ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្រៅពីជំនាញរឹង ជំនាញទន់មានសារៈសំខាន់ជាខ្លាំងនៅកន្លែងការងារដែលបុគ្គលគ្រប់រូបត្រូវមាន ។ ជំនាញទន់ទៀតសោតមានច្រើនសណ្ឋានដែលតម្រូវឱ្យបុគ្គលម្នាក់ៗសិក្សារៀនសូត្រ និងស្វែងយល់បន្ថែមក្រៅពីជំនាញវិជ្ជាជីវៈ ។
ឯកឧត្ដម ឃីម សុខហេង ស្ថាបនិកវិទ្យាស្ថានសិក្សាដើម្បីជោគជ័យ LSI បានលើកឡើងថា ជំនាញទន់ ឬ Soft Skill មានច្រើនប្រភេទដោយជំនាញនេះមាននាទីនាំឱ្យការរស់នៅ ការប្រាស្រ័យទាក់ទង និងក្នុងវិស័យការងារឱ្យទទួលបានផលល្អ រីកចម្រើនក្នុងការងាររួម ផលប្រយោជន៍រួម និងបុគ្គលខ្លួនឯងផ្ទាល់ ។ ជំនាញទន់ដែលមនុស្សត្រូវមានក្រៅពីជំនាញវិជ្ជាជីវៈក្នុងវិស័យការងារ គឺ សុជីវធម៌ សីលធម៌ ស្មារតីសាមគ្គីជាក្រុម ជំនាញក្នុងការប្រាស្រ័យទាក់ទង ជំនាញក្នុងការពិចារណាគិតស៊ីជម្រៅ ការយោគយល់អាធ្យាស្រ័យជាដើម ។
ឯកឧត្ដម ឃីម សុខហេង បានបន្តថា ជំនាញទន់ទាំងនេះជាជំនាញដែលអាចរៀនបន្ថែមពីខាងក្រៅបានដូចជំនាញរឹងដែរ ដើម្បីរក្សាលំនឹងការងារ មានជំនាញក្នុងការដោះស្រាយបញ្ហា ចេះសម្របសម្រួលបញ្ហាផ្សេងៗក្នុងការងារ និងមិនមែនជាបុគ្គលដែលនាំបញ្ហាស្មុគ្រស្មាញឱ្យអង្គភាពការងារ ។
វាគ្មិនរូបនេះបន្ថែមថា នៅពេលដែលបុគ្គលម្នាក់ៗមានជំនាញបច្ចេកទេសក្នុងខ្លួន និងមានជំនាញទន់ហើយ នោះការងារនឹងប្រកបទៅមុខដោយរលូនព្រោះមានថ្នាក់ដឹកនាំ និងថ្នាក់ក្រោមចេះយោគយល់អាធ្យាស្រ័យគ្នា និងជួយទុក្ខធុរៈគ្នាទៅវិញទៅមក ថែមទាំងធ្វើឱ្យកន្លែងការងារមានភាពរីកចម្រើនផងដែរ ។
គួរបញ្ជាក់ដែរថា ការលើកឡើងរបស់ឯកឧត្ដម ឃីម សុខហេង ស្ថាបនិកវិទ្យាស្ថានសិក្សាដើម្បីជោគជ័យ LSI នៅក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៦ ក្រោមប្រធានបទ «សារៈសំខាន់នៃជំនាញទន់នៅកន្លែងការងារ» កាលពីថ្ងៃទី១៦ ខែមិថុនា ឆ្នាំ២០២៣កន្លងទៅ ៕
