈសំខាន់ណាស់ ដែលអ្នកត្រូវស្វែងយល់ពីវប្បធម៌ក្នុងក្រុមហ៊ុន និងមានសមត្ថភាពសម្របខ្លួនបានល្អដើម្បីភាពជោគជ័យក្នុងអាជីពខ្លួនឯង និងវឌ្ឍនភាពក្រុមហ៊ុន។

៣. រៀនជំនាញថ្មី និងស្វែងរកការបណ្ដុះបណ្ដាលជាប្រចាំ ៖ យោងតាមការស្ទង់មតិរបស់ PwC’s 2023 Hopes and Fears បានឱ្យដឹងថា បុគ្គលិកប្រមាណ ៥៤,០០០ នាក់ នៅ ៤៦ប្រទេស និង ៥៨ភាគរយ នៃបុគ្គលិកដែលបានចូលរួមស្ទង់មតិលើកឡើងថា ក្នុងរយៈពេល៥ឆ្នាំខាងមុខ នឹងមានការប្រែប្រួលយ៉ាងខ្លាំងទៅលើជំនាញរបស់ពួកគេ។ ដូច្នេះ បុគ្គលិក ត្រូវតែទទួលបានការបណ្ដុះបណ្ដាលជាបន្តបន្ទាប់ ដើម្បីអភិវឌ្ឍចំណេះដឹងរបស់ខ្លួនជាប្រចាំ ហើយជៀសវៀងពីការតាមមិនទាន់ការវិវត្តន៍នៃទីផ្សារការងារ។ ទន្ទឹមនឹងនេះ គេសង្កេតឃើញថា ការផ្លាស់ប្ដូរខ្លាំង និងរហ័សជាងគេ គឺស្ថិតនៅក្នុងវិស័យ បច្ចេកវិទ្យា, សុវត្ថិភាពអ៊ីនធឺណិត, ការអប់រំ, ធនាគារ, ការលក់រាយ និងសុខាភិបាល។ ដូច្នេះ អ្នកធ្វើការក្នុងវិស័យទាំងនេះ ត្រូវតែមានភាពប្រុងប្រយ័ត្ន និងបន្តអភិវឌ្ឍសមត្ថភាពរបស់ខ្លួជាប់ជានិច្ច៕