កាលពីថ្ងៃទី១៧ ខែកញ្ញា ឆ្នាំ​២០២៣ គណៈកម្មាធិការ​បេតិកភណ្ឌពិភពលោក នៃអង្គការ​យូណេស្កូ បានសម្រេច​ជា​ឯកច្ឆ័ន្ទចុះ «រមណីយដ្ឋានប្រាសាទកោះកេរ» ទៅក្នុង​បញ្ជីបេតិកភណ្ឌពិភពលោក តាមរយៈសេចក្តីសម្រេច 45 COM 8B.8 នៅក្នុងសម័យ​ប្រជុំ​លើកទី៤៥ របស់ខ្លួន ឯទីក្រុងរីយ៉ាដ (Riyadh) ប្រទេស​អារ៉ាប៊ីសាអ៊ូឌីត តាមសំណើរបស់រាជរដ្ឋាភិបាលកម្ពុជា។

តាមរយៈសារជូនចំពោះជនរួមជាតិកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានលើក​ឡើងថា ព្រឹត្តិការណ៍ថ្មីនេះ គឺជាមោទកភាពមួយ​ទៀត​សម្រាប់ប្រជាពលរដ្ឋ និង​ព្រះរាជាណាចក្រ​កម្ពុជាយើង ដែលកេរមរតកវប្បធម៌​អតីតរាជធានីខ្មែរបុរាណ ឆោកគគ៌រ្យ ឬសិង្គបុរេ ហើយបច្ចុប្បន្ន​ហៅថា កោះកេរ កសាង​ក្នុងសតវត្សទី១០ (៩២៨-៩៤៤)​ ដោយព្រះបាទជ័យវរ្ម័នទី៤ និង​បុព្វបុរសខ្មែរ ត្រូវ​បានក្រុមប្រឹក្សា​អន្តរជាតិស្តីពីប្រាង្គប្រាសាទ និង​រមណីយដ្ឋាន (ICOMOS) ទទួលស្គាល់ថា ជាកំពូល​ស្នាដៃ​ដ៏​មហស្ចារ្យ នៃស្ថាបត្យកម្មខ្មែរ និង​មាន​តម្លៃលេចធ្លោ​ជាសកល​ដែលចាំបាច់​ត្រូវ​ចុះ​ក្នុង​បញ្ជី​បេតិកភណ្ឌពិភពលោក។

បើតាមការបញ្ជាក់របស់សម្តេចធិបតី ដូចករណីមុនៗដែរ ការស្នើសុំចុះ «រមណីយដ្ឋានប្រាសាទកោះកេរ» ទៅក្នុង​បញ្ជី​បេតិកភណ្ឌពិភពលោក គឺជាលទ្ធផល នៃកិច្ច​ដំណើរ​ការងារដ៏យូរ និង​លំបាកស្មុគស្មាញ ដោយ​មានការចូលរួមពីភាគីពាក់ព័ន្ធជាច្រើន ជាពិសេស​ការរៀបចំឯកសារ ការ​ត្រួតពិនិត្យ និង​វាយតម្លៃ​ដោយ​អ្នកជំនាញការជាតិ និង​អន្តរជាតិ បានប្រព្រឹត្តទៅ​ក្នុង​ដំណាក់​កាលដែលកម្ពុជា និង​ពិភពលោកទាំងមូល​កំពុងប្រយុទ្ធប្រឆាំង​នឹងជំងឺកូវីដ១៩។ សម្តេចបន្តថា ដំណើរការដ៏ស្វិតស្វាញនេះ បានឆ្លុះបញ្ចាំង​យ៉ាងច្បាស់អំពីឆន្ទៈដ៏មោះមុតរបស់រាជរដ្ឋាភិបាល​កម្ពុជា ក្នុង​ការ​បញ្ជាក់ពីតម្លៃ​ដ៏​មហាសាល នៃសម្បត្តិវប្បធម៌របស់កម្ពុជា ជាពិសេស​សម្រេចឱ្យ​បាន​នូវ​ការ​ចុះបញ្ជី «រមណីយដ្ឋានប្រាសាទកោះកេរ» ទៅក្នុង​បញ្ជីបេតិកភណ្ឌពិភពលោក​ សម្រាប់ជាសម្បត្តិ​មនុស្សជាតិទាំងមូល និង​ការពង្រឹងមោទកភាពជាតិ។

