ភ្នំពេញ – នៅក្នុងសន្និសិទ្ធសារព័ត៌មាន ស្ដីពី កីឡាគ្មានថ្នាំជក់ កាលពីថ្ងៃទី២ ខែមីនា កន្លងទៅនេះ លោក ហោ សារុន អនុប្រធានគណៈកម្មាធិការនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ និងកីឡាអាស៊ានប៉ារ៉ាហ្គេម លើកទី១២ មានប្រសាសន៍ថា កម្ពុជាកំពុងផ្សព្វផ្សាយ និងជំរុញអនាគតកីឡាគ្មានថ្នាំជក់ និងអនុវត្តគោលការណ៍កីឡាគ្មានថ្នាំជក់យ៉ាងតឹងរ៉ឹងបំផុត ដោយហាមដាច់ខាតមិនប្រើប្រាស់ ការឧបត្ថម្ភ ចែកចាយ ឬផ្សព្វផ្សាយផលិតផលថ្នាំជក់ និងបារីអេឡិចត្រូនិក នៅក្នុងការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ឡើយ ។

ក្នុងនោះ​បើតាម​ការ​បញ្ជាក់​របស់​លោក ហោ សារុន គណៈកម្មាធិការជាតិរៀបចំការប្រកួតបានដាក់ចេញនូវគោលការណ៍ ៥ចំណុចក្នុងការហាមឃាត់ការប្រើប្រាស់, ការលក់, ការចែកចាយ និងការផ្សាយពាណិជ្ជកម្ម ផលិតផលថ្នាំជក់ និងបារីអេឡិចត្រូនិក នៅក្នុងបរិវេណពហុកីឡដ្ឋានជាតិ, ទីលានប្រកួត កីឡា និងតំបន់ស្នាក់នៅ ហូបចុក របស់ប្រតិភូកីឡា គឺមិនទទួលការឧបត្ថម្ភនានា របស់ក្រុមហ៊ុនថ្នាំជក់ និងក្រុមហ៊ុនបារីអេឡិចត្រូនិកនោះឡើយ។

លោក ហោ សារុន អនុប្រធានគណៈកម្មាធិការនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេម លើកទី១២

“យើងជឿជាក់ថា ការផ្សព្វផ្សាយកីឡាគ្មានថ្នាំជក់នឹងមានប្រសិទ្ធភាពខ្ពស់ ជាពិសេសបងប្អូនប្រជាពលរដ្ឋគាំទ្រចំពោះកីឡាគ្មានថ្នាំជក់ ព្រោះទាំងគេទាំងយើង គឺមិនចង់ឱ្យយុវជនជាកូនៗរបស់យើងក្លាយទៅជាអ្នកប្រើប្រាស់ថ្នាំជក់ធ្វើឱ្យខូចសុខភាពពីក្មេងនោះទេ”

គណៈកម្មាធិការជាតិរៀបចំការប្រកួត បានបន្ថែមទៀតថា ក្រុមការងាររៀបចំការប្រកួតនឹងរៀបចំការផ្សព្វផ្សាយយ៉ាងទូលំទូលាយ តាមរយៈការត្រៀមបដា ផ្ទាំងប៉ាណូ បង្ហាញពីកីឡាគ្មានថ្នាំជក់ និងមានក្រុមយុវជនស្ម័គ្រចិត្តចាំជួយអប់រំ ណែនាំ ផ្សព្វផ្សាយ មិនឱ្យកីឡាករ ឬអ្នកទស្សនាប្រើប្រាស់ផលិតផលថ្នាំជក់គ្រប់ប្រភេទទាំងមុន និងក្នុងព្រឹត្តិការណ៍កីឡានេះចាប់ផ្តើម។ លោក ហោ សារុន បន្តថា ប្រសិនបើក្រុមហ៊ុន ឬបុគ្គលណា ប្រព្រឹត្តិផ្ទុយនឹងគោលការណ៍ដែលមានចែងនេះ ក្រុមការងារនឹងធ្វើការអប់រំជាមុន ទើបអនុវត្តវិធានរដ្ឋបាល។

