ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បើនិយាយពីការហាត់ប្រាណមនុស្សភាគច្រើនបានដឹងពីអត្ថប្រយោជន៍របស់វា ប៉ុន្តែការអនុវត្តជាក់ស្តែងតែងតែខ្វះចន្លោះ ដែលនៅតែជាបញ្ហាប្រឈមរបស់មនុស្សមួយចំនួន។ យ៉ាងណាក៏ដោយអ្នកស្រឡាញ់សុខភាព បានលើកទឹកចិត្តដល់មនុស្សគ្រប់រូប គ្រប់វ័យគួរឆ្លៀតពេលហាត់ប្រាណដើម្បីសុខភាពល្អ រាងកាយរឹងមាំ មិនងាយឈឺ។
លោក ឡេង ហាក់ ជាបុគ្គលិកក្រុមហ៊ុនមួយកន្លែងនៅរាជធានីភ្នំពេញ តែងតែប្រើប្រាស់ពេលវេលាល្ងាចក្រោយពីធ្វើការប្រហែល២ម៉ោងដើម្បីរត់ហាត់ប្រាណ។ លោកថា ការហាត់ប្រាណ ជួយឱ្យលោកមានសុខភាពល្អ រាងកាយរឹងមាំ មិនងាយឈឺ បើប្រៀបធៀបកាលពីមុនមិនបានហាត់ប្រាណ សុខភាពនៅខ្សោយ ព្រមទាំងឧស្សាហ៍កើតជំងឺផ្ដាសាយ។
យុវជនវ័យ ២៨ឆ្នាំរូបនេះ និយាយថា ប្រជាជនខ្មែរភាគច្រើន ចូលចិត្តហូបគ្រឿងកំប៉ុងមានជាតិផ្អែម ហើយមិនសូវចូលចិត្តហាត់ប្រាណ ដែលនេះជាការមិនបានស្រឡាញ់សុខភាព ហើយពេលខ្លះជំងឺមិនឱ្យយើងដឹងមុន។ ដូច្នេះ លោកលើកទឹកចិត្តដល់កុមារ យុវជន ប្រជាជនខ្មែរទាំងអស់ឱ្យងាកមកស្រឡាញ់សុខភាព ឆ្លៀតពេលហាត់ប្រាណ ដើម្បីរាងកាយមានសុខភាពល្អ យកឈ្នះជំងឺផ្សេងៗ។
កញ្ញា ដា សារេត ជានិស្សិតឆ្នាំទី៤ នៃសាកលវិទ្យាល័យវិទ្យាសាស្រ្តសុខាភិបាល ប្រាប់ឱ្យដឹងដែរថា កញ្ញាតែងតែឆ្លៀតពេលដើម្បីហាត់ប្រាណ គឺមកពីស្រឡាញ់សុខភាពខ្លួនឯង និងចង់លំហែអារម្មណ៍ បង្កើនភាពរីករាយ និងបង្កើនទំនាក់ទំនងជាមួយមិត្តភក្តិ។ កញ្ញាបន្តថា ការហាត់ប្រាណពិតជាមានសារសំខាន់ ព្រោះការហាត់ប្រាណអាចជួយដុតជាតិខ្លាញ់ បញ្ចេញជាតិពុល ធ្វើឱ្យរាយកាយមាំមួន និងមិនងាយឈឺ។
និស្សិតឆ្នាំទី៤រូបនេះ ក៏បានលើកទឹកចិត្តដល់យុវជនទូទៅ ជ្រើសរើសយកកីឡាមួយដែលមានសុវត្ថិភាពសម្រាប់ហាត់ប្រាណ ហើយចំណាយពេល ១៥នាទីទៅ៣០នាទីហាត់ប្រាណ ដើម្បីទទួលបានសុខភាពល្អ។
ដោយឡែកលោកស្រី ប៉ែន ដារី ជាស្រ្តីមេផ្ទះ ក៏និយាយដែរថា លោកស្រីតែងតែងមកហាត់ប្រាណជាប្រចាំ លោកស្រីថា កាលពីលោកស្រីនៅលីវមិនទាន់មានគ្រួសារ គឺមិនសូវគិតគូរអំពីការហាត់ប្រាណនោះទេ ព្រោះមានគីឡូសមស្រប ប៉ុន្តែក្រោយរៀបការមានកូនហើយក៏ឡើងគីឡូ ដូច្នេះទើបសម្រេចចិត្តមកហាត់ប្រាណ ហូបអាហាររស់ជាតិល្មម មិនប្រៃពេក មិនផ្អែមពេក និងហូបបន្លែច្រើន។ លោកស្រីបន្តថា ការឆ្លៀតពេលមកហាត់ប្រាណ ក៏ព្រោះចង់ទទួលបានសុខភាពល្អ មិនចង់ឱ្យមានជំងឺផ្សេងៗ ហើយក៏ចង់រក្សាគីឡូឱ្យសមស្រប។
ស្រី្តវ័យ៤៥ឆ្នាំ រូបនេះ ក៏បានលើកទឹកចិត្តដល់ប្រជាជនខ្មែរទាំងអស់ គួរឆ្លៀតពេលហាត់ប្រាណ កន្លះម៉ោងក្ដី ឬមួយម៉ោងក្ដី ដើម្បីសុខភាពល្អ ព្រោះបច្ចុប្បន្ននេះ អាហារហូបចុករាល់ថ្ងៃមានជាតិគីមីច្រើន ដូច្នេះ ប្រសិនបើយើងបានហាត់ប្រាណខ្លះ ក៏ជួយកាត់បន្ថយជាតិពុលច្រើន។ លោកស្រីបន្តថា ជំងឺជាច្រើននឹងចូលមក នៅពេលរាងកាយយើងចាប់ផ្ដើមទន់ខ្សោយ។
បើតាមអ្នកជំនាញ ការហាត់ប្រាណ អាចគ្រប់គ្រងជំងឺរ៉ាំរ៉ៃប្រចាំកាយមួយចំនួនដូចជា ជំងឺបេះដូង ទឹកនោមផ្អែម មហារីក និងជំងឺពុកឆ្អឹង។ ទន្ទឹមគ្នានោះ លំហាត់ប្រាណ មានតួនាទីពង្រឹងប្រព័ន្ធភាពស៊ាំក្នុងរាងកាយ កាត់បន្ថយហានិភ័យនៃការដួលសន្លប់ និងជំរុញឱ្យមានអាយុវែង។ លើសពីនេះ លំហាត់ប្រាណ ជះឥទ្ធិពលវិជ្ជមានទៅកាន់សុខភាពផ្លូវចិត្ត ជួយឱ្យអារម្មណ៍ល្អ កាត់បន្ថយអាការៈថប់បារម្ភ និងជំងឺធ្លាក់ទឹកចិត្ត៕
