ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការជ្រើសរើសមុខវិជ្ជាសិក្សា ឬជំនាញ គឺជារឿងសំខាន់របស់យុវជន ក្រោយបញ្ចប់មធ្យមសិក្សា មុននឹងឈានចូលទៅក្នុងទីផ្សារការងារ ។ ដូច្នេះជំនាញដែលយុវជនជ្រើសរើស គួរតែភ្ជាប់យ៉ាងជិតស្និតទៅនឹងការងារ ឬមុខរបរទៅថ្ងៃអនាគត។ នេះជាការលើកឡើងរបស់អ្នកស្រី យូ បូរី ដែលគេស្គាល់ថា គឺជាអ្នកឯកទេសខាងប្រព័ន្ធ KPI ។
អ្នកស្រី យូ បូរី មានប្រសាសន៍ថា ប្រសិនបើសិស្ស ឬយុវជន ជ្រើសរើសជំនាញមួយដែលបង្កើតបរិយាកាសមិនស្របជាមួយនឹងចំណូលចិត្ត នោះវាអាចបណ្តាលឱ្យពួកគេមិនមានអារម្មណ៍ល្អ និងចង់បន្តការសិក្សានោះទេ ហើយថែមទាំងបង្កើតអារម្មណ៍ធុញថប់ នាំឱ្យបាត់បង់គំនិតច្នៃប្រតិដ្ឋ ថែមទៀត។
យ៉ាងណាក៏ដោយ បើតាមអ្នកស្រី យូ បូរី ប្រសិនបើសិស្សឬយុវជនខ្លួនឯងបានដឹងអំពីទ្រីស្ដី DISC មុននឹងជ្រើសរើសជំនាញ នោះពួកគេនឹងអាចជ្រើសជំនាញដែលត្រូវជាមួយនឹងចំណាប់អារម្មណ៍បានត្រឹមត្រូវក្នុងភាគរយច្រើន។ ហើយវាអាចលើកទឹកចិត្តឱ្យគាត់ចង់ធ្វើ និងរៀនបន្ត មិនងាយបោះបង់។
អ្នកស្រី បូរី បន្ថែមថា តាមរយៈទ្រីស្ដី DISC គេអាចដឹងថា តើរៀនយ៉ាងដូចម្តេចឱ្យឆាប់ចេះ និងឆាប់ចាំ ហើយអាចយកទៅប្រើប្រាស់ឱ្យត្រូវជំនាញបន្ថែមមួយកម្រិតទៀត។ ជារួមពេលដែលសិស្សដឹងអំពី DISC ធ្វើឱ្យពួកគេបង្កើននូវចំណង់ចំណូលចិត្តខ្លួនឯងនៅក្នុងការសិក្សាជំនាញ។
អ្នកស្រី យូ បូរី
” ទ្រីស្ដី DISC មានចំណុចលម្អិតជាច្រើន ដែលតម្រូវឱ្យស្រាវជ្រាបន្ថែមដោយខ្លួនឯង ហើយបើដឹងថាខ្លួនឯងស្ថិតនៅចំណុចណាមួយហើយ នោះវាងាយស្រួលក្នុងការសម្រេចចិត្តជ្រើសជំនាញសិក្សា”
អ្នកឯកទេសខាងផ្នែក KPI រូបនេះ សង្កត់ធ្ងន់ថា អ្វីដែលសំខាន់បំផុតនោះគឺ សិស្សត្រូវដឹងអំពីចំណង់ចំណូចចិត្តថា តើនៅពេលដែលពួកគេរៀននៅមធ្យមសិក្សាទុតិយភូមិ តើគេពូកែទៅលើមុខវិជ្ជាអ្វីខ្លះ? ឬក៏ចេះមុខវិជ្ជាអ្វីខ្លាំងជាងគេ? ចំណែកចំណាប់អារម្មណ៍ទៅលើការងាររបស់គេវិញ តើចាប់អារម្មណ៍ប្រភេទណា? ប៉ុន្តែក៏ត្រូវដឹងពីប្រភេទការងារដែលចូលចិត្តដែរ តាមរយៈការចេញទៅសង្គមខាងក្រៅឱ្យបានច្រើន។ ហើយត្រូវស្គាល់ពីនិស្ស័យខ្លួនឯងថា តើចូលចិត្តធ្វើការនៅតែមួយកន្លែង ឬចូលចិត្តការងារដែលមានការផ្លាស់ទីតាំង។ សូមកុំគិតថា រកការងារណាដែលស្រួលៗ ព្រោះរាល់ការងារទាំងអស់ សុទ្ធតែមានផលលំបាករៀងៗខ្លួន ដូច្នេះត្រូវរៀនសង្កេតអំពីខ្លួនឯងឱ្យបានច្រើន៕
