ភ្នំពេញ- ក្រោយសង្កេតឃើញថា សាលារៀននៅតាម រាជធានី ខេត្តមួយចំនួន ជាពិសេសសាលារៀននៅតាមដងផ្លូវដែលមានចរាចរណ៍ញឹកញាប់ សិស្សតែងប្រឈម ឬជួបការលំបាកក្នុងការធ្វើដំណើរ ការឆ្លងផ្លូវពីសាលារៀនទៅផ្ទះ និងពីផ្ទះមកសាលារៀន ក្រសួងអប់រំ យុវជន និងកីឡា បានចេញសេចក្ដីណែនាំដល់គ្រឹះស្ថានសិក្សា​សាធារណៈទាំងអស់ ក្នុងការ​ពង្រឹងការអនុវត្តសុវត្ថិភាពចរាចរណ៍ក្នុងការធ្វើដំណើរ ។

ក្នុងសេចក្តីណែនាំ ក្រសួងបាន​លើក​ឡើងថា ដើម្បីចូលរួមគាំទ្រ និងអនុវត្តសកម្មភាពសុវត្ថិភាពចរាចរណ៍ផ្លូវគោក ស្របតាមការអំពាវនាវរបស់គណៈកម្មាធិការជាតិសុវត្ថិភាពចរាចរណ៍ ចូលរួមកាត់បន្ថយគ្រោះថ្នាក់ចរាចរណ៍ និងពង្រឹងការអនុវត្តច្បាប់ស្តីពីចរាចរណ៍ផ្លូវគោកបន្ថែមទៀត ក្រសួងអប់រំ ណែនាំដូចខាងក្រោមនេះ៖

ទី១- សាលារៀនដែលនៅជាប់នឹងផ្លូវ និងមានចរាចរណ៍មមាញឹក គណៈកម្មការសាលាមានតួនាទីសំខាន់ក្នុងការដឹកនាំ និងការពារសិស្ស ធ្វើដំណើរដោយរៀបចំបំពាក់ផ្លាកសញ្ញាចរាចរណ៍ផ្សេងៗ របាំងការពារនៅតំបន់សិស្សឆ្លងកាត់ការបន្ថយល្បឿន។ល។ ឬបំពាក់ឧបករណ៍បំពងសំឡេ ស៊ីរ៉ែន ឬកណ្តឹងរោទិ៍ នៅមុខសាលារៀន ដើម្បីសម្របសម្រួលចរាចរណ៍ ពេលសិស្សចេញពីសាលារៀន។

២- ដាក់ផ្លាកសញ្ញា ឬផ្ទាំងរូបភាពអប់រំស្តីពីសុវត្ថិភាពចរាចរណ៍នៅក្នុងបរិវេនសាលា សារអប់រំផ្សេងៗនិងថែទាំឱ្យបានល្អ ផ្លូវឆ្លងកាត់មកសាលារៀន ទាំងផ្លូវលំ ផ្លូវជាតិ និងផ្លូវឆ្លងកាត់ទន្លេ រួមទាំងការរៀបចំផ្លូវសម្រាប់ជនពិការផងដែរ។

៣- ត្រូវកំណត់ផ្លូវសម្រាប់ធ្វើការជម្លៀសសិស្សពីសាលារៀន ព្រមទាំងត្រួតពិនិត្យ និងថែទាំជាទៀងទាត់ដើម្បីឱ្យផ្លូវទាំងនោះមានសភាពល្អ និងមានសុវត្ថិភាពរាល់ពេលធ្វើដំណើរ។

៤- កៀរគរកម្លាំងសរុប ជាមួយមន្ទីរសាធារណៈការ និងដឹកជញ្ជូន មន្ត្រីនគរបាលចរាចរណ៍ រាជធានី ខេត្តក្រុង ស្រុក ខណ្ឌ សហគមន៍ និងជំនាញពាក់ព័ន្ធ ដើម្បីសហការចូលរួម ក្នុងការធ្វើគំនូសផ្លូវ ដាក់ផ្លាកសញ្ញាចរាចរណ៍ ឬផ្ដល់រនាំងដាក់ការពារពេលសិស្សចូល និងចេញពីសាលារៀន ធានាបានសុវត្ថិភាពពេលសិស្សឆ្លងផ្លូវ។

៥- ប្រើប្រាស់រូបភាពក្រុមប្រឹក្សាកុមារ គណៈកម្មការសាលា លោកគ្រូ អ្នកគ្រូ សហការជាមួយមន្ត្រីនគរបាលចរាចរណ៍ ជួយសម្រួលចរាចរណ៏រាល់ពេលសិស្សធ្វើដំណើរទៅមកសាលារៀនប្រកបដោយសុវត្ថិភាព។

ទី៦- ណែនាំដល់បុគ្គលិកអប់រំជាគំរូល្អក្នុងការប្រើប្រាស់ផ្លូវដោយបង្ហាញនូវឥរិយាបថជាអ្នកប្រើប្រាស់ផ្លូវប្រកបដោយសុវត្ថិភាព។

ទី៧- ណែនាំដល់សិស្សានុសិស្សារាល់ពេលធ្វើដំណើរតាមកង់ ម៉ូតូ ឬរថយន្ត ត្រូវគោរពច្បាប់ចរាចរណ៍ ពាក់មួកសុវត្ថិភាព ខ្សែក្រវាត់សុវត្ថិភាពឱ្យបានត្រឹមត្រូវ បើកបរតាមល្បឿនកំណត់ គោរពភ្លើងផ្លាកសញ្ញចរាចរណ៍ និងសិទ្ធិអាទិភាពក្នុងការបើកបរ និងមានបម្រុងប្រយ័ត្នរាល់ពេលធ្វើដំណើរតាមដងផ្លូវ។

គួរបញ្ជាក់ថា សេចក្ដីណែនាំនេះ តម្រូវ​ឱ្យមន្ទីរអប់រំ យុវជន និងកីឡា រាជធានី ខេត្ត ការិយាល័យអប់រំ យុវជន និងកីឡានៃរដ្ឋបាលក្រុង ស្រុក ខណ្ឌ គណៈគ្រប់គ្រងសាលារៀនគ្រប់ភូមិសិក្សា បុគ្គលិកអប់រំ អាជ្ញាធរដែនដីមាតាបិតាអ្នកអាណាព្យាបាល គ្រប់រូប ចូលរួមសហការផ្សព្វផ្សាយ អនុវត្តប្រកបដោយស្មារតីទទួលខុសត្រូវខ្ពស់៕