ភ្នំពេញ – ក្នុងឱកាសកម្ពុជាធ្វើជាម្ចាស់ផ្ទះរៀបចំព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេមលើកទី១២ ខាងមុខនេះ ប្រជាពលរដ្ឋកម្ពុជា ជាពិសេសយុវជន ត្រូវរក្សាឥរិយាបទថ្លៃថ្នូរ យកចិត្តទុកដាក់លើសណ្ដាប់ធ្នាប់សាធារណៈ អនាម័យ តាមទីក្រុង និងទីជនបទ ឱ្យមានសោភ័ណភាពល្អ។ នេះជាប្រសាសន៍​លើក​ឡើង​របស់​លោកបណ្ឌិត យង់ ពៅ អគ្គលេខាធិការ នៃរាជបណ្ឌិតសភាកម្ពុជា ។

លោកបណ្ឌិត យង់ ពៅ បញ្ជាក់បន្ថែមថា សម្រាប់ព្រឹត្តិការណ៍ជាប្រវត្តិសាស្រ្តនេះ យើងទាំងអស់គ្នាត្រូវប្រកាន់ឥរិយាបទប្រកបដោយសីលធម៌ល្អ ជាមរតកខ្មែរអង្គរដែលជាប្រទេសមានអារិយ្យធម៌ខ្ពង់ខ្ពស់រាប់ពាន់ឆ្នាំ ប៉ុន្តែដោយសារសង្គ្រាមធ្វើឱ្យសីលធម៌របស់យើងធ្លាក់ចុះទៅវិញ។ ដូច្នេះ កូនខ្មែរត្រូវតែលើកតម្លៃសីលធម៌ខ្មែរមកវិញ បង្ហាញនៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេមលើកទី១២ តាមរយៈការរក្សាសណ្ដាប់ធ្នាប់ អនាម័យ និងគោរពច្បាស់ចរាចរណ៍ជាដើម។

  លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជា

“ខ្ញុំតែងតែសង្កត់ធ្ងន់ទៅលើអនាម័យសណ្ដាប់ធ្នាប់ នេះជាកិច្ចការសំខាន់ដែលយើងត្រូវតែបង្ហាញ ដើម្បីកុំឱ្យភ្ញៀវអន្តរជាតិចូលមកដល់ទីក្រុងភ្នំពេញ ស្រាប់តែឃើញសណ្ដាប់ធ្នាប់រញ៉េរញ៉ៃ សំរាមពាសវាលពាសកាល ការហូបចុកមិនចេះរៀបចំដោយខ្លួនឯង ចរាចររញ៉េរញ៉ៃជាដើម”

អគ្គលេខាធិការ នៃរាជបណ្ឌិត្យសភាកម្ពុជា បន្តថា ព្រឹត្តិការណ៍ នៃការប្រកួតកីឡាទាំងពីរនេះ ពិតជាមានតម្លៃខ្លាំងណាស់សម្រាប់កម្ពុជា ទាំងរូបភាពកីឡា រូបភាពកាទូត រូបភាពនយោបាយ សេដ្ឋកិច្ចពាណិជ្ជកម្មជាដើម។ លើសពីនេះ កម្ពុជាអាចបញ្ចូលកីឡាគុនខ្មែរឱ្យពិភពលោកបានស្គាល់ និងបានបង្ហាញពីចរន្តសេដ្ឋកិច្ចកម្ពុជាខណៈរាជរដ្ឋាភិបាលលើកលែងមិនយកថ្លៃផ្សាយបន្តផ្ទាល់ លើកលែងថ្លៃសំបុត្រទស្សនា និងថ្លៃស្នាក់នៅរបស់ប្រតិភូកីឡា។ ក្នុងនោះ បើទោះជាកម្ពុជាមិនទទួលបានមេដាយមាស មេដាយសំរិទ្ធិ មេដាយប្រាក់ ច្រើនយ៉ាងណាក៏ដោយ ក៏ប៉ុន្តែវាជាមោទនភាពកីឡារបស់យើងក្នុងការចូលរួមក្នុងភាពជាម្ចាស់ផ្ទះ។

ជាមួយ​គ្នានេះដែរ លោកបណ្ឌិត យង់ ពៅ ក៏បានអំពាវនាវដល់អាជ្ញាធរមានសមត្ថកិច្ច ត្រូវតែពង្រឹងការគោរពច្បាប់ចរាចរណ៍ សណ្ដាប់ធ្នាប់អនាម័យ រួមទាំងការកាត់បន្ថយការផ្សព្វផ្សាយផលិតផលគ្រឿងស្រវឹងគ្រប់ទម្រង់ គ្រប់រូបភាព ដោយមិនគួរផ្សាយផ្ទាំងប៉ាណូធំៗពីគ្រឿងស្រវឹងនោះទេ ដោយ​គួរតែផ្សព្វផ្សាយផលិតផលខ្មែរ ប្រាសាទខ្មែរ ធម្មជាតិខ្មែរ ឬអ្វីដែលល្អៗនៅក្នុងផ្ទាំងប៉ាណូទាំងនោះវិញ។

គួរជម្រាបជូនថា ប្រទេសកម្ពុជានឹងធ្វើជាម្ចាស់ផ្ទះរៀបចំព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេមលើកទី១២ នៅដើមខែឧសភា និងដើមខែមិថុនា ខាងមុខនេះ ។ សម្រាប់ព្រឹត្តិការណ៍​កីឡាទាំងពីរនេះ រាជរដ្ឋាភិបាលកម្ពុជា បានប្រកាស​មិន​ទទួល​យក​ប្រាក់​កម្រៃ ឬថ្លៃសេវារបស់ប្រតិភូកីឡា សម្រាប់ការហូបចុក-ស្នាក់នៅ ព្រមទាំងផ្ដល់សំបុត្រចូលរួមទស្សនាដោយឥតគិតថ្លៃ ក្នុង​បំណង​ចម្បង​ជំរុញ​ឱ្យ​ព្រឹត្តិការណ៍​កីឡា​ទាំង​មូល​នៅ​កម្ពុជា ​ទទួលបានភាពកក់ក្តៅ និងជោគជ័យទាំងអស់គ្នា៕