ភ្នំពេញ – ថ្លែងក្នុងពិធីអបអរសាទរទិវាពិភពលោកគ្មានថ្នាំជក់ ឆ្នាំ២០២៣ ក្រោមប្រធានបទ “យើងត្រូវការអាហារ មិនមែនថ្នាំជក់” កាលពីពេលថ្មីៗនេះ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអំពាវនាវដល់ស្ថាប័នពាក់ព័ន្ធទាំងអស់ ជាពិសេសគណៈកម្មាធិការត្រួតពិនិត្យផលិតផលថ្នាំជក់ បន្តជំរុញការអនុវត្តទីក្រុងគ្មានផ្សែងបារី និងជំរុញការអនុវត្តច្បាប់ស្តីពីការត្រួតពិនិត្យផលិតផលថ្នាំជក់ឱ្យមានប្រសិទ្ធភាពដើម្បីការអភិវឌ្ឍប្រកបដោយចីរភាព។

ឯកឧត្តមសាស្ត្រាចារ្យ ម៉ម ប៊ុនហេង មានប្រសាសន៍ថា ថ្នាំជក់ផ្តល់ផលប៉ះពាល់ជាច្រើនដល់សុខភាពសាធារណៈ ដែលបង្កជាជំងឺមិនឆ្លងនានាដូចជា ជំងឺមហារីក ជំងឺសរសៃឈាម និងបេះដូង ជំងឺសួត និងប៉ះពាល់ដល់សរីរាង្គទាំងអស់ ព្រមទាំងប៉ះពាល់ដល់សេដ្ឋកិច្ច បរិស្ថាន និងសង្គម។ ឯកឧត្តមសាស្ត្រាចារ្យ បន្តថា ក្រោមការដឹកនាំរបស់រាជរដ្ឋាភិបាលកម្ពុជា បានខិតខំប្រឹងប្រែងជំរុញការងារត្រួតពិនិត្យផលិតផលថ្នាំជក់ប្រកបដោយប្រសិទ្ធភាព ដើម្បីបង្ការជំងឺមិនឆ្លងនានា។ កិច្ចប្រឹងប្រែងទាំងនេះបានធ្វើឱ្យអត្រាប្រេវ៉ាឡង់ការប្រើប្រាស់ថ្នាំជក់ទាំងក្នុងចំណោមមនុស្សពេញវ័យ ១៥ឆ្នាំឡើង និងក្នុងចំណោមយុវវ័យអាយុ ១៣-១៥ ឆ្នាំ មានការថយចុះជាបន្តបន្ទាប់។

ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល

“ឆ្នាំនេះក្រសួងសុខាភិបាលមានមោទនភាពប្រារព្ធទិវាពិភពលោកគ្មានថ្នាំជក់ជាមួយនឹងក្រសួងអប់រំ យុវជន និងកីឡា ដែលទទួលបានពានរង្វាន់ពីអង្គការសុខភាពពិភពលោកសម្រាប់កិច្ចខិតខំប្រឹងប្រែងជំរុញយ៉ាងសកម្មក្នុងការងារអនុវត្តទីកន្លែងធ្វើការ និងទីកន្លែងសាធារណៈគ្មានផ្សែងបារី និងគ្រឹះស្ថានសិក្សាគ្មានផ្សែងបារី”

រដ្ឋមន្ត្រីក្រសួងសុខាភិបាលបន្ថែមថា ក្រសួងបានសហការជាមួយអាជ្ញាធរថ្នាក់ក្រោមជាតិជំរុញគំនិតផ្តួចផ្តើមទីក្រុងគ្មានផ្សែងបារី លើកទឹកចិត្តទីក្រុង ស្រុក ខេត្ត បង្កើតជាបណ្តាញទីក្រុងគ្មានផ្សែងបារី និងការពារជំងឺមិនឆ្លងនៅទូទាំងប្រទេស។ ទន្ទឹមគ្នានេះ ក្រសួងសុខាភិបាល និងគណៈកម្មាធិការអន្តរក្រសួងជំរុញការងារត្រួតពិនិត្យផលិតផលថ្នាំជក់ឆ្ពោះទៅបង្ការទប់ស្កាត់ជំងឺមិនឆ្លង និងសហការជាមួយភាគីពាក់ព័ន្ធបន្តខិតខំអនុវត្តច្បាប់ ស្តីពីការត្រួតពិនិត្យផលិតផលថ្នាំជក់ ពិសេសវិធានការចំពោះការផ្សាយពាណិជ្ជកម្មការផ្សព្វផ្សាយលក់ និងការឧបត្ថម្ភកម្មវិធីដោយឧស្សាហករថ្នាំជក់។

ក្នុងនោះក៏​មានវិធានការបោះពុម្ពសារព្រមានសុខភាពជាភាសាខ្មែរ និងជារូបភាពលើកញ្ចប់ផលិតផលថ្នាំជក់ និងសហការជាមួយក្រសួងសេដ្ឋកិច្ចនិងហិរញ្ញវត្ថុ តំឡើងពន្ធផលិតផលថ្នាំជក់ អប់រំ ផ្សព្វផ្សាយដល់ប្រជាជនឱ្យយល់ដឹងពីផលប៉ះពាល់របស់ថ្នាំជក់ ចូលរួមលះបង់ទម្លាប់ប្រើប្រាស់ផលិតផលថ្នាំជក់ និងទម្លាប់ដាំដំណាំថ្នាំជក់ជាដើម។

គួរជម្រាបជូនថា ការអង្កេតថ្នាក់ជាតិលើមនុស្សពេញវ័យស្តីពីថ្នាំជក់ ឆ្នាំ២០២១ បានបង្ហាញថា ការប្រើប្រាស់ផលិតផលថ្នាំជក់នៅប្រទេសកម្ពុជា មានការថយចុះអត្រាប្រវ៉ាឡង់ការជក់ថ្នាំជក់ក្នុងចំណោមមនុស្សពេញវ័យអាយុ ១៥ឆ្នាំឡើង ពី ១៧% ក្នុងឆ្នាំ២០១៤ មកត្រឹម ១៥% ក្នុងឆ្នាំ២០២១ និងអត្រាប្រេវ៉ាឡង់ការជក់បារីក៏មានការថយចុះពី ១៧% ក្នុងឆ្នាំ២០១៤ មកត្រឹម ១៣% ក្នុងឆ្នាំ២០២១៕