ភ្នំពេញ – ក្រសួងអប់រំ យុវជន និងកីឡា កំពុងអប់រំផ្សព្វផ្សាយស្ដីពីវិធានការបង្ការជំងឺឆ្លង និងជំងឺមិនឆ្លង និងការស្វែងរកសេវាគាំទ្រសុខភាពផ្លូវចិត្តដល់បុគ្គលិកអប់រំវ័យចាស់ ។ ការបង្កើតសេវាគាំទ្រសុខភាពផ្លូវចិត្តនេះ ដើរតួនាទីយ៉ាងសំខាន់លើកកម្ពស់បុគ្គលិកសិក្សា និងសុខុមាលភាពសង្គម ព្រមទាំងជួយពង្រឹងដល់ការអនុវត្តគោលនយោបាយជាតិស្ដីពីមនុស្សវ័យចាស់របស់រាជរដ្ឋាភិបាលកម្ពុជា ។

ឯកឧត្តម ពិត ចំណាន រដ្ឋលេខាធិការប្រចាំការក្រសួងអប់រំ យុវជន និងកីឡា មានប្រសាសន៍ថា សិក្ខាសាលាអប់រំផ្សព្វផ្សាយស្ដីពីវិធានការបង្ការជំងឺឆ្លង និងជំងឺមិនឆ្លង និងការស្វែងរកសេវាគាំទ្រសុខភាពផ្លូវចិត្តដល់បុគ្គលិកអប់រំវ័យចាស់ក្នុងវិស័យអប់រំនឹងចូលរួមពង្រឹង និងពង្រីកកិច្ចគាំទ្រគោលនយោបាយជាតិស្ដីពីមនុស្សវ័យចាស់ ដើម្បីចូលរួមលើកកម្ពស់គុណភាពជីវិតរបស់មនុស្សចាស់នៅកម្ពុជា ។

ជាមួយគ្នានេះ ឯកឧត្តម ពិត ចំណាន រដ្ឋលេខាធិការប្រចាំការក្រសួងអប់រំ យុវជន និងកីឡា បានបញ្ជាក់ថា

“ក្រសួងអប់រំ យុវជន និងកីឡា ប្ដេជ្ញាចិត្តខ្ពស់ក្នុងការអប់រំផ្សព្វផ្សាយស្ដីពីវិធានការបង្ការជំងឺឆ្លង និងជំងឺមិនឆ្លង និងការស្វែងរកសេវាគាំទ្រសុខភាពផ្លូវចិត្តដល់បុគ្គលិកអប់រំវ័យចាស់ ដើម្បីចូលរួមអនុវត្តផែនការសកម្មភាព ២០១៨-២០៣០ និងគោលនយោបាយជាតិស្ដីពីមនុស្សវ័យចាស់២០១៧-២០៣០ របស់រដ្ឋាភិបាល ។”

បន្ថែមលើនេះ តាមរយៈការអនុវត្តគោលនយោបាយជាតិស្ដីពីមនុស្សវ័យចាស់ ក្រសួងអប់រំមានគោលបំណងផ្ដល់ការយល់ដឹងពីការថែទាំសុខភាពផ្លូវចិត្ត និងការស្វែងរកសេវាថែទាំសមស្រប និងទាន់ពេលវេលា សំដៅលើកកម្ពស់គុណភាពជីវិតរបស់មនុស្សវ័យចាស់ក្នុងវិស័យអប់រំនៅកម្ពុជា ។ កម្មវិធីនេះផ្ដល់ការយល់ដឹងពីការបង្ការជំងឺឆ្លង និងជំងឺមិនឆ្លង និងការស្វែងរកសេវាប្រឹក្សា និងអត្ថប្រយោជន៍នៃការថែទាំសុខភាពផ្លូវចិត្ត ព្រមទាំងផ្ដល់ការយល់ដឹងពីអាហារូបត្ថម្ភ និងរបបអាហារមានតុល្យភាពសម្រាប់មនុស្សវ័យចាស់ ដើម្បីរក្សាបាននូវបទដ្ឋានសុខភាពកាន់តែខ្ពស់ថែមទៀត។