សម្តេចនាយករដ្ឋមន្រ្តីបន្តថា ការ​កសាងនូវ​ឯកសារ​ស្នើ​សុំ​ចុះ​បញ្ជី គឺបានចាប់ផ្តើម​តាំងពីឆ្នាំ​២០១៨មក​ម្ល៉េះ ដោយ​ឆ្លង​កាត់​ការ​រៀបចំត្រួតពិនិត្យ និង​វាយតម្លៃជាបន្ត​បន្ទាប់ ដោយ​មន្រ្តីជំនាញ​អាជ្ញាធរជាតិ​ព្រះវិហារ និង​មន្រ្តីជំនាញ​ក្រោម​ឱវាទ​ក្រសួងវប្បធម៌ និងវិចិត្រសិល្បៈ ព្រមទាំង​ការ​ពិគ្រោះ​យោបល់​ជាមួយ​អ្នកជំនាញ​អន្តរជាតិ​ រហូត​ឆ្នាំ​២០២០ ទើប​ឯកសារ​នេះ បានលេចចេញជារូបរាងឡើង ស្របទៅ​តាមអនុសញ្ញាស្តីពី​ការ​ការពារបេតិកភណ្ឌពិភពលោក​វប្បធម៌ និង​ធម្មជាតិ មុន​នឹង​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រ​កម្ពុជា អាណត្តិទី៦ កន្លងទៅ​ បានសម្រេច​លើក​សំណើ​ជាផ្លូវ​ការ​ទៅ​មជ្ឈមណ្ឌល​បេតិកភណ្ឌពិភពលោក នៃអង្គការយូណេស្កុ កាលពីខែមករា ឆ្នាំ​២០២១។

ផ្អែក​លើសំណើរបស់រាជរដ្ឋាភិបាល​កម្ពុជា មជ្ឈមណ្ឌលបេតិកភណ្ឌពិភពលោករបស់អង្គការយូណេស្កុ បាន​បញ្ជូនអ្នកជំនាញ​ការ​អន្តរជាតិ នៃក្រុមប្រឹក្សា​អន្តរជាតិស្តីពី​ប្រាង្គប្រាសាទ និង​រមណីយដ្ឋាន មក​ធ្វើការវាយតម្លៃដោយ​ផ្ទាល់​នៅ​រមណីយដ្ឋាន​ប្រាសាទកោះកេរ កាលពីខែកញ្ញា ឆ្នាំ​២០២១ ហើយរហូត​ដល់ខែមីនា ឆ្នាំ​២០២២ ទើបសម្រេចទទួលយកនូវ​សំណើ​ចុះ​បញ្ជី «រមណីយដ្ឋានប្រាសាទកោះកេរ» ទៅ​ដាក់ក្នុងរបៀបវារៈសម័យ​ប្រជុំ​លើកទី៤៥ របស់ខ្លួន​នៅទីក្រុង​រីយ៉ាដ នៃប្រទេស​អារ៉ាប់ប៊ីសាអ៊ូឌីត ហើយ​ក៏​ត្រូវ​បាន​គណៈកម្មាធិការ​បេតិកភណ្ឌពិភពលោក​សម្រេច​ចុះ «រមណីយដ្ឋានប្រាសាទកោះកេរ» ក្នុងបញ្ជីបេតិកភណ្ឌពិភពលោក​នៅ​ថ្ងៃទី១៧ ខែកញ្ញា ឆ្នាំ​២០២៣។

ដើម្បីអបអរសាទរព្រឹត្តិការណ៍ជាប្រវត្តិសាស្រ្តនេះ សម្តេចធិបតីនាយករដ្ឋមន្រ្តី បានធ្វើការ​ណែនាំដល់គ្រប់ក្រសួង ស្ថាប័ន នៃរាជរដ្ឋាភិបាលនៅថ្នាក់ជាតិ និង​គ្រប់ស្ថាប័ននៅថ្នាក់ក្រោមជាតិ ព្រមទាំងអំពាវនាវ​ដល់​ជនរួមជាតិ​កម្ពុជាគ្រប់រូប រួមគ្នាធ្វើ​ការ​វាយគង ទូងស្គរ ទះប៉ោត និង​គោះត្រដោក តាមគ្រប់មធ្យោបាយ​ដែលខ្លួនមាន នៅ​ម៉ោង ៧ព្រឹក នាថ្ងៃទី២០ ខែកញ្ញា ឆ្នាំ២០២៣ នៅគ្រប់ទីកន្លែងសាធារណៈសំខាន់ៗ រួមមានទីស្តីក្រសួងស្ថាប័ន និងអង្គភាព គ្រប់សាលារាជធានីខេត្ត គ្រប់សាលាក្រុង-ស្រុក-ខណ្ឌ គ្រប់សាលាឃុំ-សង្កាត់ គ្រប់វត្តអារាម និង​សាលាបុណ្យ ព្រមទាំងគ្រប់ទីប្រជុំសហគមន៍​នៅ​តាមភូមិ​ឱ្យ​បានកុះករ ខ្ញៀវខ្ញារ ប្រកបដោយទឹកចិត្តមោទនៈ និង​សប្បាយរីករាយចំពោះព្រឹត្តិការណ៍ជាប្រវត្តិសាស្រ្តនេះ៕