រាល់ពេលដែលជជែកទៅដល់ការប្តេជ្ញាឆ្នាំថ្មី ភាគច្រើនផ្តោតទោះលើមហិច្ឆតា ឬគោលដៅធំៗ និងការរៀបចំផែនការដែលមានភាពល្អឥតខ្ចោះ។ ប៉ុន្តែការផ្លាស់ប្តូររបត់ជីវិតក្នុងមួយឆ្នាំៗ មិនមែនពឹងអាស្រ័យលើ តែការកំណត់គោដៅប៉ុណ្ណោះទេ! តាមរយៈ Viome ដែលផ្តោតលើការអភិវឌ្ឍបុគ្គលិកលក្ខណៈ បានបង្ហាញ ៣សំណួរ សួរពេលធ្វើប្តេជ្ញាឆ្នាំថ្មីដើម្បីផ្លាស់ប្តូរ ដោយសំណួរទាំង៣នេះ គឺជា​ មូលដ្ឋានគ្រឹះដ៏សំខាន់ នៃការរកឱ្យឃើញនូវវត្ថុបំណងផ្ទាល់ខ្លួន និងជាការប្តេជ្ញាចិត្តសម្រាប់ឆ្នាំថ្មី ដែលអាចផ្តល់នូវអត្ថន័យមួយមានឥទ្ធិពលមិនត្រឹមតែផ្លាស់ប្តូរខ្លួនឯងទេ ប៉ុន្តែជាការគិតគួរទៅដល់ផលជះជាវិជ្ជមាន ចំពោះបរិយាកាសសង្គមដែលខ្លួនរស់នៅផងដែរ។

១. សកម្មភាពបែបនេះបានជួយអ្វីខ្លះ លើសពីតម្រូវការផ្ទាល់ខ្លួន? ការប្តេជ្ញាដែលមានគោលបំណងអភិវឌ្ឍន៍លើសពីតម្រូវការផ្ទាល់ខ្លួន ដែលមានន័យថា ការកែតម្រូវដើម្បីខ្លួនឯងផង និងសង្គមជាតិផង ដូចជាការគិតឱ្យលើសពីការបង្កើនភាពរីកចម្រើនរបស់ខ្លួនឯង និងគិតឱ្យលើសពីការទទួលបានប្រាក់ចំណូលផ្ទាល់ខ្លួន។ ការគិតបែបនេះ គឺជាកត្តារុញច្រានឱ្យកម្លាំងជំរុញចិត្តមានភាពមោះមុត និងមានទំនុកចិត្តជាមួយខ្លួនឯងជាងមុន។ ដូច្នេះ ការរក្សាការប្តេជ្ញាឱ្យមានភាពយូរអង្វែង គួរតែមានការផ្សារភ្ជាប់អំពីសកម្មភាពដែលផ្តល់ផលវិជ្ជមានជូនទៅកាន់សង្គមជាតិដែលខ្លួនរស់នៅ ដូចជារួមចំណែកកែលម្អសោភ័ណភាព ឬរួមចំណែកបង្កើនឱកាសការងារដល់អ្នកដទៃ ព្រោះការប្រកបរបចិញ្ចឹមជីវិត ឬការធ្វើការ ដែលមានការផ្សារភ្ជាប់ជាមួយកន្លែងដែលខ្លួនរស់នៅ គឺជាការពង្រឹងស្មារតីក្រុមផង និងជាការផ្សារភ្ជាប់វត្ថុបំណងផ្ទាល់ខ្លួនជាមួយនឹងសហគមន៍ដែលខ្លួនកំពុងរស់នៅផង។

២. ហេតុអ្វីបានជាត្រូវចាប់ផ្តើមពេលនេះ? បុគ្គលម្នាក់ៗ មានសកម្មភាពច្រើនដែលត្រូវធ្វើ និងមានពេលជាច្រើនដែលត្រូវជ្រើស! កាលដែលសួរខ្លួនឯងឱ្យហើយ មុននឹងចាប់ផ្តើមសម្រេចចិត្តដាក់សកម្មភាពណាមួយទៅក្នុងផែនការ គឺជាការដាស់តឿនខ្លួនឯង ឱ្យយកចិត្តទុកដាក់លើការត្រៀមខ្លួន និងការបែងចែកពេលវេលាឱ្យបានល្អិតល្អន់។ មួយវិញទៀត កាលដែលមានមូលហេតុច្បាស់លាល់ ក្នុងការចាប់ផ្តើមសកម្មភាពនីមួយៗ បានផ្តល់ភាពងាយស្រួលក្នុងការវិភាគអំពីលទ្ធភាព និងសមត្ថភាព ថា តើមានគ្រប់គ្រាន់កម្រិតណា ឬខ្វះខាតត្រង់ណា ក្នុងការចាប់ផ្តើមសកម្មភាពណាមួយ។

៣. ហេតុអ្វីខ្ញុំជាតួអង្គម្នាក់ដែលត្រូវសម្រេចធ្វើសកម្មភាពនេះ? ដាក់សំណួរបែបនេះទៅកាន់ខ្លួនឯង មិនត្រឹមតែជួយជំរុញឱ្យការវាយតម្លៃលើផែនការសកម្មភាពខ្លួន កាន់តែមានទម្ងន់ជាងមុននោះទេ! ប៉ុន្តែជាការបង្កើនថាមពលវិជ្ជមានទៅកាន់ខ្លួនឯង រួមទាំងផ្តល់ជាសារចំពោះខ្លួនឯងឱ្យយកចិត្តទុកដាក់ថែទាំ ទាំងសុខភាពផ្លូវកាយ និងសុខភាពផ្លូវចិត្ត ដើម្បីសម្រេចឱ្យបាននូវអ្វីដែលបានកំណត់៕