ភ្នំពេញ- ក្រសួងសង្គមកិច្ច អតីតយុទ្ធជន និងយុវនីតិសម្បទា នឹងធ្វើការប្រឡងជ្រើសរើសសិស្ស និស្សិត និងមន្ត្រីរាជការស៊ីវិល ឱ្យចូលបម្រើការងារក្នុងក្របខណ្ឌក្រសួងសង្គមកិច្ច អតីតយុទ្ធជន និងយុវនីតិសម្បទា សម្រាប់ឆ្នាំ២០២៣ ចំនួន ១៣កន្លែង។

ប្រភេទក្របខណ្ឌ ក រួមមាន ទី១. ទីស្តីការក្រសួង ជ្រើសរើសចំនួន ៣កន្លែង, ទី២. មន្ទីរសង្គមកិច្ច អតីតយុទ្ធជន និងយុវនីតិសម្បទា រាជធានី ខេត្ត ជ្រើសរើសចំនួន ១០កន្លែង ក្នុងនោះ ខេត្តតាកែវ ចំនួន ១កន្លែង, ខេត្តសៀមរាប ចំនួន ២កន្លែង, ខេត្តប៉ៃលិន ចំនួន ១កន្លែង,ខេត្តកំពង់ចាម ចំនួន ១កន្លែង, ខេត្តព្រៃវែងចំនួន ១កន្លែង, ខេត្តពោធិ៍សាត់ចំនួន ១កន្លែង, ខេត្តកំពង់ឆ្នាំង ចំនួន ១កន្លែង និងខេត្តបាត់ដំបងចំនួន ២កន្លែង។ កម្រិតបណ្តុះបណ្តាលចាប់ពីបរិញ្ញាបត្រឡើងទៅ។

លក្ខខណ្ឌនៃការជ្រើសរើស បេក្ខជនត្រូវមានសញ្ជាតិខ្មែរ, លក្ខខណ្ឌអាយុគិតត្រឹមថ្ងៃប្រឡង ចំពោះមន្ត្រីរាជការស៊ីវិល ត្រូវបានលើកលែងលក្ខខណ្ឌអាយុ។ ក្រោយពេលប្រឡងជាប់ជាស្ថាពរ ហើយត្រូវបានរៀបចំផ្ទេរក្របខណ្ឌទៅកន្លែងថ្មី ដោយរក្សាអតីតភាពការងារប៉ុន្តែមិនរក្សាមុខតំណែងគ្រប់គ្រងទេ។ បេក្ខជនដែលមានសញ្ញាបត្រថ្នាក់បណ្ឌិត ឬសញ្ញាបត្រសមមូល ត្រូវបានលើកលែង។ បេក្ខជនដែលមានសញ្ញាបត្របរិញ្ញាបត្រជាន់ខ្ពស់ ឬសញ្ញាបត្រសមមូល ត្រូវមានអាយុមិនលើសពី ៤០ឆ្នាំ បេក្ខជនដែលមានសញ្ញាបត្របរិញ្ញាបត្រ ឬសញ្ញាបត្រសមមូល ត្រូវមានអាយុមិនលើសពី៣៥ឆ្នាំ។

ជាមួយគ្នានេះ បេក្ខជនមិនប្រាសចាកសិទ្ធិខាងផ្លូវរដ្ឋប្បវេណី ព្រហ្មទណ្ឌ សិទ្ធិពលរដ្ឋ និងសិទ្ធិខាងនយោបាយ, បេក្ខជនជាស្ត្រី ជនមានពិការភាព និងជនជាតិដើមភាគតិច ត្រូវបានផ្តល់អាទិភាព និងលើកទឹកចិត្ត, បេក្ខជនមានសញ្ញាបត្របញ្ចប់ការសិក្សាពីបរទេស ឬសញ្ញាបត្រជាភាសាបរទេស ត្រូវបញ្ជាក់ជាភាសាជាតិ ដោយមានការទទួលស្គាល់ពីក្រសួងអប់រំ យុវជន និងកីឡា។

សម្រាប់សំណុំលិខិតដែលត្រូវបំពេញសុំសិទ្ធិប្រឡង រួមមាន សំណុំលិខិតដាក់ពាក្យប្រឡង ចំនួន ០១ ច្បាប់ ដោយបេក្ខជនត្រូវភ្ជាប់មកជាមួយនូវ សញ្ញាបត្រជំនាញ (បញ្ជាក់ជាផ្លូវការ)ចំនួន ០១ ច្បាប់, សញ្ញាបត្រមធ្យមសិក្សាទុតិយភូមិ (បញ្ជាក់ជាផ្លូវការ)ចំនួន ០១ ច្បាប់, សេចក្តីថតចម្លងសំបុត្រកំណើតចំនួន ០១ ច្បាប់,  រូបថតថ្មី ៤x៦ចំនួន៣សន្លឹក, លិខិតថ្កោលទោស ( ក្រោយពេលប្រឡងជាប់)ចំនួន ០១ ច្បាប់, លិខិតបញ្ញាក់សុខភាព (ក្រោយពេលប្រឡងជាប់)ចំនួន ០១ ច្បាប់, អត្តសញ្ញាណប័ណ្ណថតចម្លង ចំនួន ០១ ច្បាប់ និងលិខិតអនុញ្ញាតពីប្រធានក្រសួង ស្ថាប័ន (ជាមន្ត្រីរាជការស៊ីវិល)ចំនួន ០១ ច្បាប់។

ចំពោះវិញ្ញាសាប្រឡង ទី១. ចំណេះដឹងទូទៅពាក់ព័ន្ធនឹងវិស័យសង្គមកិច្ច អតីតយុទ្ធជន និងយុវនីតិសម្បទា និងវិស័យមុខងារសាធារណៈនៅកម្ពុជា មានរយៈពេល ៩០នាទី។ ទី២. ភាសាអង់គ្លេសនិងកុំព្យូទ័រ មានរយៈពេល ៩០នាទី។

ទទួលពាក្យចាប់ពីថ្ងៃទី១៥ ខែកុម្ភៈ ឆ្នាំ២០២៣ តទៅ ព្រឹកម៉ោង ០៨:០០-១១:៣០ និងពេលរសៀលម៉ោង ១៤:០០-១៧:០០ ឈប់ទទួលពាក្យនៅថ្ងៃទី១៥ ខែមីនា ឆ្នាំ២០២៣ វេលាម៉ោង ១៧:០០នាទី។ ចំពោះព័ត៌មានលម្អិត បេក្ខជនអាចមកសាកសួរនៅនាយកដ្ឋានរដ្ឋបាលនិងបុគ្គលិក នៃក្រសួងសង្គមកិច្ច អតីតយុទ្ធជន និងយុវនីតិសម្បទារៀងរាល់ម៉ោងធ្វើការ៕