ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ- យើងដឹងហើយថា កំហឹងមានផលវិបាក និងបង្កវិនាសអន្តរាយដែលមិនអាចនឹកស្មានដល់ ដូចពាក្យចាស់ពោលថា ខឹងខុស ខឹងខូច ខឹងខាត ។ ស្របគ្នានេះ នៅពេលមានកំហឹង យើងចាំបាច់ត្រូវរកដំណោះស្រាយ ឬវិធីគ្រប់គ្រងកំហឹង។ ខាងក្រោមនេះ គឺជាវិធីសាស្រ្តគ្រប់គ្រងកំហឹងចំនួន៦ចំណុច ដែលអាចជួយលោកអ្នកបំបាត់កំហឹងឱ្យចេញពីចិត្ត ៖
១. បន្ធូរបន្ថយកំហឹងដោយរាប់លេខ ៖ ពេលយើងខឹងនរណាម្នាក់ ឬរឿងអ្វីមួយ អាចប្រើវិធីរាប់លេខពី១ ដល់ ១០ ឬពី១ ដល់ ១០០ ក្នុងចិត្តខ្លួនឯង។ របៀបរាប់ត្រូវសម្រួលអារម្មណ៍ រួចចាប់ផ្ដើមរាប់ដោយយឺតៗពីលេខ១ ដល់ ១០ រួចដកដង្ហើមវែងៗ ឱ្យបាន ៣ ដង ។ បើកំហឹងនៅតែមិនថយទេ ចូររាប់ពី ១ ដល់ ១០០ ដោយល្បឿនមធ្យមរួចដកដង្ហើមវែងៗឱ្យបាន ៣ដង។ ការរាប់លេខ យើងប្រើឥរិយាបទមួយណាក៏បាន ដើរ ដេក ឈរ និងអង្គុយ អាចបើកភ្នែក ឬបិទភ្នែក បើយើងបិទភ្នែក សំខាន់ត្រូវប្រាកដថា ទីនោះមានសុវត្ថិភាព។ អ្វីដែលចាំបាច់បំផុតគឺរាប់ ដោយផ្តោតអារម្មណ៍តាមលេខនីមួយៗដើម្បីឱ្យសតិរបស់យើងដឹងថា យើងកំពុងរាប់លេខ កុំឱ្យគិតអ្វីផ្សេង។
២. វិធីពន្យាពេលឱ្យចិត្តស្ងប់ស្ងាត់ ៖ ប្រសិនបើយើងកំពុងខឹង ឬកំហឹងនោះមិនទាន់រលត់ទេ ចូរកុំគិតនូវអ្វីដែលយើងកំពុងខឹងនោះ ចូរកុំនិយាយ និងកុំធ្វើអ្វីទាំងអស់។ បន្ទាប់មកសម្រួលអារម្មណ៍ រួចដកដង្ហើមវែងៗឱ្យបានបីដង ហើយផ្ដោតអារម្មណ៍លើដង្ហើមចេញចូល និងរាប់ដង្ហើមនោះឱ្យបានពី ១ ដល់ ១០។ បើតាមសៀវភៅ បឋមវិបស្សនា បោះពុម្ពឆ្នាំ ២០០៤ បានបង្ហាញថា វិធីរាប់នេះ មិនត្រូវរាប់តិចជាង ៥ ហើយក៏មិនលើសពី ១០ ដែរ។
៣. វិធីប្ដូរចិត្តដោយមិនផ្ដោតលើអារម្មណ៍ខឹង ៖ អារម្មណ៍ពេលវាផ្ដោតខ្លាំងទៅលើរឿងអ្វីមួយ វាមានឥទ្ធិពលខ្លាំងដែលរុញច្រានការសម្រេចចិត្តបានយ៉ាងខ្លាំងក្លា។ នៅពេលអ្នកមានអារម្មណ៍ខឹង ត្រូវប្ដូរការគិត កុំគិតរឿងរ៉ាវដែលធ្វើឱ្យយើងខឹងបន្តទៅទៀត ឬប្ដូរសាច់រឿង ដោយនិយាយរឿងផ្សេង។
៤.បញ្ចេញកម្លាំងខ្លាំងៗដើម្បីបន្ធូរកំហឹង ៖ នៅពេលយើងមានអារម្មណ៍ខឹងនឹងសមាជិកក្នុងក្រុមគ្រួសារ មិត្តរួមការងារ ចៅហ្វាយ ឬនរណាម្នាក់ ឬអ្វីមួយក៏ដោយ យើងអាចបញ្ចេញ និងបន្ធូរកំហឹងដោយបញ្ចេញកម្លាំងដូចជា ការហាត់ប្រាណ លេងកីឡា ឬប្រឹងធ្វើការងារអ្វីដែលយើងកំពុងធ្វើ។ ការប្រើកម្លាំងដូចជា ជីកដី លើករបស់ ឬវត្ថុធ្ងន់ៗ ឬដើរញាប់ៗក្នុងរយៈពេលយូរក្នុងសួនច្បារជាដើម ធ្វើឱ្យរាងកាយអស់កម្លាំង និងធ្វើឱ្យកំហឹងខ្សោយចុះដែលធ្វើឱ្យយើងចង់សម្រាក និងគេង។ ពេលនោះកំហឹងនឹងស្ងប់ចុះរហូតដល់បាត់។
៥. បញ្ចេញកំហឹងដោយធ្វើការងារផ្ទះ ៖ ប្រសិនបើយើងមានកំហឹងទៅលើអ្វីមួយ លើខ្លួនឯង ឬនរណាម្នាក់ ចូរព្យាយាមបញ្ចេញកម្លាំងដោយធ្វើការងារផ្ទះដូចជា បោសសម្អាតបរិវេណខាងក្នុង និងខាងក្រៅ លាងចាន លាងសម្អាតឡាន ជូតកញ្ចក់ លាងបន្ទប់ទឹក ជូតកម្រាលឥដ្ឋ កាត់ស្មៅ ថែសួន និងតុបតែងផ្កាជាដើម។ សកម្មភាពនេះ នឹងធ្វើឱ្យយើងរីករាយ បំភ្លេចកំហឹង ហើយយើងនឹងទទួលបានផលចំណេញទាំងពីរ គឺកំហឹងក៏បាត់ កិច្ចការផ្ទះក៏បានស្អាតដែរ។៦. ស្រែកបញ្ចេញសំឡេងខ្លាំងៗ ៖ នៅពេលមានកំហឹង អារម្មណ៍មិនសប្បាយចិត្ត អ្នកអាចស្វែងរកកន្លែងស្ងាត់ ដើម្បីស្រែកឱ្យខ្លាំងៗដើម្បីបន្ធូរអារម្មណ៍តានតឹងទាំងនោះ ដោយប្រាកដថាទីកន្លែងដែលស្រែកនោះនៅឆ្ងាយ មានសុវត្ថិភាព និងពុំមានមនុស្ស។ ឧទាហរណ៍ នៅលើកំពូលភ្នំ មាត់សមុទ្រ ឬវាលស្រែជាដើម៕