លោកវេជ្ជបណ្ឌិត មុំ គង់ នាយកប្រតិបត្តិ អង្គការចលនា ដើម្បីសុខភាពកម្ពុជា មានប្រសាសន៍ថា តាមរយៈព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេម លើកទី១២ ដែលកម្ពុជាខិតខំប្រឹងប្រែងទាំងអស់គ្នា ហើយជាកីឡាដែលគ្មានថ្នាំជក់ដំបូងនៅក្នុងប្រទេសកម្ពុជា នឹងអាចរួមចំណែកជួយទៅដល់យុវជនឱ្យផ្ដាច់បារី និងមើលឃើញផលប៉ះពាល់នៃថ្នាំជក់។ ក្នុងនោះ លោកបន្តថា ទី១.កីឡាជាវិញ្ញាសាដែលយុវជនចូលចិត្ត នៅពេលដែលយើងធ្វើឱ្យកីឡាគ្មានថ្នាំជក់និងអាចអប់រំពួកគាត់មិនឱ្យជក់មួយកម្រិត ទី២.វិធានការមានប្រសិទ្ធភាពគឺការដំឡើងពន្ធថ្នាំជក់ឱ្យបានខ្ពស់ (អត្រា៧៥%នៃផលិតផលបារីលក់រាយ) ដើម្បីឱ្យកុមារ និងយុវជនគ្មានលទ្ធភាពទិញបាន ចំណែកអ្នកកំពុងជក់ និងកាត់បន្ថយបរិមាណនៃការជក់បារី។

លោកវេជ្ជបណ្ឌិត មុំ គង់ នាយកប្រតិបត្តិ អង្គការចលនា ដើម្បីសុខភាពកម្ពុជា

“កីឡាគ្មានថ្នាំជក់នឹងរួមចំណែកលើកទឹកចិត្ត និងគាំទ្រអ្នកជក់បារីឱ្យផ្តាច់បារី ការពារកីឡាក៏មិនឱ្យជក់បារី ជាពិសេសយុវវ័យ និងកុមារពីការចាប់ផ្តើមជក់បារី រួមចំណែកបង្កើតវប្បធម៌ គ្មានថ្នាំជក់ កាត់បន្ថយចំណាយលើការសម្អាត និងហានីភ័យនៃអគ្គិភ័យទៀតផង”

លោក យ៉ិល ដារ៉ាវុធ តំណាងអង្គការសុខភាពពិភពលោក បានលើកឡើងដែរថា កីឡាជាការអបអរសាទរ នៃជីវិត ដោយគេមិនអាចយកផលិតផលថ្នាំជក់ដែលជាផលិតផលសម្លាប់មនុស្សដាក់ជាមួយគ្នាបានទេ ហើយកីឡាគឺអាចបំផុសគំនិត សុខភាពល្អ ការប្រកួតដោយយុត្តិធម៌ ភាពសប្បាយរីករាយ និងមិត្តភាពរវាងគ្នាទៅវិញទៅមក ។ លោកបន្តថា កីឡាករល្អមិនត្រូវប្រើប្រាស់ថ្នាំជក់នោះទេ ព្រោះត្រូវការរាងកាយមាំមួន ហើយ​ប្រសិនបើកីឡាករប្រើប្រាស់ថ្នាំជក់នឹងធ្វើប៉ះពាល់ដល់សុខភាពធ្ងន់ធ្ងរ។

តំណាងអង្គការសុខភាពពិភពលោក បញ្ជាក់ថា ផលប៉ះពាល់នៃការប្រើប្រាស់ថ្នាំជក់បានសម្លាប់មនុស្សប្រមាណ ៨លាននាក់ទូទាំងពិភពលោក ក្នុងនោះអ្នកស្រូបផ្សែងបារីពីគេប្រមាណ ១លាន២សែននាក់បានបាត់បង់ជីវិត និងមានមនុស្សជាង២ម៉ឺននាក់ត្រូវបានបាត់បង់ជីវិតជារៀងរាល់ថ្ងៃ។ ទន្ទឹមគ្នានេះ នៅកម្ពុជាមានមនុស្សប្រមាណ១សែន៥ពាន់នាក់បានស្លាប់ ៕