កញ្ញា វ៉ុន យ៉េត គឺជា​គ្រូបង្រៀន​ម្នាក់​នៅ​សាលា​បឋមសិក្សា​សំបូរ ស្ថិត​ក្នុង​ឃុំ​សំបូរ ស្រុកបាសាទសំបូរ ខេត្តកំពង់ធំ ។ ក្រោយ​ពេលទំនេរ​ពីការ​បង្រៀន​សិស្ស យុវតីវ័យ​២៤ឆ្នាំរូបនេះ បានទៅ​ជួយ​ដឹកនាំ​ស្រ្តី​នៅ​ក្នុង​សហគមន៍ឱ្យ​ចេះដាំបន្លែធម្មជាតិ​នៅ​ជុំវិញ​ផ្ទះ ដើម្បីទទួលបាន​នូវ​សុខភាពល្អ និង​កាត់បន្ថយ​ការ​ចំណាយ​ក្នុងគ្រួសារ ។

កញ្ញា វ៉ុន យ៉េត ដែល​ក៏​ជា​ប្រធាន​គម្រោង​អភិវឌ្ឍន៍​កុមារ​តូចផងនោះ​និយាយថា កុមារ​ដែលមាន​ការ​លូតលាស់ល្អ គឺជា​កុមារ​ដែល​ទទួល​បាន​ការ​ស្រឡាញ់​ពីអ្នក​នៅជុំវិញខ្លួន ហើយ​ជាពិសេសពួក​គេ​ក៏​ត្រូវ​ទទួលបានអាហារូបត្ថម្ភគ្រប់គ្រាន់ ទទួលបាន​ចំណីអាហារ​ដែល​ល្អ មានគុណភាព ដែលមានដូចជា​បន្លែធម្មជាតិជាដើម។

តាមការ​មើលឃើញរបស់ កញ្ញា វ៉ុន យ៉េត កាលពីមុន ពលរដ្ឋ​នៅ​ក្នុងសហគមន៍តែងដាំដំណាំជាលក្ខណៈប្រពៃណី​ដោយ​គ្មានការលើករង ឬសម្អាតដីបានត្រឹមត្រូវនោះឡើយ ដោយជីកគ្រលុកដាំបន្លែ នៅពេលស្រោចទឹកច្រើនតែរលួយ ហើយពេលដាក់ជីវិញ ក៏ដាក់នៅតែពីលើដំណាំ ​ដោយពេលស្រោចទឹក ក៏​នាំឱ្យជីហូរ​ទៅតាមទឹកអស់។ ប៉ុន្តែក្រោយទទួលបានចំណេះដឹងអំពីបច្ចេកទេសដាំបន្លែ ពីគម្រោងអភិវឌ្ឍន៍កុមារតូចដែលដឹកនាំដោយ​កញ្ញាផ្ទាល់ ឃើញថា ការដាំដំណាំក៏មានការប្រែប្រួលជាងមុនច្រើន។ តាមកញ្ញា វ៉ុន យ៉េត ដើម្បី​ឱ្យ​ដំណាំបន្លែបានល្អ ដំបូងគេត្រូវកាប់ដីនិងសម្អាតដីហាលរយៈពេល២សប្ដាហ៍ និងបាចកំបោរសដើម្បីសម្លាប់មេរោគ បន្ទាប់មកកាប់ជ្រួយដីដាក់ជីទឹក (ជីធម្មជាតិ) ហើយលើកជារង។ ការដាំបន្លែតាមបច្ចេកទេសបែបនេះ ពិតជាទទួលបានលទ្ធផលល្អប្រសើរជាងទម្លាប់ប្រពៃណីច្រើន។

អ្នកស្រី រិនសារុំ ជាសមាជិកនៅក្នុងគម្រោងអភិវឌ្ឍន៍កុមារតូច មានប្រសាសន៍ថា បច្ចុប្បន្ននៅផ្ទះអ្នកស្រ្តីមានដាំបន្លែបៃតង ដូចជា ស្ពៃ សណ្ដែកកួរ ម្ទេស ត្រប់ សាឡាត់ ខាត់ណា ននោង នៅជុំវិញផ្ទះ ។ ដំណាំជុំវិញផ្ទះនេះ បានកាត់បន្ថយការចំណាយក្នុងគ្រួសាររបស់អ្នកស្រីយ៉ាងច្រើន ដោយមានបន្លែហូបស្រាប់ ព្រមទាំងអាចយកផលដំណាំទាំងនោះ​ទៅលក់នៅឯផ្សារបានចំណូលគួរសម។

អ្នកស្រី រិនសារុំ សមាជិកម្នាក់នៅក្នុងគម្រោងអភិវឌ្ឍន៍កុមារតូច

“ខ្ញុំដាំគ្មានប្រើជីគីមីអ្វីទេយើងប្រើតែជីធម្មជាតិធ្វើដោយស្លឹកស្ដៅរួមនិងស្លឹកឈើស្លឹកព្រៃបន្ថែមទៀតដោយខ្លួនឯង ឥឡូវនេះឃើញថា គ្រួសារខ្ញុំមានជីវភាពប្រសើរច្រើន ព្រោះយើងមិនចំណាយច្រើន”

លោក ជីម ចុន អ្នកសម្របសម្រួលគម្រោងអភិវឌ្ឍន៍កុមារតូច មានប្រសាសន៍ថា គម្រោងអភិវឌ្ឍន៍កុមារតូច ផ្ដល់អត្ថប្រយោជន៍ថ្មីៗដល់ស្រ្តីក្នុងសហគមន៍ ដើម្បីឱ្យពួក​គាត់ដាំដំណាំបានទិន្នផលល្អ ហើយគម្រោងនេះ លើកទឹកចិត្តឱ្យកសិករប្រើប្រាស់ជីកំប៉ុសទឹក ជីកំប៉ុសគោក និងថ្នាំពុលធម្មជាតិ។ លោកបន្តថា តាមរយៈគម្រោងនេះ ពិតជាបានរួមចំណែកដល់ស្រ្តីនៅក្នុងភូមិ គឺទី១. កាត់បន្ថយការចំណាយក្នុងគ្រួសារ ទី២.មានបន្លែសុវត្ថិភាពសម្រាប់ហូប ទី៣. ទទួលបានប្រាក់ចំណូលពីការលក់បន្លែ ។

បើតាម លោក ជីម ចុន គម្រោងអភិវឌ្ឍន៍កុមារតូច បានចាប់ផ្ដើមអនុវត្តក្នុងឆ្នាំ២០២០ ដោយបានអនុវត្តជាពីរជំហាន ដោយជំហានទី១ ធ្វើនៅស្រុកសណ្ដាន់មាន ៥២ ភូមិ ហើយជំហានទី២ នៅខេត្តកំពង់ធំ មាន៩២ភូមិ ក្នុងនោះមានស្រុកប្រាសាទសំបូរ និងស្រុកស្ទោង៕