ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា លើកទឹកចិត្តឱ្យគ្រឹះស្ថានសិក្សារដ្ឋ និងឯកជនបង្កើតភាពជាដៃគូរវាងសាលានិងសាលាឱ្យបានកាន់តែច្រើន ដើម្បីសិក្សាអំពីភាពរីកចម្រើន (ឧត្តមានុវត្តន៍) និងបំពេញចន្លោះខ្វះខាតឱ្យគ្នាទៅវិញទៅមកទាំងផ្នែកគ្រប់គ្រង ទាំងវិធីសាស្ត្របង្រៀន ក្នុងទិសដៅតែមួយគត់ គឺការកសាងអនាគតកម្ពុជាឱ្យថ្កុំថ្កើង តាមរយៈការរួមគ្នាអភិវឌ្ឍធនធានមនុស្សឱ្យកាន់តែរឹងមាំ ដើម្បីធានាឧត្តមភាពការប្រកួតប្រជែងសេដ្ឋកិច្ច និងសម្រេចឱ្យបាននៅចក្ខុវិស័យអភិវឌ្ឍន៍ជាតិឆ្នាំ២០៣០ និង២០៥០។
ក្នុងពិធីសម្ភោធសាលារៀនអារីហ្សូន សាខាឫស្សីកែវថ្មី កាលពីថ្ងៃទី៥ ខែកុម្ភៈ ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ចំពោះការពង្រឹងការអប់រំផ្នែកឯកជន ក្រសួងនឹងជំរុញការអនុវត្តសេចក្តីណែនាំស្តីពី ការលើកកម្ពស់ការសិក្សាភាសាខ្មែរ និងវប្បធម៌ អរិយធម៌ខ្មែរ នៅតាមគ្រឹះស្ថានសិក្សាចំណេះទូទៅឯកជនដែលអនុវត្តកម្មវិធីសិក្សាអន្តរជាតិ។ ឯកឧត្តមបណ្ឌិតសភាចារ្យ បន្តថា ក្រសួងនឹងបន្តពិនិត្យ និងតាមដានលើការងារអនុវត្តកម្មវិធីសិក្សា និងដំណើរការប្រឡងនានាដើម្បីពង្រឹងគុណភាព វាយតម្លៃការគ្រប់គ្រង និងដំណើរការរបស់គ្រឹះស្ថានសិក្សាឯកជន។
រដ្ឋមន្ត្រីក្រសួងអប់រំ បញ្ជាក់បន្ថែមថា នៅក្នុងនីតិកាលទី៧នៃ រដ្ឋសភា ក្រសួងអប់រំ យុវជន និងកីឡា បន្តអនុវត្តកំណែទម្រង់សាលារៀន ដោយផ្តោតលើអភិបាលកិច្ចសាលារៀន និងការបង្កើនការចូលរួមរបស់មាតាបិតា និងសហគមន៍នៅក្នុងដំណើរការគ្រប់គ្រងនិងអភិវឌ្ឍសាលារៀន។ ទន្ទឹមគ្នានេះ ពង្រឹងគុណភាពអប់រំ តាមរយៈការអនុវត្តកំណែទម្រង់សាលារៀនយ៉ាងសកម្ម សំដៅទទួលបាននូវសាលារៀនល្អ នាយកសាលាល្អគ្រូបង្រៀនល្អ បរិស្ថានសាលារៀនល្អ និងមានការចូលរួមយ៉ាងផុលផុសពីសំណាក់សហគមន៍ គ្រួសារ និងអ្នកពាក់ព័ន្ធ។
ក្រសួងអប់រំ នឹងផ្តោតលើការរៀននិងបង្រៀនមុខវិជ្ជាភាសាខ្មែរ និងគណិតវិទ្យាថ្នាក់ដំបូងនៅកម្រិត បឋមសិក្សា ការរៀន និងបង្រៀនមុខវិជ្ជាគណិតវិទ្យា វិទ្យាសាស្រ្ត បច្ចេកវិទ្យា និងភាសាបរទេសនៅកម្រិតមធ្យមសិក្សាចំណេះទូទៅ រួមទាំងវិធីសាស្ត្របង្រៀនថ្មី៕
