ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្រាប់ថ្ងៃនៃក្តីស្រឡាញ់ ១៤ កុម្ភៈ ក្រសួងកិច្ចការនារី បានធ្វើការអំពាវនាវដល់ប្រជាពលរដ្ឋ ជាពិសេសយុវជន យុវនារី កុំយកទិវានេះ មកប្រើជាឱកាសដើម្បីធ្វើសកម្មភាពទាំងឡាយណាដែលនាំឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់បុគ្គលណាម្នាក់។
បើតាមក្រសួងកិច្ចការនារី ទិវានៃក្តីស្រឡាញ់ គឺជាព្រឹត្តិការណ៍អន្តរជាតិ ដែលបង្ហាញនូវគុណតម្លៃនៃការគោរព ស្រឡាញ់ និងដឹងគុណដល់មនុស្សដែលមានតម្លៃចំពោះយើង ដូចជា ជីដូនជីតា ឪពុកម្តាយ អាណាព្យាបាល ស្វាមីភរិយា បងប្អូន លោកគ្រូអ្នកគ្រូ និងមិត្តភក្តិ។ល។ សេចក្តីស្រឡាញ់អាចបង្ហាញចេញតាមរយៈការយកចិត្តទុកដាក់ និងការឱ្យតម្លៃគ្នាទៅវិញទៅមកប្រកបដោយព្រហ្មវិហារធម៌។
ក្នុងឱកាសនេះ ក្រសួងកិច្ចការនារី បានអំពាវនាវដល់យុវជនទាំងអស់ សូមចូលរួមអបអរសាទរដោយគោរព និងថែរក្សាវប្បធម៌ប្រពៃណីដ៏ល្អផូរផង់របស់កម្ពុជា ដែលដូនតាខ្មែរយើងបានបន្សល់ទុកដល់កូនចៅជំនាន់ក្រោយ។
“សូមយុវវ័យគ្រប់រូបចងចាំថា សេចក្តីស្រឡាញ់មិនដែលធ្វើឱ្យប៉ះពាល់ដល់សេចក្តីថ្លៃថ្នូរ និងតម្លៃបុគ្គលជាទីស្រឡាញ់របស់យើងឡើង ហើយយើងត្រូវតែមានសេចក្តីស្រឡាញ់ពិតប្រាកដ និងស្មោះត្រង់ចំពោះពួកគាត់”
ជាមួយគ្នានេះក្រសួងកិច្ចការនារី បានលើកឡើងថា សេចក្តីស្រឡាញ់ គឺជាកម្លាំងនៃសេចក្តីល្អ សូមឱ្យសេចក្តីស្រឡាញ់មាននៅក្នុងបុគ្គលម្នាក់ៗ និងចែករំលែកក្តីស្រឡាញ់នេះចំពោះក្រុមគ្រួសារ លោកអ្នកមានគុណ និងដៃគូ ដើម្បីលើកស្ទួយអារ្យធម៌ដ៏ល្អផូរផង់របស់សង្គមជាតិយើង៕
