ក្នុងពិធី​ប្រគល់វិញ្ញាបនបត្រ​វគ្គបណ្តុះបណ្តាល​គ្រូតន្រ្តី សម្រាប់សៀវភៅសិក្សា “តន្រ្តីរីករាយ” កាលពីថ្ងៃទី២៧ វិច្ឆិកា ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា លើកឡើងថា ក្រសួងអប់រំ នឹងជួយគាំទ្រ​ពង្រឹងតន្រ្តី​ក្នុងការអប់រំ ដើម្បីបណ្តុះទេពកោសល្យ និងស្មារតី​តន្រ្តីដល់កូនខ្មែរ​គ្រប់រូប។

បើតាម​ប្រសាសន៍របស់ឯកឧត្តមរដ្ឋមន្រ្តី ក្រសួងអប់រំ​នឹង​រៀបចំ​កម្មវិធីសិក្សា ដោយរចនាកម្មវិធី​សម្រាប់​ការ​អប់រំ​តន្រ្តី​ឱ្យ​បានលម្អិត និងសមស្រប​តាម​កម្រិត​សិក្សា​ជាតិ។ ជាមួយ​គ្នា ក្រសួងក៏ពិចារណា​ក្នុង​ការ​ណែនាំ​ឯកទេស​តន្រ្តី​ទៅ​ក្នុង​កម្មវិធីសិក្សា​នៅ​វិទ្យាស្ថានគរុកោសល្យ ដើម្បីបង្កើតធនធាន​គ្រូបង្រៀន​តន្រ្តីប្រកបដោយ​និរន្តរភាព ហើយ​ជាមួយ​គ្នានេះ ក្រសួងក៏នឹងណែនាំ​ការ​អប់រំ​តន្រ្តី​ទៅ​ក្នុង​កម្មវិធីសិក្សា​នៅតាម​សាលា​រៀននានា ដើម្បីធានាថា កុមារ​កម្ពុជា​គ្រប់រូប​មាន​ឱកាស​រៀន​សូត្រ​ពីសិល្បៈដ៏ថ្លៃថ្លានេះ។

លោកស្រី ទេព សុគន្ធារ៉េត គ្រូបង្រៀនតន្រ្តី នៃសាលាមធ្យមសិក្សាវិចិត្រសិល្បៈ មានប្រសាសន៍ថា ទោះជាតន្រ្តីស្ថិត​ក្នុងផ្នែក​អរូបី​ក៏​ពិតមែន ក៏​ប៉ុន្តែ​បើតាម​ការ​សិក្សា និង​បទពិសោធន៍​នៃប្រទេស​ជឿនលឿន ការ​សិក្សា​​ពីតន្រ្តី វានឹង​ជួយ​ឱ្យ​កុមារមានការ​គិតវៃឆ្លាត ហើយ​ពួកគេ​អាច​បន្ធូរអារម្មណ៍តានតឹង​ពីការ​សិក្សា។ លោកស្រីថា នៅពេល​ដែលមនុស្ស​មានអារម្មណ៍ខឹង មួរម៉ៅ តែពេលគេ​បាន​លេងតន្រ្តី នោះ​នឹងធ្វើ​ឱ្យ​អារម្មណ៍នឹងនរមកវិញ។

លោកស្រី សុគន្ធារ៉េត បន្ថែមថា បន្ថែមថា ក្រៅពីជួយផ្នែកអារម្មណ៍ឱ្យរីករាយ តន្រ្តីក៏ជាភាសាភ្លេងតែមួយ ដែលអាចឱ្យមនុស្សមកពីប្រទេសផ្សេងគ្នាអាចលេងភ្លេងជាមួយគ្នាបានតាមរយៈអក្សរភ្លេង។ ​លើសពីនេះ ការរៀនពីតន្រ្តី ក៏ជួយឱ្យមានសាមគ្គីភាព មានទំនាក់ទំនងអន្តរជាតិ ដែលនាំមកនូវសន្តិភាព ពោលគឺការលេងតន្រ្តីដើម្បីសន្តិភាព។

សូមជំរាបជូនថា ដោយមើលឃើញពីគុណតម្លៃរបស់តន្រ្តីចំពោះការសិក្សា ក្រុមវង់តន្រ្តីយុវជនអង្គរ (ANYO) ក្រោមគំនិតផ្តួចផ្តើម​របស់លោកស្រីលោកស្រីបណ្ឌិត Miya Choi គ្រូបង្រៀនព្យាណូស្ម័គ្រចិត្តនៅអនុវិទ្យាល័យវិចិត្រសិល្បៈ អ្នកនិពន្ធ និងជាសាស្រ្តាចារ្យ នៃវិទ្យាសា្ថន Cambodia Presbyterian Theological បានចងក្រងជាសៀវភៅសិក្សា “តន្រ្តីរីករាយ” ចំនួន៦ភាគ សម្រាប់ការ​បណ្តុះបណ្តាល​នៅ​តាមសាលារដ្ឋ និង​ឯកជន ហើយ​បច្ចុប្បន្ន​ គ្រូបង្រៀន​ចំនួន២២រូប ត្រូវ​បានបណ្តុះបណ្តាល៕