លើក​ឡើង​ក្នុងកិច្ចប្រជុំជាមួយធនាគារពិភពលោក ស្តីពីគម្រោងកែលម្អការអប់រំឧត្តមសិក្សាទី២ (HEIP2) កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ការវិនិយោគលើឧត្តមសិក្សា បានជួយឱ្យកម្ពុជាដោះស្រាយបញ្ហាពាក់ព័ន្ធនឹងការធ្វើការខុសជំនាញ (Skills mismatch)។

ឯកឧត្តមបណ្ឌិតសភាចារ្យ​មានប្រសាសន៍ថា បច្ចុប្បន្ន គម្រោងបាននិងកំពុងផ្តោតលើការពង្រឹងគុណភាពអប់រំឧត្តមសិក្សាតាមរយៈការលើកកម្ពស់គុណវុឌ្ឍិវិជ្ជាជីវៈសាស្ត្រាចារ្យ នៅវិទ្យាស្ថានឧត្តមសិក្សាមួយចំនួនក្នុងទីក្រុងភ្នំពេញ កំពង់ស្ពឺ បាត់ដំបង ស្វាយរៀង និងក្រុងព្រះសីហនុ។

ឧបនាយករដ្ឋមន្ត្រី រដ្ឋមន្ត្រីក្រសួងអប់ បន្ថែមថា វិទ្យាស្ថានឯកទេសនីមួយៗ បានផ្សារភ្ជាប់ការអនុវត្តជាក់ស្តែងទៅតាមវិស័យនៅរោងចក្រនានា ក្នុងតំបន់សេដ្ឋកិច្ចពិសេស (Special Economic Zone) និងបានបង្កើតឱ្យមានកម្មវិធីសិក្សាថ្មីៗ ពាក់ព័ន្ធនឹង ICT ដូចជា Cyber Security បញ្ញាសិប្បនិម្មិត (AI) ជំនាញពាក់ព័ន្ធនឹងប្រព័ន្ធអេឡិចត្រូនិកជាដើម ។ លើសពីនេះ ក៏កំពុងផ្តោតលើការលើកម្ពស់ការអប់រំស្ទែម ការបណ្តុះបណ្តាល Skilled Labors ដើម្បីបន្តទាក់ទាញការវិនិយោគមកកម្ពុជាបន្ថែមទៀត ក៏ដូចជាឆ្លើយតបនឹងទីផ្សារការងារបច្ចុប្បន្ន និងអនាគត។

បើតាម ឯកឧត្តមបណ្ឌិតសភាចារ្យ ហង់ជួន ណារ៉ុន បច្ចុប្បន្ន​ក្រសួងអប់រំ បាននិងកំពុងបន្តការអនុវត្តកំណែទម្រង់ឧត្តមសិក្សា ស្របតាមយុទ្ធសាស្ត្រ បញ្ចកោណដំណាក់កាលទី១ នៃរាជរដ្ឋាភិបាលអាណត្តិទី៧ ដែលមុំទី១ គឺផ្តោតលើការអភិវឌ្ឍមូលធនមនុស្ស និងមុំទី៥ ៖ ការអភិវឌ្ឍបច្ចេកវិទ្យាឌីជីថល ដោយផ្តោតលើ ៖ (១) ការបង្កើតមជ្ឈមណ្ឌលឧត្ដមភាព (២) ការពង្រឹងអភិបាលកិច្ច និងសមត្ថភាពស្ថាប័ន (៣) ទំនើបកម្មកម្មវិធីសិក្សា និងការលើកកម្ពស់ប្រសិទ្ធភាពនៃការបង្រៀន និងរៀន (៤) ការពង្រឹងការសិក្សាស្របតាមលក្ខណៈអន្តរជាតិ (៥) ការពង្រឹងប្រព័ន្ធអេកូឡូស៊ីស្រាវជ្រាវក្នុងការអប់រំឧត្ដមសិក្សា និង (៦) បង្កើនចំនួនសិស្សចូលរៀន។

