ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សន្និសីទឧស្សាហកម្ម និងពិព័រណ៍ការងារ ត្រូវបានរៀបចំឡើងដោយសាកលវិទ្យាល័យខេមតិច កាលពីថ្ងៃម្សិលមិញនេះ (១៩ វិច្ឆិកា) ដើម្បីផ្សារភ្ជាប់ទំនាក់ទំនងរវាងសាកលវិទ្យាល័យ និស្សិត និងឧស្សាហកម្មក្នុងប្រទេសកម្ពុជា ឱ្យកាន់តែល្អប្រសើរ និងស្អិតរមួត។
កញ្ញា ក្រង កន្នីកា ប្រធានផ្នែកជ្រើសរើសនិសិ្សត និងទំនាក់ទំនងសាធារណៈ នៃសាកលវិទ្យាល័យខេមតិច ប្រាប់ AMS Education ថា កម្មវិធីនេះរៀបចំឡើងក្នុងគោលបំណង ផ្សារភ្ជាប់ទំនាក់ទំនងរវាងនិស្សិតជាមួយវិស័យឧស្សាហកម្ម តាមរយៈការផ្តល់ឱកាសកម្មសិក្សា និងការងារនាពេលអនាគត, ការស្វែងយល់ពីជំនាញ និងការអនុវត្តន៍ជាក់ស្តែង ដោយមានបទបង្ហាញពីក្រុមហ៊ុនផ្សេងៗគ្នា ព្រមទាំងបង្កើនការត្រៀមខ្លួនសម្រាប់អាជីព និងទីផ្សារការងារ ស្របតាមជំនាញដែលកំពុងសិក្សានៅសាកលវិទ្យាល័យ។
កញ្ញា កន្នីកា បានបន្ថែមថា ក្រៅពីផ្សារភ្ជាប់ និស្សិតជាមួយឧស្សាហកម្ម កម្មវិធីក៏មានបំណង លើកកម្ពស់នវានុវត្តន៍សហគ្រិនភាព ការពង្រីកបណ្តាញទំនាក់ទំនងរវាងសាកលវិទ្យាល័យ និងឧស្សាហកម្មផងដែរ។
ថ្លែងក្នុងសន្ទរកថាបើកកម្មវិធី លោកស្រី Li Lilian សាកលវិទ្យាធិការរង នៃសាកលវិទ្យាល័យខេមតិច បានសម្តែងនូវការស្វាគមន៍ ចំពោះការចូលរួមពីគ្រប់ស្ថាប័ន និងបានថ្លែងគុណក្រុមហ៊ុន E-GetS ដែលបានផ្តល់នូវអាហារូបករណ៍តម្លៃ ១០ម៉ឺនដុល្លារដល់និស្សិតខេមតិច ក្នុងការចូលរួមអភិវឌ្ឍវិស័យអប់រំនៅកម្ពុជា។
លោកស្រីបានសង្កត់ធ្ងន់ ដោយលើកឡើងនូវពាក្យស្លោកចិនមួយឃ្លាថា «ប្រទេសរីកចម្រើនរុងរឿងដោយសារមានយុវជនដែលល្អ ប៉ិនប្រសព្វ និងជំនាញល្អ»។
គួរជម្រាបជូនថា សន្និសីទឧស្សាហកម្ម និងពិព័រណ៍ការងារ បានរៀបចំឡើងនៅក្នុងបរិវេនសាកលវិទ្យាល័យខេមតិច កាលពីថ្ងៃទី១៩ ខែវិច្ឆិកា ដោយមានការចូលរួមពីក្រុមហ៊ុនបច្ចេកវិទ្យា ធនាគារ អចលនទ្រព្យ និងគ្រឹះស្ថានអប់រំ ប្រមាណជាង ២០ និងមានការចូលរួម ពីសំណាក់ថ្នាក់ដឹកនាំស្ថាប័ន សាស្ត្រាចារ្យ បុគ្គលិកក្រុមហ៊ុន និងសិស្ស-និស្សិតរាប់រយនាក់៕
