ការវាយតម្លៃចំណាត់ថ្នាក់សាកលវិទ្យាល័យ ដែលជំរុញគោដៅអភិវឌ្ឍប្រកបដោយចីរភាព (SDGs) បានល្អខុសពីការកំណត់ចំណាត់ថ្នាក់សាកលវិទ្យាល័យស្ដង់ដា (Standard University Rating) ព្រោះមិនផ្អែកលើ កេរ្តិ៍ឈ្មោះ ធនធាន លក្ខខណ្ឌនៃការចូលរៀន និងពានរង្វាន់ណូប៊ែល ដែលសាលាបានឈ្នះនោះទេ។ ប៉ុន្តែ គឺផ្អែកលើសកម្មភាពនៃការចូលរួមចំណែកចំពោះការអភិវឌ្ឍប្រកបដោយចីរភាព (SDGs)។

សាកលវិទ្យាល័យ Western Sydney បានទទួលចំណាត់ថ្នាក់លេខ១ ក្នុងនាមជាគ្រឹះស្ថានឧត្តមសិក្សា ដែលមានភាពជាអ្នកដឹកនាំក្នុងការអភិវឌ្ឍប្រកបដោយចីរភាព។ យោងតាម Times Higher Education លោក Barney Glover អនុអធិការបតី នៃសាកលវិទ្យាល័យ Western Sydney បានលើកឡើងថា ​បរិវេនសាខារបស់សាលានៅក្នុងតំបន់ Sydney’s Greater Western ទាំងអស់គឺ ផ្ដល់បទពិសោធក្នុងការអនុវត្តដោយផ្ទាល់អំពីបញ្ហាប្រឈមសំខាន់ផ្នែកនិរន្តរភាពនៅក្នុងសត្សវត្សរ៍ទី២១ ដែលមានដូចជា ការរីកចម្រើនដ៏ឆាប់រហ័សនៃទីក្រុង(rapid urban growth) ការកើនឡើងកម្ដៅទីក្រុងដោយសារសកម្មភាពមនុស្ស (Urban beat) និងការលើកកម្ពស់សមភាពសង្គម (entrenched inequalities)។

SDG5 ទាមទារឱ្យមានសមភាពយេនឌ័រ ចំណែក SDG10 ទាមទារឱ្យមានការកាត់បន្ថយវិសមភាពទូទៅ។ សាកលវិទ្យាល័យ Western Sydney បានបង្ហាញពីការប្ដេជ្ញាដោះស្រាយគោលដៅទាំងនេះ មិនគ្រាន់តែតាមរយៈការស្រាវជ្រាវប៉ុណ្ណោះទេ ប៉ុន្តែក៏ចូលរួមក្នុងសកម្មភាពដែរ។ បុគ្គលិកសិក្សាជាន់ខ្ពស់នៃសាកលវិទ្យាល័យ ៤៦ភាគរយ គឺជាស្ត្រី ហើយមាននិស្សិតចំនួន ៧ពាន់នាក់ ជាមនុស្សដំបូងក្នុងគ្រួសារ ដែលមានឱកាសរៀនបន្តថ្នាក់ឧត្តមសិក្សា។ ចំពោះលក្ខខណ្ឌក្នុងសកម្មភាពអាកាសធាតុ(SDG13) Hawkesbury Institute for the Environment នៃសាកលវិទ្យាល័យ Western Sydney បានប្រើថាមពលអគ្គីសនី មានប្រភពមកពីការកកើតឡើងវិញ ១០០ភាគរយ ព្រមទាំងប្ដេជ្ញាចិត្តក្នុងការកាត់បន្ថយការបញ្ចេញកាបូនឌីអុកស៊ីតទៅក្នុងបរិយាកាស។

ការចាត់ថ្នាក់សាកលវិទ្យាល័យ Impact Ranking ចំពោះសាកលវិទ្យាល័យ ដែលជំរុញការអភិវឌ្ឍ SDGs គឺផ្អែកលើលក្ខខណ្ឌចំនួន ៤ដូចជា ការស្រាវជ្រាវ ការបង្រៀន ការផ្សព្វផ្សាយអំពី SDG ទៅកាន់រដ្ឋាភិបាល ម្ចាស់អាជីវកម្ម និងសហគមន៍ឱ្យកាន់តែទូលំទូលាយ និងការគ្រប់គ្រងធនធានផ្ទាល់ខ្លួនរបស់ស្ថាប័ន។ តាមរយៈរបៀបនៃការវាយតម្លៃ គេបានរកឃើញសាកលវិទ្យាល័យចំនួន ១០មកពី៥ប្រទេសផ្សេងៗគ្នា ដែលមានភាពសកម្ម និងបានចូលរួមចំណែកយ៉ាងទូលំទូលាយចំពោះការអភិវឌ្ឍប្រកបដោយចីរភាព។ ក្នុងនោះ Universiti Sians Malaysia របស់ប្រទេសម៉ាឡេស៊ី ជាសាកលវិទ្យាល័យ ដែលមានមូលដ្ឋាននៅអាស៊ីអាគ្នេយ៍តែមួយគត់ ដែលទទួលបានចំណាត់ថ្នាក់ទី៤។

យ៉ាងណាមិញ សាកលវិទ្យាល័យមកពីប្រទេសកាណាដាឈានមុខគេក្នុងការជំរុញការអភិវឌ្ឍ SDGs ដោយមានសាកលវិទ្យាល័យចំនួន៤ ក្នុងចំណោមសាកលវិទ្យាល័យលំដាប់កំពូល១០ ហើយមានសាកលវិទ្យាល័យចំនួន១៦ ក្នុងចំណោម១០០ ដែលតាមពីក្រោយដោយប្រទេសអូស្ត្រាលី មានសាកលវិទ្យាល័យចំនួន៣ ក្នុងចំណោមសាកលវិទ្យាល័យកំពូលទាំង១០ និងមានសាកលវិទ្យាល័យ១៥ ក្នុងបញ្ជីសាកលវិទ្យាល័យកំពូលទាំង ១០០។ គួរជម្រាបជូនថា ការវាយតម្លៃចំណាត់ថ្នាក់សាកលវិទ្យាល័យ ដែលបានចូលរួមចំណែកក្នុងការជំរុញគោលដៅ SDGs ក្នុងឆ្នាំ ២០២៣ គឺជាលើកទី៥ និងមានការចូលរួមពីសាកលវិទ្យាល័យចំនួន ១,៧០៥ មកពី១១៥ប្រទេសជុំវិញពិភពលោក។ ទន្ទឹងនឹងនេះ មានគ្រឹះស្ថានឧត្តមសិក្សាជាច្រើនទៀត កំពុងប្តេជ្ញាក្នុងការជំរុញគោលដៅអភិវឌ្ឍ SDGs របស់អង្គការសហប្រជាជាតិ៕