ភ្នំពេញ – ថ្លែងក្នុងពិធីបើកទិវាសៀវភៅកុមារអន្តរជាតិលើកទី៨ ​ដែលរៀបចំដោយសមាគម IBBY នៃកម្ពុជា ក្នុង​បរិវេណ​វិទ្យាល័យ​បឹង​ត្របែក នាព្រឹកថ្ងៃទី០២ ខែមិថុនា ឆ្នាំ២០២៣ លោកជំទាវ ទន់ សាអ៊ីម អនុរដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា សៀវភៅគឺជាគ្រូល្អ មិត្តល្អ មានសៀវភៅល្អដូចមានអ្នកបំភ្លឺផ្លូវដ៏ល្អ។

លោកជំទាវ ទន់ សាអ៊ីម អនុរដ្ឋលេខាធិការក្រសួងអប់រំ យុវជន និងកីឡា បន្ថែមថា សៀវភៅអាចជាគ្រូរបស់យើងដែលជួយផ្ដល់ចំណេះដឹង ហើយក៏អាចជាមិត្តនៅពេលដែលយើងមានអារម្មណ៍មិនល្អ នៅពេលយើងមើលសៀវភៅបានធ្វើឱ្យប្រសើរក្នុងអារម្មណ៍ដែលនាំឱ្យមានភាពស្រស់ស្រាយឡើងវិញ គឺប្រៀបដូចជាយើងបានជួបមិត្តភក្ដិរបស់យើងដែរ។ លោកជំទាវ ទន់ សាអ៊ីម បន្តថា សៀវភៅក៏ជាភ្លើងបំភ្លឺផ្លូវ នៅពេលយើងងងឹត ព្រោះនៅពេលបានរៀនប្រៀបបានពន្លឺបំភ្លឺ ដោយនៅពេលយើងបានអាន យើងក៏អាចយកចំណុចណាមួយពីសៀវភៅមកអនុវត្តក្នុងជីវិតឱ្យប្រសើរ។

អនុរដ្ឋលេខាធិការក្រសួងអប់រំ បន្ថែមថា សៀវភៅជាឃ្លាំងប្រាជ្ញា និងជាធនាគារនៃគំនិត។ លើសពីនេះ សៀវភៅ គឺជាអ្វីដែលជួយដោះស្រាយបញ្ហានៅពេលយើងជួបបញ្ហា កាលណាយើងអានច្រើនយើងមានគំនិតច្រើន កាលណាយើងជួបបញ្ហាយើងមានវិធីដោះស្រាយ ដែលនេះជារសជាតិរបស់សៀវភៅ។ ក្នុងនោះ ខ្លឹមរបស់សៀវភៅកាន់តែធ្វើឱ្យយើងមានការវិវឌ្ឍរីកចម្រើនដោយខ្លួនឯងដោយមិនដឹងខ្លួន។

លោកជំទាវ ទន់ សាអ៊ីម អនុរដ្ឋលេខាធិការក្រសួងអប់រំ យុវជន និងកីឡា

“កុំគិតថាស្អែកសឹមអាន អានពីពេលឥឡូវ អានពីពេលនេះ អានមួយបន្ទាត់ អានមួយទំព័រ អានមួយកថាខណ្ឌ អានរាល់ថ្ងៃអ្នកនឹងកើននូវចំណេះដឹងសម្បូរបែប ព្រោះបើយើងភ្លេចអានយើងនឹងរុះរោយ។ ដូច្នេះ ត្រូវតែខំអានឱ្យបានជារៀងរាល់ថ្ងៃ”

ជាមួយគ្នានេះ លោក ស៊ុន ប៊ុណ្ណា ប្រធាននាយកដ្ឋានអភិវឌ្ឍកម្មវិធីសិក្សា មានប្រសាសន៍ថា ការរៀបចំទិវាសៀវភៅកុមារអន្តរជាតិឆ្នាំនេះ បានរួមចំណែកក្នុងការស្ដារឡើងវិញ និងបណ្ដុះទម្លាប់អានរបស់ពលរដ្ឋខ្មែរដែលមិនគិតអំពីវ័យចាស់ ឬក្មេងនោះទេ គឺជំរុញលើកទឹកចិត្តកុមារឱ្យអាន និងឱ្យស្គាល់ថា តើយើងជានរណា? យើងមានអ្វីខ្លះដែលជារបស់យើង? ឧទាហរណ៍ យើងអាន យើងដឹងពីវប្បធម៌ អក្សរសាស្រ្ត ទំនៀមទម្លាប់ ប្រពៃណីជាតិរបស់យើង។

