ពេលជិតដាច់ឆ្នាំ ឬក៏ពេលចាប់ផ្តើមឆ្នាំថ្មី សកម្មភាពធ្វើផែនការ ឬការប្តេជ្ញាចិត្តសម្រាប់ការផ្លាស់ប្តូរនៅឆ្នាំថ្មី ចាប់ផ្តើមមានសន្ទុះកើនឡើងជាប្រចាំ។ ក្នុងនោះមានកត្តាជាច្រើនដែលនាំឱ្យយុវជន ឬអ្នកធ្វើការងារអាជីពមួយចំនួនចាំបាច់ធ្វើ។ សកម្មភាពទាំងនោះមានដូចជា ការចាកចេញពីភាពស្មុគស្មាញ ការផ្លាស់ប្តូរទម្លាប់ថ្មីៗ ឬការពន្លឿនផលិតភាពជាដើម តាមរយៈគេហទំព័រ VeryWell Mind បានបង្ហាញថា ការប្តេជ្ញាចិត្តទាំងអស់ជាចំណែកបង្ខិតខ្លួន ទៅកាន់ភាពជោគជ័យក្នុងរយៈពេលមួយដែលលឿន។ តែយ៉ាងណាមិនមែនរាល់ការកំណត់ ឬការប្តេជ្ញាទាំងអស់ សុទ្ធតែសម្រេចតាមបំណងទាំងអស់នោះទេ ប៉ុន្តែការរៀនសូត្រពីសកម្មភាពបរាជ័យ ក៏ជាដើមហេតុ នាំទៅរកភាពជោគជ័យនៅឆ្នាំបន្ទាប់ផងដែរ។ ដូច្នេះ តើមានកត្តាអ្វីខ្លះ ដែលជំរុញឱ្យការប្តេជ្ញាចិត្តក្នុងឆ្នាំថ្មីបរាជ័យ?

១. គិតធំពេក ៖ បញ្ហាចម្បង ឬបញ្ហាធំៗ ចំពោះការប្តេជ្ញាចិត្តក្នុងឆ្នាំថ្មី គឺការប្តេជ្ញាដោយរំពឹងទុកខ្លាំងពេក ដូចជាការបរិភោគអាហារដែលល្អគ្រប់ពេល និងការគេងស្របតាមកាលវិភាគបានទៀងទាត់រាល់ថ្ងៃជាដើម ព្រោះវាមើលទៅហាក់ដូចជាទម្លាប់មួយដែលមានភាពទាក់ទាញចំពោះខ្លួនឯង និងអ្នកដទៃ ខណៈការពិតជាក់ស្តែងវាពុំអាចសម្រេចបែបនេះបានទាំងស្រុងឡើយ ព្រោះកាលៈទេសៈការងារ ការដើរហើរ ក៏ដូចជាបរិយាកាសរបស់មនុស្សម្នាក់ៗ មានភាពខុសគ្នា ដូច្នេះនៅពេលដែលការប្តេជ្ញាចង់បានការផ្លាស់ប្តូរទាំងស្រុងពេក គឺអាចនាំទុក្ខដល់ស្ថានភាពផ្លូវចិត្តផ្ទាល់ខ្លួន។ ការកំណត់សកម្មភាពអ្វីមួយ គួរតែជាសកម្មភាពមួយ ដែលធ្លាប់បានសាកល្បងបានខ្លះៗហើយ រួមទាំងចាប់ផ្តើមក្នុងទំហំមួយសមល្មម។ ឧទាហរណ៍ចាប់ផ្តើម ដោយការបន្ថែមអាហារមានជីវជាតិទៅក្នុងការរស់នៅប្រចាំថ្ងៃជំនួសឱ្យចាប់ផ្តើមប្តូរភ្លាមៗទាំងស្រុង។

ជារួមប្រសិនបើពិតជាមានបំណងសម្រេចបាននូវគោលដៅសម្រាប់ឆ្នាំថ្មី គួរតែចាប់ផ្តើមពីរូបភាពតូចៗ ដូចជា ការអភិវឌ្ឍភាសាបរទេស ជាដំបូងគ្រាន់តែលះបង់ពេលប្រាំនាទីក្នុងមួយថ្ងៃ ដើម្បីពង្រឹងពាក្យពេចន៍ ក្នុងការប្រើប្រាស់ភ្ជាប់ជាឃ្លាប្រយោគ គឺចាត់ថាជាជោគជ័យមួយហើយ សម្រាប់ការផ្លាស់ប្តូរ។