រដ្ឋមន្ត្រីក្រសួងអប់ លើកឡើងថា សម្រាប់សមិទ្ធផលសម្រេចកន្លងមករបស់គម្រោងកែលម្អការអប់រំឧត្តមសិក្សា​ទី២ (HEIP2) រួមមាន (១). កែលម្អគុណភាព និងភាពពាក់ព័ន្ធនៃកម្មវិធីសិក្សា (២). កែលម្អលទ្ធភាពទទួលបាន និងសមធម៌ (៣). គាំទ្រការស្រាវជ្រាវផ្នែក STEM និងកសិកម្ម (៤). គាំទ្រមូលនិធិស្រាវជ្រាវជាតិ រៀបចំនីតិវិធីស្រាវជ្រាវ និងច្បាប់ហិរញ្ញប្បទាន ដើម្បីគាំទ្រដល់ការសិក្សាស្រាវជ្រាវ ជាពិសេសសម្រាប់ការបង្កើតថ្មីនៃការស្រាវជ្រាវ និងការធ្វើពាណិជ្ជកម្ម (៥). ពង្រឹងអភិបាលកិច្ចស្ថាប័ន (៦). ពង្រឹងអភិបាលកិច្ចតាមវិស័យ ៖ ធ្វើឌីជីថលកម្មមុខងារសំខាន់ៗនៃទិន្នន័យអប់រំឧត្តមសិក្សា ដូចជា ការផ្តល់ព័ត៌មានសេវាកម្ម និងព័ត៌មានចាំបាច់ជាច្រើនទៀត (៧). គាំទ្រការគ្រប់គ្រងគម្រោង និងការត្រួតពិនិត្យ វាយតម្លៃ , ដាក់បញ្ចូលវគ្គសិក្សាខ្លីៗ និងកម្មវិធីដែលមិនមានសញ្ញាបត្រដោយផ្អែកលើតម្រូវការ និងជំនាញ, ពិនិត្យតាមដានកញ្ចប់ថវិកា នៃកម្មវិធីសិក្សាដែលពេញនិយមខ្លាំង និងផ្តល់ការណែនាំដល់កម្មវិធីផ្សេងទៀតដើម្បីបំពេញតាមស្តង់ដាថ្នាក់ជាតិ-តំបន់។

ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសសើរ និងថ្លែងអំណរគុណយ៉ាងជ្រាលជ្រៅចំពោះការប្តេជ្ញាចិត្ត បន្តកិច្ចសហប្រតិបត្តិការរបស់ធនាគារពិភពលោកជាមួយរាជរដ្ឋាភិបាលកម្ពុជាលើវិស័យអប់រំ ដែលបានចូលរួមចំណែកយ៉ាងសកម្មក្នុងការអភិវឌ្ឍធនធានមនុស្សនៅកម្ពុជា និងជួយកម្ពុជាឱ្យចាកចេញពីភាពក្រីក្រ និងឈានទៅសម្រេចចក្ខុវិស័យប្រែក្លាយជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០៣០។

គួរជម្រាបជូនថា កិច្ចប្រជុំជាមួយធនាគារពិភពលោក ស្តីពីគម្រោងកែលម្អការអប់រំឧត្តមសិក្សាទី២ (HEIP2) មានគោលបំណងដើម្បីពិនិត្យលទ្ធផលសម្រេចបានកន្លងមក នៃការអនុវត្តគម្រោងកែលម្អការអប់រំឧត្តមសិក្សា និងបង្ហាញពីរបាយការណ៍វឌ្ឍនភាពគម្រោង HEIP2, បញ្ហាប្រឈមតាមវិស័យ និងកិច្ចសហការសម្រាប់ការអនុវត្ត ESP (Sectoral Challenges and Collaboration for ESP implementation), ជំហានបន្ទាប់ ការត្រៀមខ្លួនសម្រាប់ការអនុវត្ត HEIP2 (HEIP2 Implementation Readiness) ការបើកដំណើរការគម្រោង (Project Launching) និងកិច្ចពិភាក្សាផ្លាស់ប្តូរយោបល់៕