ភ្នំពេញ – ក្រសួងអប់រំ យុវជន និងកីឡា កាលពីចុងសប្តាហ៍​កន្លងទៅនេះ បានប្រកាស​ប្រឡងជ្រើសរើសគ្រូបង្រៀនកម្រិតឧត្តមចំនួន ៨០នាក់ដើម្បីបម្រើការងារនៅតាមគ្រឹះស្ថានឧត្តមសិក្សាសាធារណៈ ។

សម្រាប់​លក្ខខណ្ឌនៃការប្រឡងជ្រើសរើស រួមមាន ជានិស្សិត ឬជាបុគ្គលិកមិនមែនក្របខ័ណ្ឌរដ្ឋ, បេក្ខជន ត្រូវមានសញ្ជាតិខ្មែរ, បេក្ខជនមានសញ្ញាបត្របណ្ឌិតឡើងទៅ ត្រូវបានលើកលែងលក្ខខណ្ឌអាយុ, បេក្ខជនមានសញ្ញាបត្របរិញ្ញាបត្រជាន់ខ្ពស់ ឬសញ្ញាបត្រសមមូល ត្រូវមានអាយុច្រើនបំផុត៤០ឆ្នាំ។ លើសពីនេះ មិនប្រាសចាកសិទ្ធិខាងរដ្ឋប្បវេណី និងសិទ្ធិជាពលរដ្ឋ, បេក្ខជនជានារី ឬជនមានពិការភាពដែលមានសមត្ថភាពសមស្របត្រូវបានលើកទឹកចិត្ត។ ម៉្យាងវិញទៀត សញ្ញាបត្រដែលបានបញ្ចប់ការសិក្សាពីបរទេស ឬសញ្ញាបត្រជាភាសាបរទេស ត្រូវយកទៅបញ្ជាក់ជាភាសាខ្មែរ និងមានការទួលស្គាល់ពីក្រសួងអប់រំ យុវជន និងកីឡា។

ចំពោះ ការជ្រើសរើសមុខវិជ្ជាជំនាញ និងទីកន្លែងបម្រើ​ការងារ បេក្ខជនត្រូវជ្រើសរើសមុខវិជ្ជាជំនាញឱ្យស្របតាមសញ្ញាបត្ររបស់ខ្លួន និងតាមតារាងចំនួនសម្រាប់ការប្រឡងក្របខ័ណ្ឌគ្រូបង្រៀនកម្រិតឧត្តមឆ្នាំ២០២៣ ។ លើសពីនេះ ក្នុងករណីមានការក្លែងបន្លំឯកសារផ្សេងៗ ឬ មិនគោរពកិច្ចសន្យា ត្រូវលុបឈ្មោះចេញពីបញ្ជីបេក្ខជនប្រឡងជាប់ និងទទួលខុសត្រូវចំពោះមុខច្បាប់។ បេក្ខជនត្រូវជ្រើសរើសគ្រឹះស្ថានឧត្តមសិក្សាសាធារណៈ ដូចមានឈ្មោះក្នុងតារាងចំនួនសម្រាប់ការប្រឡងក្របខ័ណ្ឌគ្រូបង្រៀនកម្រិតឧត្តម (គ្រូបង្រៀននៅគ្រឹះស្ថានឧត្តមសិក្សា)ឆ្នាំ២០២៣ និងត្រូវទាក់ទងគ្រឹះស្ថានឧត្តមសិក្សា ដើម្បីពិគ្រោះយោបល់លើមុខវិជ្ជាជំនាញ និងសុំការយល់ព្រមលើកិច្ចសន្យាស្ម័គចិត្តបម្រើការងារ មុនពេលដាក់ពាក្យសុំចុះឈ្មោះប្រឡង។

ចំពោះវិញ្ញាសាប្រឡង រួមមាន ទី១. វប្បធម៌ទូទៅ រយៈពេល ២ម៉ោង មេគុណ១, ទី២. មុខវិជ្ជាជំនាញ រយៈពេល ៣ ម៉ោង មេគុណ ៣ និងទី៣. ភាសាបរទស រួមមាន ភាសាបារាំង ឬអង់គ្លេស (តាមការជ្រើសរើសរបស់បេក្ខជន) រយៈពេល១ម៉ោង និង ៣០នាទី មេគុណ ១ ។ ដោយឡែក សម័យប្រឡង និងមណ្ឌលប្រឡងក្រសួងអប់រំនឹងជូនដំណឹងនៅពេលក្រោយ។

បេក្ខជនដែលមានបំណងចូលរួមការប្រឡងប្រជែងចូលបម្រើការងារនៅគ្រឹះស្ថានឧត្តមសិក្សាសាធារណៈនៃក្រសួងអប់រំ យុវជន និងកីឡា អាចទាញយកសំណុំឯកសារតាមបណ្តាញ​សង្គមរបស់ក្រសួង Facbook.com/moeys.gov.kh ដើម្បីបំពេញ រួចយកទៅដាក់នៅនាយកដ្ឋានបុគ្គលិក(ការិយាល័យក្របខ័ណ្ឌ)រៀងរាល់ម៉ោងធ្វើការ ចាប់ពីថ្ងៃជូនដំណឹងនេះ រហូតដល់ថ្ងៃទី៣១ ខែឧសភា ឆ្នាំ២០២៣ វេលាម៉ោង ១៧:០០រសៀលជាកំហិត ។

ចំពោះព័ត៌មានលម្អិតបន្ថែម បេក្ខជនអាចទាក់ទងផ្ទាល់ជាមួយការិយាល័យក្របខណ្ឌនៃនាយកដ្ឋានបុគ្គលិក ស្ថិតនៅខាងត្បូងអនុវិទ្យាល័យចតុមុខ ក្នុងបរិវេណទីស្តីការក្រសួងអប់រំ យុវជន និងកីឡា ៕