លោក ស៊ុន ប៊ុណ្ណា ប្រធាននាយកដ្ឋានអភិវឌ្ឍកម្មវិធីសិក្សា

“ខ្ញុំពិតជាមានមោទនភាព និងសេចក្ដីរីករាយបំផុត ដែលយើងបានរៀបចំការតាំងពិព័រណ៌សៀវភៅ និងរំលឹកឡើងវិញនូវទិវាសៀវភៅកុមារអន្តរជាតិលើកទី៨ ឆ្នាំនេះ”

ប្រធាននាយកដ្ឋានអភិវឌ្ឍកម្មវិធីសិក្សា បញ្ជាក់បន្ថែមថា ការអានសៀវភៅដែលឆ្លងកាត់តាមរបៀបតាំងពិព័រណ៌ នឹងជំរុញឱ្យក្មេងដឹងរបៀបជ្រើសរើសសៀវភៅសម្រាប់អាន ហើយអ្នកនិពន្ធក៏ខិតខំនិពន្ធសៀវភៅស្របទៅតាមកម្រិតអានរបស់កុមារ ដើម្បីឱ្យក្មេងមានការយល់ដឹងពីគុណតម្លៃនៃការអានសៀវភៅផងដែរ។

លោកស្រី ហ៊ុយ ឆេង រតនា ជាតំណាងសមាគម IBBY នៃកម្ពុជា បានលើកឡើងថា ការរៀបចំទិវាសៀវភៅកុមារអន្តរជាតិ គឺជាផ្នែកមួយនៃសកម្មភាពជាច្រើនផ្សេងទៀតរបស់ IBBY អន្តរជាតិ ក៏ដូចជា IBBY កម្ពុជា។ ទន្ទឹមគ្នានេះ ទិវាសៀវភៅកុមារអន្តរជាតិបានប្រារព្ធឡើងជាលើកដំបូងនៅឆ្នាំ២០១៣ និងរៀបចំនៅឆ្នាំបន្តបន្ទាប់ទៀត ប៉ុន្តែដោយសារវិបត្តិនៃជំងឺកូវីដ-១៩ ក៏បានខកខានប្រារព្ធធ្វើចំនួន៣ឆ្នាំបន្តបន្ទាប់គ្នា។ លោកស្រី បន្តថា សម្រាប់ទិវាសៀវភៅកុមារអន្តរជាតិលើកទី៨ ឆ្នាំនេះ មានស្តង់សៀវភៅចូលរួមចំនួន ២៨ស្ដង់ ក្នុងនោះមានស្ដង់គ្រឹះស្ថានបោះពុម្ភផ្សាយសៀវភៅរឿងសម្រាប់កុមារចំនួន១១ និងស្តង់សៀវភៅយុវវ័យចំនួន១១។

គួរជម្រាបជូនថា ទិវាសៀវភៅកុមារអន្តរជាតិលើកទី៨ នឹងប្រារព្ធឡើរយៈពេលបីថ្ងៃ គឺចាប់ពីថ្ងៃទី០២ដលថ្ងៃទី០៤ ខែមិថុនា ឆ្នាំ២០២៣ មានសកម្មភាពដូចជា ការសម្ដែងរឿងខ្លីសម្រាប់កុមារ ការបង្ហាញសមត្ថភាពរបស់កុមារ ពិភពនិមិត្ត សកម្មភាពបណ្ណាល័យចល័ត សំណួរល្បងប្រាជ្ញា ការសេរតាមអាន ការប្រឡងប្រកបអក្សរ ការនិទានរឿងដោយប្រើកាមិសៃបៃ ការបត់រូបភាពសត្វអូកាមិ អំណានសេរី ផាត់ពណ៌ និងគូររូបជាដើម៕