ដោយសហការ​ជាមួយស្ថាប័ន​នវានុវត្តន៍​បច្ចេកវិទ្យា (ADITI Academy) ក្រសួងអប់រំ យុវជន និងកីឡា កាលពីពេលថ្មីៗនេះ បានធ្វើការ​បណ្តុះបណ្តាល​ដល់​មន្រ្តីថ្នាក់កណ្តាល​ ពី​ការ​ប្រើប្រាស់បច្ចេកវិទ្យាបញ្ញាសិប្បនិម្មិត (AI) ដើម្បីអភិវឌ្ឍសមត្ថភាព ឆ្ពោះទៅ​កាន់ “បញ្ញាសិប្បនិម្មិតក្នុងបរិវត្តកម្មឌីជីថលនៃវិស័យអប់រំ”។

លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា មានប្រសាសន៍ថា ដើម្បីលើកកម្ពស់ចំណេះដឹងរបស់មន្ត្រីថ្នាក់កណ្ដាល ក្រោមឱវាទក្រសួងអប់រំ យុវជន និងកីឡា លើផ្នែកបច្ចេកវិទ្យាបញ្ញាសិប្បនិម្មិត (AI) និង​ដើម្បីបង្កើនប្រសិទ្ធិភាពក្នុងការបំពេញការងារ ដែលដំណើរឆ្ពោះទៅរកបរិវត្តកម្មឌីជីថលក្នុងវិស័យអប់រំ ទើប​ក្រសួងរៀបចំ​វគ្គបណ្ដុះបណ្ដាលនេះឡើង ដោយផ្តល់ឱ្យសិក្ខាកាមនូវការអភិវឌ្ឍសមត្ថភាព ដោយផ្តល់ជូននូវចំណេះដឹងអំពីឧបករណ៍បច្ចេកវិទ្យាថ្មីៗដូចជាបញ្ញាសិប្បនិម្មិត បច្ចេកវិទ្យាឆ្លាតវៃ ប្រព័ន្ធស្វ័យប្រវត្តិ ដើម្បីលើកកម្ពស់ប្រសិទ្ធភាពការងារ ប្រសិទ្ធផល និងសន្សំសំចៃទាំងពេលវេលា និងថវិកា ទទួលយកការផ្លាស់ប្តូរបែបឌីជីថលអប់រំ បង្កើនស្វ័យសិក្សាដោយខ្លួនឯង លើកកម្ពស់ការយល់ដឹងពីទិន្នន័យ និងរៀបចំផែនការអប់រំ។

លោកជំទាវបានគូសបញ្ជាក់ថា បច្ចេកវិទ្យា AI កំពុងមានភាពរីកចម្រើនគួរឱ្យកត់សម្គាល់លើគ្រប់វិស័យ ពិសេសក្នុងវិស័យអប់រំ ដែលទាមទារឱ្យមនុស្សអភិវឌ្ឍសមត្ថភាពជាប្រចាំដើម្បីទាញយកប្រយោជន៍ឱ្យបានច្រើនបំផុត និងចេះប្រើប្រាស់ប្រកបដោយភាពវិជ្ជមាន។

“ប្រសិនបើមនុស្សមិនអាចគ្រប់គ្រងបច្ចេកវិទ្យា AI ទេនោះ AI នឹងគ្រប់គ្រងមនុស្សវិញ ដែលនឹងផ្ដល់នូវហានិភ័យខ្ពស់ដល់ការរស់នៅរបស់មនុស្ស”

ការប្រើប្រាស់បច្ចេកវិទ្យា AI គឺបានបម្រើជាប្រយោជន៍ជំនួយដល់ការបំពេញការងារ កាត់បន្ថយកំហុស វិភាគទិន្នន័យ និងកិច្ចការផ្សេងទៀត ប៉ុន្តែអ្វីដែលសំខាន់ គឺទាមទារឱ្យមនុស្សមានសមត្ថភាពក្នុងការប្រើប្រាស់បច្ចេកវិទ្យាមួយនេះ។ បច្ចេកវិទ្យាបញ្ញាសិប្បនិម្មិត មានគុណតម្លៃសម្រាប់ជំនួយដល់ជីវភាពរស់នៅប្រចាំថ្ងៃ និងការបំពេញការងារ ដែលផ្តល់នូវទិន្នផលការងារខ្ពស់ និងជីវភាពរស់នៅប្រសើរជាងមុន។

លោកស្រី ស៊ុន រចនា ប្រធានលេខាធិការដ្ឋាន នៃអគ្គនាយកដ្ឋានគោលនយោបាយ និងផែនការ ក្រសួងអប់រំ យុវជន និងកីឡា បានលើកឡើងថា ប្រធានបទនៃវគ្គបណ្ដុះបណ្ដាលនេះ គឺ “បញ្ញាសិប្បនិម្មិតក្នុងបរិវត្តកម្មឌីជីថលនៃវិស័យអប់រំ” ដែលបានផ្សារភ្ជាប់ជាមួយការងារប្រចាំថ្ងៃ ដោយជំនួយដល់ការងារគ្រប់គ្រងទិន្នន័យតាមប្រព័ន្ធ និងការងារសំខាន់ៗផ្សេងទៀត។ លោកស្រីថា ការប្រើប្រាស់បច្ចេកវិទ្យាបញ្ញាសិប្បនិម្មិត បានជួយផ្តល់ជាគំនិត យោបល់ ចង្អុលបង្ហាញបញ្ហាប្រឈម និងព័ត៌មានដែលជំនួយដល់ការងារ។ ការបំពេញការងារប្រចាំថ្ងៃ ត្រូវការពឹងផ្អែកច្រើនទៅលើបច្ចេកវិទ្យា AI ច្រើនដើម្បីផ្សារភ្ជាប់ជាមួយការងារកម្រិតថ្នាក់តំបន់ និងអន្តរជាតិ ដែលមិនទាមទារត្រូវការធ្វើដំណើរទៅបរទេសផ្ទាល់ សន្សំសំចៃពេលវេលា និងថវិកា ធ្វើឱ្យការងារកាន់តែមានប្រសិទ្ធភាព៕