ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីសំណេះសំណាលជាមួយលោកនាយក នាយិកាគ្រឹះស្ថានសិក្សា និងចែកសម្ភារសិក្សាដល់សិស្សរៀនពូកែថ្នាក់ទី ៣ ដល់ទី ៦ ទូទាំងស្រុកចំការលើ ខេត្តកំពង់ចាម កាលពីថ្ងៃទី១០ ខែកុម្ភៈ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡា បានលើកទឹកចិត្តឱ្យគ្រប់សាលារៀនទាំងអស់រៀបចំកម្មវិធីសិក្សាពេញមួយថ្ងៃ តាមរយៈការបង្កើតក្លឹបសិក្សា កម្មវិធីក្រៅម៉ោងសិក្សាជាដើម ។
ទន្ទឹមគ្នានេះ បើតាម ឯកឧត្តមរដ្ឋមន្រ្តី ការជំរុញសកម្មភាពរៀនច្រើន ចេះច្រើន នឹងមិនអាចខ្វះបានឡើយចំពោះការចូលរួមពីសហគមន៍ មាតាបិតា និងអ្នកអាណាព្យាបាល ដើម្បីសម្រេចគោលដៅអភិវឌ្ឍមូលធនមនុស្សប្រកបដោយគុណភាព និងឈានទៅសម្រេចចក្ខុវិស័យប្រែក្លាយជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០៣០។
រដ្ឋមន្ត្រីក្រសួងអប់រំ មានប្រសាសន៍ថា ក្រសួងអប់រំ កំពុងជំរុញកំណែទម្រង់វិស័យអប់រំឱ្យកាន់តែប្រសើរ ដោយផ្ដោតការយកចិត្តទុកដាក់លើការពង្រឹងធនធានមនុស្សតាំងពីវ័យកុមារ តាមរយៈការផ្តល់ជូននូវអាហារូបត្ថម្ភត្រឹមត្រូវ ក៏ដូចជាការរៀនតាមរយៈការលេង ដើម្បីបណ្ដុះបញ្ញាស្មារតី ភាពឆ្លាតវ័យ ដែលជាមូលដ្ឋានគ្រឹះធ្វើឱ្យកុមារឈានទៅស្រលាញ់ការសិក្សាពេញមួយជីវិត និងកាត់បន្ថយការបោះបង់ការសិក្សាពាក់កណ្តាលទី។
ឯកឧត្តមបណ្ឌិតសភាចារ្យ ហង់ជួន ណារ៉ុន បន្តថា ក្រសួងអប់រំ កំពុងបន្តអនុវត្តយុទ្ធសាស្ត្រកំណែទម្រង់វិស័យអប់រំតាមរយៈការអនុវត្តបន្តកែលម្អកម្មវិធីសិក្សា សៀវភៅសិក្សាគោល ការរៀបចំយន្តការវាយតម្លៃលទ្ធផលសិក្សាសិស្ស យន្តការធ្វើអធិការកិច្ចតាមសាលារៀន បង្កើតគម្រោងគ្រប់គ្រងសាលារៀនប្រកបដោយប្រសិទ្ធភាព ក៏ដូចជារៀនបចំការប្រកួតប្រជែងសាលារៀនគំរូ គ្រូល្អ នាយកសាលាល្អ និងសាលាស្អាតជាដើម។
ក្នុងគោលដៅពង្រឹងគុណភាពគ្រឹះស្ថានសិក្សារដ្ឋចាប់ពីថ្នាក់មត្តេយ្យសិក្សាដល់មធ្យមសិក្សា រាជរដ្ឋាភិបាលកម្ពុជា ក៏បានដាក់ចេញវិធានគន្លឹះចំនួន ៤ រួមមាន ទី១.ការពង្រឹងអភិបាលកិច្ចសាលារៀន, ទី២.ការពិនិត្យកែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របទៅតាមតម្រូវការក្នុងការពង្រឹងចំណេះដឹង វិន័យ សីលធម៌ និង ឥរិយាបថរបស់សិស្ស, ទី៣.ការយកចិត្តទុកដាក់លើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន និងទី៤. ការជំរុញ និងលើកទឹកចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ ។
គួរជម្រាបជូនថា ក្រសួងអ់រំ យុវជន និងកីឡា មានផែនការជំរុញការអនុវត្តកំណែទម្រង់វិស័យអប់រំតាមរយៈការបង្កើតសាលារៀនគំរូឱ្យបានពី ៥០០ ទៅ ១០០០ សាលារៀន ក្នុងរយៈពេល ២ឆ្នាំ ចាប់ពីឆ្នាំសិក្សា ២០២៤-២០២៥ និងឆ្នាំសិក្សា ២០២៥-២០២៦៕
