ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្នុងពិធីប្រគល់វិញ្ញាបនបត្រ និងសញ្ញាបត្រជូនសិស្ស និស្សិតវិទ្យាស្ថានខ្មែរជំនាន់ថ្មី ជិត២ពាន់នាក់នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានបន្តលើកទឹកចិត្តទៅដល់យុវជនកម្ពុជារៀនជំនាញបច្ចេកទេស និងវិជ្ជាជីវៈ។
សម្តេចតេជោបានលើកឡើងថា ដើម្បីជំរុញទៅដល់កំណើនសេដ្ឋកិច្ច និងផលិតកម្មក្នុងស្រុក និងការទាក់ទាញវិនិយោគ គឺទាមទារឱ្យប្រជាពលរដ្ឋ ក៏ដូចជាយុវជនយើងមានជំនាញ ។ បើតាមប្រសាសន៍របស់សម្តេចតេជោ ពេលនេះកម្ពុជាកំពុងរៀបចំឱ្យមានការបណ្តុះបណ្តាលជំនាញវិជ្ជាជីវៈសម្រាប់សិស្សក្រីក្រចំនួន១លាន៥សែននាក់ហើយ។
សម្តេចតេជោ ហ៊ុន សែន នាយករដ្ឋមន្រ្តី
“ដើម្បីទាក់ទាញនូវវិនិយោគបាន អ្នកវិនិយោគមិនមែនមក ហើយបែរជាយើងអត់ចេះអីសោះ អត់មានបច្ចេកទេសសោះ ហើយទទួលយកយើងឱ្យចូលធ្វើការនោះទេ…”
សូមបញ្ជាក់ថា ការអប់រំបណ្តុះបណ្តាលបច្ចេកទេស និងវិជ្ជាជីវៈ គឺជាកត្តាមិនអាចខ្វះបានក្នុងការអភិវឌ្ឍសេដ្ឋកិច្ចសង្គម និងជំរុញឱ្យអ្នកសិក្សាទទួលបាននូវចំណេះដឹង ជំនាញបច្ចេកទេសជាមួយសមត្ថភាពពិតប្រាកដ ដើម្បីក្លាយខ្លួនជាពលករជំនាញ អ្នកបច្ចេកទេស ព្រមទាំងចូលរួមចំណែកយ៉ាងសំខាន់ក្នុងការអភិវឌ្ឍសង្គម និងសេដ្ឋកិច្ចជាតិ ។
យោងតាមទិន្នន័យរបស់ក្រសួងការងារ និងបណ្តុះបណ្តាលវិជ្ជាជីវៈ បានបង្ហាញថា បច្ចុប្បន្នកម្ពុជាមានគ្រឹះស្ថានបណ្តុះបណ្តាលជំនាញបច្ចេកទេស និងវិជ្ជាជីវៈ សរុបចំនួន ១០៧គ្រឹះស្ថាន ខណៈការសិក្សាជំនាញនេះ កំពុងទទួលបានការគាំទ្រ និងលើកទឹកចិត្តពីសំណាក់រាជរដ្ឋាភិបាល។
យ៉ាងណាក៏ដោយ បើយោងតាមការបញ្ជាក់របស់មន្រ្តីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈ បច្ចុប្បន្នក្នុងមួយឆ្នាំកម្ពុជាផលិតធនធានមនុស្សជាអ្នកជំនាញបច្ចេកទេស និងវិជ្ជាជីវៈ បានប្រមាណតែ៦ម៉ឺននាក់ប៉ុណ្ណោះ ដែលចំនួននេះមិនទាន់គ្រប់គ្រាន់តាមតម្រូវការ ខណៈសាលាបណ្តុះបណ្តាលជំនាញវិជ្ជាជីវៈអាចធ្វើការបណ្តុះបណ្តាលបានរហូតដល់១០ម៉ឺននាក់ក្នុងមួយឆ្នាំ៕
