ក្នុងបាឋកថាពិសេស អបអរទិវាយុវជន ក្រោមប្រធានបទ “បញ្ញាសិប្បនិមិត្ត និងការអប់រំនៅកម្ពុជា” កាលពីថ្ងៃទី១២ ខែសីហា ឆ្នាំ២០២៣កន្លងទៅ ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា លើកឡើងថា គោលដៅនៃការអប់រំ គឺជាការបណ្ដុះធនធានមនុស្សប្រកបដោយគុណភាព ។ ជាមួយគ្នានេះ ក៏​ជាការបណ្ដុះអ្នកសិក្សាឱ្យមានស្វ័យភាព ដោយអាចរៀនដោយខ្លួនឯង រៀនបានពេញមួយជីវិត ធ្វើយ៉ាងណាចូលរួមចំណែកនៅក្នុងការអភិវឌ្ឍសេដ្ឋកិច្ច និងសង្គម។

ឯកឧត្ដមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា កន្លងមកក្រសួងអប់រំ បានបង្កើតសាលារៀនជំនាន់ថ្មី ជាសាលារៀនសម្រាប់អនាគតដែលវិនិយោគទឹកប្រាក់ចំនួន ១០លានដុល្លារក្នុងរយៈពេលជិត ១០ឆ្នាំកន្លងទៅនេះ ផ្ដោតលើសាលាចំនួន១១ ដោយ ទី១. កែលម្អបរិស្ថានសិក្សាឆ្លើយតបទៅនឹងសាលាសតវត្សរ៍ទី២១ ទី២. ពង្រឹងការគ្រប់គ្រងសាលារៀនឱ្យមានប្រសិទ្ធភាព ទី៣. ការប្រើប្រាស់បច្ចេកវិទ្យាក្នុងការរៀន និងការបង្រៀន និង៤. ការរៀបចំវិធីសាស្រ្តបង្រៀនឱ្យមានការស្រាវជ្រាវ និងការធ្វើការងារជាក្រុម។

រដ្ឋមន្ត្រីក្រសួងអប់រំបន្ថែមថា វិធីសាស្រ្តបង្រៀនដើរតួនាទីយ៉ាងសំខាន់នៅក្នុងការបណ្ដុះបំណិនសតវត្សទី២១ ដោយលែងរៀនដោយទន្ទេញចាំទៀតហើយ ប៉ុន្តែត្រូវរៀនដោយរិះរក ត្រូវរៀនដោយត្រិះរិះពិចារណា ត្រូវរៀនដោយផ្ដោតលើការដោះស្រាយបញ្ហា ត្រូវរៀនដោយផ្តោតទៅលើការបង្កើតថ្មី ធ្វើឱ្យមានស្វ័យសិក្សា បង្កើតក្លឹបសិក្សា។ ជាពិសេសផ្ដោតលើការរៀន និងបង្រៀនបច្ចេកវិទ្យា ឬហៅថា ស្ទែម មានន័យថា ការផ្ដោតទៅលើការរៀនបែបវិទ្យាសាស្រ្ត បច្ចេកវិទ្យា វិស្វកម្ម គណិតវិទ្យា ទាំងអស់នេះដើម្បីរួមចំណែកនៅក្នុងការអភិវឌ្ឍសេដ្ឋកិច្ចសង្គម ជាពិសេសការសម្រេចបាននូវយុទ្ធសាស្រ្ត និងគោលនយោបាយរបស់រាជរដ្ឋាភិបាលអំពីសង្គមឌីជីថល។

ឯកឧត្ដមបណ្ឌិតសភាចារ្យ ហង់ជួន ណារ៉ុន បញ្ជាក់បន្ថែមថា ក្រសួងអប់រំក៏បានបង្កើតនូវសាលាធនធាន រួមមាន បន្ទប់កុំព្យូទ័រ និងបន្ទប់បណ្ណាល័យ និងបន្ទប់ពិសោធន៍នានា ដើម្បីផ្ដល់ឱកាសឱ្យសិស្សានុសិស្សក្រេបជញ្ជក់យកនូវចំណេះដឹងថ្មីៗមិនមែនត្រឹមការទន្ទេញចាំនោះទេ គឺការរៀនដោយការពិសោធន៍នានាផងដែរ។

បើតាមឯកឧត្ដមបណ្ឌិតសភាចារ្យរដ្ឋមន្ត្រី ក្នុងរយៈពេល​៥ឆ្នាំកន្លងមកនេះ ក្រសួងអប់រំបានរៀបចំឱ្យមានសាលាគំរូចំនួន១រយ ហើយទៅអនាគតនឹងពង្រីកសាលាគំរូពី១រយនេះឱ្យដល់២ពាន់ ចាប់ពីកម្រិតកុមារតូចរហូតដល់ថ្នាក់ទី១២ ធ្វើយ៉ាងណាឱ្យសិស្សសិក្សានៅសាលារដ្ឋក៏អាចមានលទ្ធភាពរៀននៅក្នុងបរិបទសតវត្សរ៍ ទី២១ ផងដែរ៕