ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – នៅសល់ប្រមាណ២សប្តាហ៍ទៀតប៉ុណ្ណោះ ព្រឹត្តិការណ៍ នៃការប្រកួតកីឡាអាស៊ីអាគ្នេយ៍លើកទី៣២ ដែលកម្ពុជាធ្វើជាម្ចាស់ផ្ទះនឹងឈានមកដល់ ក្នុងនោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានធ្វើការអំពាវនាវដល់បងប្អូនប្រជាពលរដ្ឋទាំងអស់ ជាពិសេសអ្នករស់នៅរាជធានីភ្នំពេញ ចូលរួមទទួលភ្ញៀវសម្រាប់ព្រឹត្តិការណ៍ប្រវត្តិសាស្រ្តមួយនេះ។
សម្តេចតេជោមានប្រសាសន៍ថា នៅសល់តែ១៥ថ្ងៃទៀតប៉ុណ្ណោះ ស៊ីហ្គេម នឹងចូលមកដល់ ដូច្នេះ សូមបងប្អូនប្រជាពលរដ្ឋចូលរួមទាំងអស់គ្នាដើម្បីទទួលភ្ញៀវរបស់យើង។ សម្តេចបន្តថា ភ្ញៀវរបស់យើងនៅឆ្នាំនេះ យើងធ្វើខុសប្លែកពីគេ ដោយកីឡាករដែលចូលរួមប្រកួតស៊ីហ្គេមទាំងអស់នឹងមិនតម្រូវឱ្យបង់ថ្លៃដូចប្រទេសដទៃធ្លាប់យកនោះទេ ។ សម្តេចនាយករដ្ឋមន្រ្តីបញ្ជាក់ថា ទោះបីលក្ខន្តិកៈតម្រូវ ក៏ប៉ុន្តែកម្ពុជាជាប្រទេសតូច ប៉ុន្តែបេះដូងធំ។
សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា
” ឥឡូវកម្ពុជាទទួលកីឡាករដែលចូលរួមប្រកួតស៊ីហ្គេមដោយមិនមានការបង់ថ្លៃដូចប្រទេសដទៃធ្លាប់យកនោះទេ… “
ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិ CAMSOC-CAMAPGOC មានប្រសាសន៍ថា ការសម្រេចដ៏ខ្ពង់ខ្ពស់របស់សម្តេចតេជោនាយករដ្ឋមន្រ្តី ហ៊ុន សែន ថា ប្រតិភូកីឡាមកពីបណ្តាប្រទេសអាស៊ីអាគ្នេយ៍ទាំងអស់ នឹងមិនបង់ថ្លៃចំនួន ៥០ដុល្លារក្នុងម្នាក់ៗ ក្នុង១ថ្ងៃៗ ដល់ម្ចាស់ផ្ទះកម្ពុជានោះ ជាការសម្រេចចិត្តដ៏វិសេសវិសាលមួយមិនធ្លាប់មានក្នុងប្រវត្តិស៊ីហ្គេម ហើយក្នុងនាមជាម្ចាស់ផ្ទះ នឹងគោរពនូវការសម្រេចចិត្តដ៏ខ្ពង់ខ្ពស់របស់ថ្នាក់ដឹកនាំរាជរដ្ឋាភិបាលកម្ពុជា។
គួរបញ្ជាក់ថា នៅឆ្នាំ២០២៣នេះ កម្ពុជានឹងធ្វើជាម្ចាស់ផ្ទះនៃព្រឹត្តិការណ៍កីឡាធំៗចំនួន២ គឺព្រឹត្តិការណ៍កីឡាស៊ីហ្គេមលើកទី៣២ និងព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ។ ក្នុងនោះ ព្រឹត្តិការណ៍កីឡាស៊ីហ្គេមលើកទី៣២ នឹងមានប្រទេសចំនួន១១ចូលរួមប្រកួតប្រជែងលើប្រភេទកីឡាចំនួន៣៧ ស្មើនឹង ៥៨១វិញ្ញាសា ដែលត្រូវបានអនុម័តដោយក្រុមប្រឹក្សាសហព័ន្ធកីឡាអាស៊ីអាគ្នេយ៍ ហើយព្រឹត្តិការណ៍ស៊ីហ្គេមនេះ នឹងដំណើរការជាផ្លូវការ ពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣។
ចំណែកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ សម្រាប់ក្រុមអត្តពលិកជនពិការ នឹងដំណើរការជាផ្លូវការពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣ ដោយមាន១៣ប្រភេទកីឡាស្មើនឹង ៤៣១វិញ្ញាសា។
យោងតាមរបាយការណ៍របស់ គណៈកម្មាធិការជាតិ CAMSOC-CAMAPGOC បានឱ្យដឹងថា ប្រតិភូកីឡាទាំង១១ប្រទេសរួមទាំងម្ចាស់ផ្ទះកម្ពុជា ដែលត្រៀមចូលរួមប្រកួតប្រជែងយកមេដាយស៊ីហ្គេម និងអាស៊ានប៉ារ៉ាហ្គេម ដែលជាប្រវត្តិសាស្ត្រលើកដំបូងនៅកម្ពុជានេះ មានចំនួនសរុប១២៤០៤នាក់៕
