ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – នាឱកាសចុះពិនិត្យដំណើរការចាក់វ៉ាក់សាំងកូវីដ-១៩ ដូសជំរុញដូសទី៦ នៅតាមសាលារៀនក្នុងភូមិសាស្ដ្ររាជធានីភ្នំពេញកាលពីព្រឹកថ្ងៃចន្ទ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានអំពាវនាវដល់ឪពុកម្ដាយ និងអ្នកអាណាព្យាបាលសិស្សទាំងអស់ កុំព្រួយបារម្ភអំពីគុណភាព និងផលប៉ះពាល់របស់វ៉ាក់សាំងបង្ការជំងឺកូវីដ-១៩ ដែលកម្ពុជាកំពុងប្រើប្រាស់នាពេលបច្ចុប្បន្ន ។ វ៉ាក់សាំងបង្ការជំងឺកូវីដ-១៩ នៅកម្ពុជាទទួលស្គាល់ពីអង្គការសុខភាពពិភពលោក (WHO) ។
លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ១៩ ក្របខ័ណ្ឌទូទាំងប្រទេស បានបញ្ជាក់ថា តាមការសង្កេតជាក់ស្ដែងកន្លងទៅ សិស្សានុសិស្សមួយចំនួនបានចាក់វ៉ាក់សាំងត្រឹមត្រូវតាមពេលវេលាកំណត់ ប៉ុន្ដែក៏មានសិស្សានុសិស្សមួយចំនួនទៀតបានអាក់ខានចាក់វ៉ាក់សាំង ដោយសារអាណាព្យាបាលមិនអនុញ្ញាត និងមិនបានណែនាំឱ្យកូនៗ ទៅចាក់វ៉ាក់សាំងតាមកាលកំណត់ក្រោមហេតុផលផ្សេងៗ ។
ទន្ទឹមគ្នានេះ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល មានប្រសាសន៍បញ្ជាក់បន្ថែមថា “ខ្ញុំសូមអំពាវនាវដល់មាតា បិតា និងអាណាព្យាបាលរបស់សិស្សនៅទូទាំងព្រះរាជាណាចក្រកម្ពុជា សូមកុំមានការព្រួយបារម្ភលើបញ្ហាវ៉ាក់សាំង ព្រោះវ៉ាក់សាំងកូវីដ-១៩ ដែលយើងប្រើប្រាស់បច្ចុប្បន្ន គឺជាវ៉ាក់សាំងដែលទទួលស្គាល់ត្រឹមត្រូវពីអង្គការសុខភាពពិភពលោក” ។
បើតាមលោកជំទាវវេជ្ជបណ្ឌិត រដ្ឋលេខាធិការក្រសួងសុខាភិបាល បានឱ្យដឹងថា ការចាក់វ៉ាក់សាំងកូវីដ-១៩ ដូសជំរុញ រួមមាន ដូសទី៣ ដូសទី៤ ដូសទី៥ និងទី៦ ជូនដល់សិស្សានុសិស្ស លោកគ្រូអ្នកគ្រូ និងបុគ្គលិកសិក្សា នៅតាមសាលាបឋមសិក្សា អនុវិទ្យាល័យ និងវិទ្យាល័យនៅរាជធានីភ្នំពេញ ចាប់ពីថ្ងៃទី០៦ កុម្ភៈ ដល់ថ្ងៃទី០៤ ខែមីនា ឆ្នាំ២០២៣ ។ ការចាក់វ៉ាក់សាំងកូវីដ-១៩ នៅតាមសាលារៀននាពេលនេះ ចូលរួមដោយក្រុមគ្រូពេទ្យស្ម័គ្រចិត្តយុវជនសម្តេចតេជោ (TYDA) ។
សូមជម្រាបថា តាមការបញ្ជាក់ពីមន្ត្រីជាន់ខ្ពស់សុខាភិបាល ការចាក់វ៉ាក់សាំងបង្ការជំងឺកូវីដ-១៩ គឺមានប្រសិទ្ធភាព និងជួយសុខភាពប្រជាជនទាន់ពេលវេលា ព្រមទាំងបង្កលក្ខណៈឱ្យប្រទេសកម្ពុជាអាចបើកប្រទេសដំណើរការឡើងវិញលើគ្រប់វិស័យ ។ មូលហេតុដែលក្រសួងសុខាភិបាលផ្សព្វផ្សាយឱ្យចាក់វ៉ាក់សាំងបង្ការជំងឺកូវីដ-១៩ ដូសជំរុញបន្ដបន្ទាប់រហូតមកដល់ដូសទី៦ គឺដោយសារប្រសិទ្ធភាពវ៉ាក់សាំងដែលចាក់រួចមិនមានពេលវេលាយូរ (ប្រសិទ្ធភាពចន្លោះ៦ ទៅ ៨ខែ) នឹងថមថយវិញ ដែលចាំបាច់ត្រូវតែចាក់ដូសជំរុញ ។
គួររំលឹកដែរថា នាថ្ងៃទី០៦ ខែកុម្ភៈ ឆ្នាំ២០២៣ ក្រុមគ្រូពេទ្យសម្តេចតេជោ (TYDA) បានចាប់ផ្តើមដំណើរការចាក់វ៉ាក់សាំងការពារជំងឺកូវីដ-១៩ ជូនដល់លោកគ្រូ អ្នកគ្រូ និងសិស្សានុសិស្សនៅវិទ្យាល័យ ជា ស៊ីម សន្ធរម៉ុក វិទ្យាល័យឥន្ទ្រទេវី ខណ្ឌទួលគោក ដោយមានការអញ្ជើញចូលរួមពិនិត្យពីលោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា និងលោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងមន្ត្រីជំនាញនៃក្រសួងទាំងពីរ ៕
