ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីជួបសំណេះសំណាល និងពិនិត្យវឌ្ឍនភាពការអនុវត្តតេស្ត PISA នៅវិទ្យាល័យ ហ៊ុន សែន ស្វាយធំ ខេត្តសៀមរាប កាលពីពេលកន្លងទៅ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡា បានប្រាប់ពីគន្លឹះមួយចំនួនជួយឱ្យសិស្សទទួលបាននិទ្ទេសល្អៗក្នុងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ខាងមុខនេះ។
ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ដើម្បីសម្រេចបានលទ្ធផលសិក្សាកាន់តែប្រសើរ ជាពិសេសទទួលបាននិទ្ទេសល្អៗក្នុងការប្រឡងសញ្ញាបត្រមធ្យមសិក្សាទុតិយភូមិខាងមុខនេះ សាលារៀនត្រូវបន្តខិតខំប្រឹងប្រែងរកវិធីសាស្ត្របង្រៀនថ្មីៗ ដើម្បីឱ្យសិស្សឆាប់យល់ និងឆាប់ចាំ។ លើសពីនេះ រៀបចំកម្មវិធីរៀនពេញមួយថ្ងៃ បង្រៀនបំប៉នសិស្សខ្សោយ ធ្វើស្វ័យសិក្សា សិក្សាជាក្រុម រៀនបន្ថែមម៉ោង បង្កើតក្លឹបសិក្សាជាដើម និងសូមរៀនសូត្រស្វែងយល់បន្ថែមពីឧត្តមានុវត្តន៍របស់សាលាគំរូនានា។
រដ្ឋមន្ត្រីក្រសួងអប់រំ ក៏បានគូសបញ្ជាក់ពីសារៈសំខាន់នៃការចូលរួមគាំទ្រពីសំណាក់ លោកគ្រូ អ្នកគ្រូ មាតាបិតា អ្នកអាណាព្យាបាលសិស្ស និងភាគីពាក់ព័ន្ធទាំងអស់ និងសំខាន់បំផុត គឺការខិតខំប្រឹងប្រែងរៀនរបស់សិស្សដោយផ្ទាល់ ដោយត្រូវមានទម្លាប់ល្អក្នុងការប្រើបច្ចេកវិទ្យាថ្មីៗ ដើម្បីគាំទ្រដល់ការរៀនសូត្រ។ ជាពិសេស គឺត្រូវប្រើប្រាស់ទូរស័ព្ទប្រកបដោយការគិតពិចារណា និងការទទួលខុសត្រូវខ្ពស់។
ជាមួយគ្នានេះ ឯកឧត្តមបណ្ឌិតសភាចារ្យ ហង់ជួន ណារ៉ុន ក៏បានកោតសរសើរថ្លែងអំណរគុណយ៉ាងជ្រាលជ្រៅដល់លោកនាយក គណៈគ្រប់គ្រងសាលា លោកគ្រូ អ្នកគ្រូ និងភាគីពាក់ព័ន្ធ នៃវិទ្យាល័យ ហ៊ុន សែន ស្វាយធំដែលបានយកចិត្តទុកដាក់បំពេញភារកិច្ចការងារប្រកបដោយការទទួលខុសត្រូវខ្ពស់ ជាពិសេសសម្រេចបានអត្រាសិស្សប្រឡងជាប់សញ្ញាបត្រមធ្យមសិក្សាទុតិយភូមិ ៩៧.៥% កាលពីឆ្នាំកន្លងទៅ។ លើសពីនេះ ការប្ដេជ្ញាចិត្តខ្ពស់ក្នុងការអភិវឌ្ឍសាលារៀនឱ្យប្រែក្លាយជាវិទ្យាល័យគំរូនាពេលអនាគត។
ឯកឧត្តមបណ្ឌិតសភាចារ្យ ហង់ជួន ណារ៉ុន ក៏បានជូនពរឱ្យវិទ្យាល័យនេះទទួលបានលទ្ធផលល្អក្នុងការធ្វើតេស្តអន្តរជាតិ PISA ក៏ដូចជាសម្រេចបានលទ្ធផលអត្រាសិស្សជាប់កាន់តែច្រើន និងបាននិទ្ទេសល្អៗ សម្រាប់ការប្រឡងសញ្ញាបត្រមធ្យមសិក្សាទុតិយភូមិនាពេលខាងមុខ។
គួរជំរាបជូនថា ឆ្នាំ២០២៥នេះ វិទ្យាល័យ ហ៊ុន សែន ស្វាយធំ ខេត្តសៀមរាប ត្រូវបានក្រសួងអប់រំ ជ្រើសរើសចូលរួមក្នុងកម្មវិធីតេស្តអន្តរជាតិ PISA ដែលជាតេស្តវាស់វែងសមត្ថភាពសិស្សក្នុងវ័យ ១៥ឆ្នាំ លើផ្នែកអំណាន គណិតវិទ្យា និងវិទ្យាសាស្រ្ត ដើម្បីរង្វាយតម្លៃគុណភាពអប់រំ សម្រាប់ធ្វើការវិភាគស៊ីជម្រៅលើស្ថានភាពប្រព័ន្ធអប់រំទាំងមូល រួមទាំងប្រសិទ្ធភាពនៃការវិនិយោគលើប្រព័ន្ធអប់រំ៕
