លើកឡើងក្នុងឱកាសខួបលើកទី២៤ ទិវាអន្តរជាតិសម្រាប់យុវជន ១២ សីហា ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា កម្ពុជាគាំទ្រយ៉ាងពេញទំហឹងលើការបណ្តុះបំណិនបៃតងសម្រាប់យុវជនដើម្បីឆ្ពោះទៅពិភពលោកប្រកបដោយនិរន្តរភាព។

ឯកឧត្តម ហង់ជួន ណារ៉ុន មានប្រសាសន៍ថា សម្រាប់ឆ្នាំ២០២៣នេះ អង្គការសហប្រជាជាតិ បានកំណត់យកមូលបទ «បំណិនបៃតងសម្រាប់យុវជន៖ ឆ្ពោះទៅពិភពលោកប្រកបដោយនិរន្តរភាព» សំដៅពញ្ញាក់ស្មារតីថ្នាក់ដឹក​នាំ និងកៀរគរការចូលរួមរបស់យុវជនឱ្យចាប់ផ្តើមគិតគូរអំពីភាពបៃតងរបស់ពិភពលោក បណ្តុះជំនាញសម្រាប់អនាគត និ​ង​ជំនាញសម្រាប់ការងារបៃតង ត្បិតថាការឆ្ពោះទៅរកពិភពលោកមួយដែលមាននិរន្តរភាពបរិស្ថាន និងមេត្រីភាពអាកាសធា​តុ​ពិភពលោក គឺមានសារៈសំខាន់មិនត្រឹមតែដើម្បីឆ្លើយតបទៅនឹងវិបត្តិអាកាសធាតុពិភពលោកប៉ុណ្ណោះទេ ប៉ុន្តែជាកត្តាជំរុ​ញ​ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាព (SDGs) ក្នុងឆ្នាំ២០៣០។

បើតាមប្រសាសន៍លើក​ឡើងរបស់ ឯកឧត្តមបណ្ឌិតសភាចារ្យ ហង់ជួន ណារ៉ុន បច្ចុប្បន្នសាកលលោកកំពុងមានការព្រួយបារម្ភចំពោះការពុះកញ្រ្ជោល នៃបម្រែបម្រួសអាកាសធាតុ វិបត្តិសង្គ្រាម អំពីគុណសម្បត្តិ និងគុណវិបត្តក្នុងការប្រើប្រាស់បញ្ញាសិប្បនិមិត្ត ដែលទាមទារឱ្យយុវជនត្រូវបន្សាំខ្លួន ពង្រឹងសមត្ថភាព បង្កើតបំណិន និងចេះនូវប្រើប្រាស់បច្ចេកវិទ្យា។

ឯកឧត្តមបណ្ឌិតសភាចារ្យរដ្ឋមន្រ្តី បន្ថែមថា ក្រសួងអប់រំ យុវជន និងកីឡា បានចូលរួមយ៉ាងសកម្មក្នុងការជម្រុញការអនុវត្តគោលដៅអភិវឌ្ឍប្រកបដោយនិរន្តភាព របស់អង្គការសហប្រជាជាតិ តាមរយៈការបង្កើតឱ្យមានសាលារៀនជំនាន់ថ្មី សាលាធនធាននៅតាមបណ្តាសាលារៀននៅតាមបណ្តាលខេត្ត និងដាក់ចេញនូវកម្មវិធីសិក្សាដែលមានទំនើបកម្ម វិទ្យាសាស្រ្ត សំដៅបណ្តុះបំណិន STEM បំណិនបៃតងដល់យុវជន ឆ្ពោះទៅរកការងារបៃតង សំដៅសេដ្ឋកិច្ចបៃតងក្នុងពេលអនាគត។

«យើងនៅតែការគ្រូល្អនៅពេលអនាគត ហើយបច្ចេកវិទ្យាបញ្ញាសិប្បនិមិត្តក៏មិនអាចជំនួសថ្នាក់រៀនបាននោះទេ តែបច្ចេកវិទ្យាបញ្ញាសិប្បនិមិត្ត ជាកត្តាជំនួយ»

ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា

គួរជម្រាបជូនថា គំនិតផ្តួចផ្តើមដំបូងនៃការប្រារព្ធទិវាអន្តរជាតិសម្រាប់យុវជន ត្រូវបានស្នើឡើងនៅឆ្នាំ១៩៩១ ដោយយុវជន ដែលបានជួបប្រជុំគ្នានៅទីក្រុងវីយ៉ែន (Vienna) ប្រទេសអូទ្រីស និងត្រូវបានអនុម័តក្នុងសន្និសីទពិភពលោករដ្ឋមន្រ្តីទទួលបន្ទុកយុវជន នាថ្ងៃទី១២ ខែសីហា ឆ្នាំ១៩៩៨។

យុវតី សុន បុប្ផារតនៈ មកពីវិទ្យាល័យស្វាយលើ ខេត្តសៀមរាប លើកឡើងថា ការចូលរួមរបស់យុវជនដែលប្រកបដោយចំណេះដឹង និងបំណិន ផ្លាស់ប្តូរប្រកបដោយភាពវិជ្ជមាន ដើម្បីរុញច្រានកម្ពុជាឈានឆ្ពោះទៅរកសង្គម និងពិភពលោកប្រកបដោយការអភិវឌ្ឍប្រកបដោយនិរន្តរភាព និងភាពបៃតង៕