ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ថ្លែងក្នុងពិធីបើកបវេសនកាលឆ្នាំសិក្សា២០២២-២០២៣ របស់សាកលវិទ្យាល័យខេមតិច កាលពីចុងសប្តាហ៍កន្លងទៅនេះ អ្នកឧកញ៉ាបណ្ឌិត ពុង ឃាវ សែ បានជំរុញដល់យុវជនគួរងាកមករៀនជំនាញបច្ចេកវិទ្យា វិទ្យាសាស្រ្ត វិស្មកម្មជាដើម ដែលជាជំនាញមិនសូវមានអ្នកចាប់អារម្មណ៍ និងមានតម្រូវការទីផ្សារខ្ពស់។
អ្នកឧកញ៉ាបណ្ឌិត បញ្ជាក់ថា តាមនិន្នាការអប់រំរបស់សិស្សបច្ចុប្បន្ន ពួកគេច្រើនមានទំនោរទៅរៀនមុខវិជ្ជាគណនេយ្យ ធនាគារ ហិរញ្ញវត្ថុ ជាដើម ដោយមើលរំលងជំនាញបច្ចេកវិទ្យា វិទ្យាសាស្រ្ត ដែលប្រទេសជាតិកំពុងមានតម្រូវការធនធានមនុស្សផ្នែកបច្ចេកទេសខ្ពស់។
យុវតី អ៊ូ កេតសុវត្តី មកពីខេត្តសៀមរាប បច្ចុប្បន្នកំពុងរៀនឆ្នាំទី១ ជំនាញវិទ្យាសាស្រ្តទិន្នន័យ និងវិទ្យាសាស្រ្តសិប្បនិម្មិត ក៏បានសម្តែងការយល់ឃើញដែរថា ជំនាញវិទ្យាសាស្រ្ត និងបច្ចេកវិទ្យា គឺជាជំនាញដែលសំខាន់ក្នុងការចូលរួមអភិវឌ្ឍសេដ្ឋកិច្ចជាតិ ហើយថា ជំនាញនេះក៏មានតម្រូវការការងារខ្ពស់នៅក្នុងប្រទេសកម្ពុជា ក៏ដូចជានៅក្រៅប្រទេសផងដែរ។
គួរបញ្ជាក់ថា បច្ចេកវិទ្យាឌីជីថលបានដើរតួនាទីយ៉ាងសំខាន់នៅក្នុងការអភិវឌ្ឍសេដ្ឋកិច្ច សង្គម ហើយគ្រប់ស្ថាប័ន និងក្រុមហ៊ុនទាំងអស់ពិតជាត្រូវការអ្នកជំនាញបច្ចេកវិទ្យាឌីជីថល ដើម្បីជួយសម្រួលដល់ការងារឱ្យកាន់តែមានប្រសិទ្ធភាព។
បើយោងតាមទិន្នន័យពីក្រសួងប្រៃសណីយ៍ និងទូរគមនាគមន៍ បច្ចុប្បន្ន និស្សិតដែលបានបញ្ចប់ការសិក្សាជំនាញបច្ចេកវិទ្យាឌីជីថលគឺនៅមានចំនួនតិច ស្របពេលដែលតម្រូវការជំនាញនេះមានកាន់តែច្រើនឡើង ដែលជាឱកាសល្អសម្រាប់ទទួលបានការងារធ្វើទាំងក្នុង និងក្រៅប្រទេស។ មិនតែប៉ុណ្ណោះ ដោយសារអ្នកជំនាញបច្ចេកវិទ្យាឌីជីថលមិនសូវមានច្រើននាំឱ្យក្រុមហ៊ុននិងស្ថាប័នមានការប្រកួតប្រជែងជ្រើសរើសយកមកបម្រើការងារ ដោយផ្តល់ប្រាក់បៀវត្សខ្ពស់និងអត្ថប្រយោជន៍ផ្សេងៗជាច្រើន ។
គួរជម្រាបជូនថា ដើម្បីឆ្ពោះទៅសម្រេចបានចក្ខុវិស័យប្រែក្លាយទៅជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០ កម្ពុជាទាំងមូលនឹងត្រូវបន្តកសាងសង្គមដោយផ្អែកលើពុទ្ធិ និងបណ្ដុះបណ្ដាលកម្លាំងពលកម្មជំនាញបន្ថែមទៀត ដើម្បីបំពេញតម្រូវការក្នុងវិស័យឧស្សាហកម្ម និងទីផ្សារដែលប្រែប្រួលទៅតាមបច្ចេកវិទ្យា៕