២. មិនដឹងពីបុព្វហេតុដែលចង់ផ្លាស់ប្តូរ ៖ ក្នុងការជៀសវាងភាពបរាជ័យនៃការប្តេជ្ញាចិត្តសម្រាប់ឆ្នាំថ្មី ត្រូវដឹងរាល់ហេតុផលនីមួយៗ ដែលចង់ផ្លាស់ប្តូរ ឧទាហរណ៍ពេលទៅធ្វើលំហាត់ប្រាណ! គួរដាក់សំណួរសួរខ្លួនឯងសិនថា ហេតុអ្វីបានជាសកម្មភាពមួយនេះសំខាន់ចំពោះខ្លួនឯង? សួរបែបនេះ ដើម្បីរំឮកពីឬសគល់ដែលនាំឱ្យការអនុវត្តមានភាពយូរអង្វែង រួមទាំងការផ្លាស់ប្តូរមួយ ដែលស្របនឹងទស្សនៈវិស័យផ្ទាល់ខ្លួន។

៣. មិនទាន់ត្រៀមខ្លួនរួចរាល់ ៖ នៅមានហេតុផលមួយទៀតដែលនាំឱ្យការប្តេជ្ញាចិត្តមិនជោគជ័យគឺ ជ្រើសសកម្មភាពមកដាក់គោលដៅទាំងមិនបានត្រៀមខ្លួនរួចរាល់ ឬក៏មិនច្បាស់ថា ហេតុអ្វីត្រូវផ្លាស់ប្តូរ។ ការផ្លាស់ប្តូរអ្វីមួយមិនមែនចង់ដូរក៏ដូរបានភ្លាមៗទេ លុះត្រាតែដល់ដំណាក់កាល និងពេលវេលាទើបបណ្តាលឱ្យការប្តូរទាំងនោះមានប្រសិទ្ធភាព។ ដំណាក់កាលផ្លាស់ប្តូរ ត្រូវការយល់ និងមានចំណេះដឹងក្នុងការរៀបយុទ្ធសាស្រ្ត មានផ្នត់គំនិត និងចក្ខុវិស័យក្នុងការផ្លាស់ប្តូរយ៉ាងជាក់លាក់ និងការផ្ទៀងផ្ទាត់រាល់គ្រប់ដំណាក់កាលជាប្រចាំ។

៤. ការផ្លាស់ប្តូរក្នុងរយៈពេលវែង ៖ គោលដៅគេតែងវិភាគទាំងក្នុងរយៈពេលខ្លី និងក្នុងរយៈពេលវែង ដូច្នេះដើម្បីឱ្យការផ្លាស់ប្តូរមានស្ថិរភាព គួរតែបង្កើតការផ្លាស់ប្តូរក្នុងរយៈពេលវែង ហើយផែនការ ក្នុងរយៈពេលវែងគឺចង់សំដៅលើការបង្កើតផែនការសកម្មភាពទាំងឡាយណាផ្តល់ផលប្រយោជន៍នៅពេលអនាគត ឬពេលពីរទៅបីឆ្នាំខាងមុខ ជំនួសឱ្យការសម្លឹងឃើញតែផលប្រយោជន៍ក្នុងរយៈពេលខ្លី។ ជារួមគឺការវិនិយោគក្នុងបច្ចុប្បន្ន ដើម្បីប្រយោជន៍​នៅគ្រាខាងមុខ។​ ជាទូទៅការផ្លាស់ប្តូរវាពិបាក ប៉ុន្តែសមិទ្ធផលនៃការផ្លាស់ប្តូរ បានផ្តល់នូវផ្លែផ្កាមួយជាទីគាប់ចិត្តនៃខ្លួនឯង។ សកម្មភាពក្នុងការផ្លាស់ប្តូរទៀតសោធន៍ មិនមែនបញ្ចូលត្រឹមតែសកម្មភាពដែលអារម្មណ៍ចង់ធ្វើប៉ុណ្ណោះទេ ប៉ុន្តែគួរតែបញ្ជូលនូវសកម្មភាពដែល គួរតែ ឬត្រូវតែធ្វើ ដើម្បីភាពរីកចម្រើន៕