ក្រសួងអប់រំ យុវជន និងកីឡា នៅថ្ងៃនេះ បានធ្វើការ​ជំរុញជាថ្មីម្តងទៀត​ដល់​សាលារៀនរដ្ឋ និងឯកជន​ ដោយ​សហការជាមួយស្ថាប័ន និងអាជ្ញាធរមានសមត្ថកិច្ចគ្រប់លំដាប់ថ្នាក់ ដើម្បីចូលរួមអនុវត្តឱ្យគ្រឹះស្ថានសិក្សាគ្មានភេជ្ជប៉ូវកម្លាំង។

ក្នុងសេចក្តីណែនាំ​ចំនួនពីរទំព័រ ចុះថ្ងៃទី២៧ ខែវិច្ឆិកា ឆ្នាំ២០២៥ ក្រសួងអប់រំ បានហាមដាច់ខាត​នូវ​ការ​ទទួល​ទាន ការ​ចែកចាយ ការតាំងលក់ និង​ការផ្សព្វផ្សាយ​ពាណិជ្ជកម្ម​ផលិតផល​ភេសជ្ជៈប៉ូវកម្លាំង​គ្រប់ប្រភេទ នៅក្នុងបរិវេណគ្រឹះស្ថានសិក្សា ហើយ​ជាមួយ​គ្នា​ក្រសួងក៏​បានណែនាំ​ឱ្យ​ធ្វើការផ្សព្វផ្សាយ​អំពីផលប៉ះពាល់​ នៃការ​ទទួល​ទានភេសជ្ជៈ​ប៉ូវកម្លាំង​ឱ្យ​បានទូលំទូលាយ នៅពេល​គោរពទង់ជាតិ កិច្ច​ប្រជុំ ឬកម្មវិធី​ប្រមូលផ្តុំផ្សេងៗ​របស់គ្រឹះស្ថានសិក្សា។

លោកជំទាវបណ្ឌិត សឿ សុជាតា អនុរដ្ឋលេខាធិការក្រសួងអប់រំ យុវជន និងកីឡា និងជាប្រធានលេខាធិការដ្ឋាននៃគណៈកម្មាធិការអន្តរក្រសួងសុខភាពសិក្សា មានប្រសាសន៍ថា បច្ចុប្បន្ននៅក្នុងបរិវេណគ្រឹះស្ថានសិក្សាសាធារណៈ និងឯកជន គេ​ឃើញមានការ​ដាក់លក់ភេសជ្ជៈប៉ូវកម្លាំង ប៉ុន្តែបរិមាណនៃការលក់នៅមានលួចលាក់។

លោកជំទាវ សុជាតា បញ្ជាក់ថា ក្នុងការចូលរួមហាមឃាត់ការទទួលទាន ការចែកចាយ ការតាំងលក់ និងការផ្សព្វផ្សាយពាណិជ្ជកម្មផលិតផលភេសជ្ជៈប៉ូវកម្លាំងគ្រប់ប្រភេទនៅក្នុងបរិវេណគ្រឹះស្ថានសិក្សាសាធារណៈ និងឯកជន គឺក្រសួងអប់រំ បានធ្វើការយ៉ាងជិតស្និទ្ធ តាមរយៈការផ្សព្វផ្សាយ អប់រំ បណ្ដុះបណ្ដាលឱ្យមនុស្សម្នាក់ៗស្គាល់ពីតម្លៃនៃសុខភាព និងចេះចូលរួមក្នុងការការពារសុខភាព។

អនុរដ្ឋលេខាធិការក្រសួងអប់រំរូបនេះ សង្កត់ធ្ងន់ថា ក្នុងករណីសាលារៀនមួយចំនួននៅតែបន្តមានការតាំងលក់ភេសជ្ជៈប៉ូវកម្លាំងគ្រប់ប្រភេទនៅក្នុងបរិវេណគ្រឹះស្ថានសិក្សា នឹងមានការព្រមានតាមរយៈគណៈកម្មការសុខភាពសិក្សា ពោលគឺព្រមាននាយកសាលាតែម្ដង។

បើតាម​លោកជំទាវបណ្ឌិត សឿ សុជាតា ក្នុងការទប់ស្កាត់ចំណីអាហារតាមសាលារៀន ជាពិសេសភេសជ្ជៈប៉ូវកម្លាំងនេះ រាជរដ្ឋាភិបាលកម្ពុជា ក៏បានចេញសេចក្ដីណែនាំថ្មីៗនេះដែរ ហើយ​លោកជំទាវ​សង្ឃឹមថា ក្រោយក្រសួងអប់រំ ចេញសេចក្ដីណែនាំថ្មីនេះបន្ថែម ភ្ជាប់ជាមួយបទបញ្ញត្តិ ជឿថា នៅឆ្នាំ២០២៦ ករណីនេះ នឹងថយចុះជាវិជ្ជមាន។

គួរជំរាបជូនដែរថា នៅក្នុង​ឱកាស​ទិវាជាតិអាហារូបត្ថម្ភ លើកទី១២ ឆ្នាំ២០២៥ កាលពីដើមខែវិច្ឆិកា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា បានជំរុញ​ដល់ក្រសួងអប់រំ យុវជន និងកីឡា ត្រូវ​ពង្រឹងវិធានការអ​នុវត្ត​ការលើក​កម្ពស់សុវត្ថិភាព និង​សុខុមាលភាព​ចំណីអាហារនៅតាម​គ្រឹះស្ថានសិក្សា​ចំណេះដឹងទូទៅសាធារណៈ និង​ឯកជន និងហាមឃាត់ការ​ទទួលទាន ការចែកចាយ ការដាក់តាំងលក់ និង​ការផ្សព្វផ្សាយពាណិជ្ជកម្ម​ផលិតផលភេសជ្ជៈ​ប៉ូវកម្លាំង​គ្រប់ប្រភេទនៅ​ក្នុង​ និង​ជុំវិញបរិវេណគ្រឹះស្ថាន​សិក្សា​ចំណេះដឹងទូទៅ។ ជាមួយ​គ្នា​សម្តេច​ក៏​ស្នើ​ឱ្យ​បន្ត​លើក​កម្ពស់​ការ​អប់រំ​អាហារូបត្ថម្ភ​ដល់​សិស្សានុសិស្ស តាមរយៈកម្មវិធី​ផ្តល់អាហារតាមសាលារៀន ដោយប្រើប្រាស់​កសិផល​ក្នុងសហគមន៍ និង​ការ​ផ្តល់សេវាអប់រំស្តីពីអាហារូបត្ថម្ភ៕