ការសិក្សាគឺជាដំណើរការដ៏វែងឆ្ងាយដែលទាមទារការតាំងចិត្តខ្ពស់ ប៉ុន្តែសិស្សានុសិស្សស្ទើរតែគ្រប់រូបតែងតែជួបប្រទះនូវឧបសគ្គផ្លូវចិត្ត និងទម្លាប់អវិជ្ជមានមួយចំនួនដែលអាចរារាំងដល់ភាពជោគជ័យរបស់ពួកគេ។ ក្នុងចំណោមបញ្ហាប្រឈមទាំងនោះ កត្តា៣ចំណុចដែលសិស្សតែងជួបប្រទះជាញឹកញាប់ជាងគេគឺ ការពន្យារពេលលើការសិក្សាមេរៀននីមួយៗ, បាត់បង់កម្លាំងចិត្តក្នុងការសិក្សា និង អាការថប់បារម្ភពេលមានតេស្តសាកល្បងសមត្ថភាពណាមួយ។ បញ្ហាទាំងនេះ ប្រសិនបើទុកចោលអាចបង្កឱ្យមានភាពតានតឹង រហូតដល់ចង់បោះបង់ការសិក្សាទៀតផង។

ឆ្លើយតបទៅនឹងស្ថានការណ៍នេះ គេហទំព័រ Oxford Learning បានបង្ហាញពីវិធីដោះស្រាយដ៏មានប្រសិទ្ធភាពទៅតាមបញ្ហានីមួយៗ ដើម្បីជួយសិស្សឱ្យអាចគ្រប់គ្រងស្ថានភាពទាំងនេះបានប្រកបដោយទំនុកចិត្ត និងទទួលបានលទ្ធផលសិក្សាកាន់តែប្រសើរឡើង។

១. ការពន្យារពេល ៖ ទុកកិច្ចការសាលាចោល ចាំដល់ម៉ោងបានរួតរះធ្វើការងារសាលា ឬដល់ពេលប្រឡងបានចាប់ផ្តើមសម្រុករៀន, សកម្មភាពតូចៗទាំងនេះហើយ បង្កបានទៅជាទម្លាប់ពន្យារពេលក្នុងការសិក្សា និងប៉ះពាល់ទៅកាន់សុខភាពទៀតផង។

ឆ្លើយតបទៅនឹងបញ្ហាទាំងនេះ សិស្សគួរពុះចែកមេរៀនពិបាកៗឱ្យទៅជំហានតូចៗ ក្នុងការជួយបន្ធូរបន្ថយភាពតានតឹងឱ្យមានសមភាពស្រាលជាងមុន។ ជាងនេះទៅទៀត ការសិក្សាបន្ថែមអំពីការបែងចែកពេលវេលា និងការតាមដានភាពរីកចម្រើនឱ្យបានជាប្រចាំ រួមទាំងផ្តល់រង្វាន់លើកទឹកចិត្តចំពោះខ្លួនឯងសុទ្ធសឹងតែកត្តាដែលពុំអាចខ្វះបាន។

២. បាត់បង់កម្លាំងចិត្ត ៖ កត្តាប្រឈមដ៏លំបាកមួយទៀតគឺការបាត់បង់ទំនុកចិត្ត ជាពិសេសស្ថិតក្នុងដំណាក់កាលត្រូវការរៀនសូត្រក្នុងរយៈពេលវែង ឬក៏ត្រូវស្វ័យសិក្សាលើប្រធានបទដដែលៗច្រើនដង។ ឆ្លើយតបទៅនឹងស្ថានការណ៍បែបនេះ សិស្សចាំបាច់ត្រូវសម្រាកឱ្យបានគ្រប់គ្រាន់ ឬក៏ធ្វើដំណើរកម្សាន្តកំឡុងពេលវិស្សមកាល ដើម្បីបង្កើនថាមពលត្រឡប់មកវិញ ក៏ដូចជាការជៀសវាងពីអាការអស់កម្លាំងមិនធម្មតា។

ហើយវិធីសាស្រ្តមួយទៀតគឺការផ្លាស់ប្តូរវិធីសាស្រ្តសិក្សា ឬក៏វិធីសាស្រ្តដែលពុំធ្លាប់សាកល្បងពីមុនៗមក មិនថាការអាន ការអនុវត្តជាក់ស្តែងរាល់ទ្រឹស្តីដែលបានរៀន ការសរសេរស្នាដៃ ឬគំនិតដែលបានរៀន រួមទាំងការពិភាក្សាដោយមានភាពចម្រុះនិងសកម្មផងដែរ។​ ក្រៅពីការអនុវត្ត ឬសាកល្បងវិធីសាស្រ្តចម្រុះចប់សព្វគ្រប់ហើយ សិស្សគួរឧស្សាហ៍រំលឹកខ្លួនឯងជារឿយៗថា ការប្រឹងប្រែងថ្ងៃនេះ វានឹងហុចផលជាវិជ្ជមាននៅពេលខាងមុខ។

៣. ថប់បារម្ភពេលជិតប្រឡង ៖ ស្ថិតក្នុងដំណាក់កាលថប់បារម្ភពេលជិតប្រឡង ជំនាញនៃការរក្សាសុខភាពផ្លូវចិត្តរបស់សិស្សកាន់តែសំខាន់ ដើម្បីបន្ថយភាពតានតឹង បើពុំដូច្នោះទេ អាចធ្វើឱ្យសិស្សភ័យខ្លាច និងធ្វើឱ្យអារម្មណ៍កាន់តែជ្រួលច្របល់ នៅពេលថ្ងៃប្រឡងមកដល់។ ហើយបច្ចេកទេសនៃការបន្ធូរអារម្មណ៍មានដូចជា៖ ដកដង្ហើមវែងៗ ការប្រមើលពីភាពជោគជ័យនៅផ្លូវខាងមុខ ដើម្បីបណ្តុះនូវក្ដីសង្ឃឹម និងផ្នត់គំនិតវិជ្ជមានឱ្យបានជាប្រចាំ និងការកសាងទំនុកចិត្តចំពោះខ្លួនឯង៕