គួរបញ្ជាក់ថា កន្លងទៅនៅក្នុងពិធីចុះហត្ថលេខាលើអនុស្សរណៈនៃការយោគយល់គ្នារវាងក្រសួងសង្គមកិច្ច អតីតយុទ្ធជន និងយុវនីតិសម្បទា និងអង្គការ UNDP ដើម្បីបង្កើនសមត្ថភាពស្ថាប័នអនុវត្តគោលនយោបាយជាតិស្ដីពីមនុស្សវ័យចាស់នៅកម្ពុជា ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា មានប្រសាសន៍ថា ការគោរព និងការយកចិត្តទុកដាក់ចំពោះមនុស្សវ័យចាស់ មានសារៈសំខាន់ណាស់សម្រាប់វប្បធម៌ខ្មែរ ។ ការធានាឱ្យមនុស្សចាស់រស់នៅប្រកបដោយគុណភាពកម្រិតខ្ពស់ តែងតែជាអាទិភាពជាយុទ្ធសាស្ត្ររបស់រាជរដ្ឋាភិបាល ។

ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា មានប្រសាសន៍ថា ៖ “ផ្អែកតាមគោលនយោបាយ ជាតិស្ដីពីមនុស្សវ័យចាស់ រាជរដ្ឋាភិបាលនឹងសហការជាមួយ UNDP ក៏ដូចជាដៃគូដទៃទៀត ដើម្បីលើកកម្ពស់សុខុមាលភាពមនុស្សវ័យចាស់នៅកម្ពុជា និងកសាងនូវប្រព័ន្ធគាំពារសង្គមដែលកាន់តែរស់រវើកមួយសម្រាប់គាំទ្រដល់ប្រជាជនគ្រប់រូបពេញមួយវដ្តជីវិតរបស់ពួកគេ ។”

សូមជម្រាបថា គោលនយោបាយជាតិស្ដីពីមនុស្សវ័យចាស់២០១៧-២០៣០ បានអនុម័តជាផ្លូវការកាលពីថ្ងៃទី២៥ ខែសីហា ឆ្នាំ២០១៧ ក្នុងកិច្ចប្រជុំពេញអង្គគណៈរដ្ឋមន្ដ្រី និងបានប្រកាសដាក់ឱ្យចាប់ផ្តើមអនុវត្តដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី១៨ ខែមករា ឆ្នាំ២០១៨ ។

តាមការបង្ហាញរបស់អង្គការ UNDP បានឱ្យដឹងថា កម្ពុជាគឺជាប្រទេសដែលមានប្រជាជនវ័យក្មេងជាងគេនៅអាស៊ីអាគ្នេយ៍ ហើយប្រជាជននៅក្នុងប្រទេសនេះក៏ កាន់តែមានវ័យចំណាស់ផងដែរ ។ ក្នុងឆ្នាំ២០១៩ ប្រជាជន ៨,៩% មានអាយុចាប់ពី៦០ឆ្នាំឡើងទៅកើនឡើងពី ៥,២៥% កាលពីរទសវត្សរ៍កន្លងទៅនេះ ។ គេរំពឹងថា តួលេខនេះនឹងកើនឡើងដល់២១% ក្នុងឆ្នាំ២០៥០ ។ និន្នាការទាំងនេះ មានន័យថា នៅក្នុងរយៈពេលច្រើនទសវត្សរ៍ខាងមុខនេះ ប្រជាជនឋិតក្នុងវ័យកម្លាំងពលកម្មនឹងត្រូវរ៉ាប់រងបន្ទុកជួយឧបត្ថម្ភគាំទ្រដល់ក្រុមមនុស្សវ័យចាស់កាន់តែមានចំនួនច្រើន ៕