ការរក្សាបាននូវទម្លាប់វិជ្ជមានគឺជាវិធីសាស្រ្តដ៏មានឥទ្ធិពល សម្រាប់ការសម្រាលបន្ទុកសុខុមាលភាពផ្លូវចិត្តរាល់គ្រប់ស្ថានភាពដែលជួបប្រទះ។ មិនថាស្ថិតក្នុងស្ថានភាពផ្លូវចិត្ត ក្នុងកម្រិតដែលកំពុងព្យាបាលខ្លួនឯង ឬកំពុងទទួលបានការព្យាបាលពីអ្នកជំនាញនោះទេ សកម្មភាព ៧ ចំណុចខាងក្រោម វាអាចផ្តល់ជាផលវិជ្ជមានចំពោះសុខភាពផ្លូវចិត្ត។

១.ចេញទៅក្រៅ ៖ ការដាក់ឱ្យរាងកាយ នៅក្បែរទីលំហបៃតងៗ ដូចជាដើមឈើ វាលស្រែខៀវស្រងាត់ និងបរិយាកាសដែលមានទឹកជាដើម។ ព្រោះបរិយាកាសទាំងនេះបានពង្រឹងនូវសុខុមាលភាព។

២.ចលនារាងកាយ ៖ ដើម្បីឱ្យរាងកាយមានចលនាជាប្រចាំ គឺចាំបាច់ត្រូវមានលំហាត់ប្រាណ ហើយលំហាត់ប្រាណទៀតសោតគឺអាចអនុវត្តន៍បានគ្រប់ប្រភេទ តែត្រូវ​អនុវត្តន៍យ៉ាងហោចណាស់ឱ្យបាន១៥០នាទីក្នុងមួយសប្តាហ៍។ សកម្មភាពបែបនេះ បានរួមចំណែក បន្ថយអាការថប់បារម្ភ ជំងឺធ្លាក់ទឹកចិត្ត និងភាពកម្សោយនៃសុខភាពផ្នែកដទៃទៀត។

៣.ផ្តល់អទិភាពចំពោះការគេង ៖ ត្បិតថាការគេង ចន្លោះពី៧ទៅ៨ម៉ោងជួយទប់ទល់នឹងអាការថប់បារម្ភ ភាពតានតឹង ប៉ុន្តែគុណភាពដំណេក មិនមែនសំដៅដោយគ្រាន់តែគេងគ្រប់ម៉ោងប៉ុណ្ណោះទេ ប៉ុន្តែចង់សំដៅលើការគេងដែលមានភាពស្ងប់សុខ ។ ហើយដើម្បីបង្កើនភាពស្ងប់នៃដំណេកបានគឺគេងនៅកន្លែងបិទជិតគ្មានពន្លឺជះចូល រក្សាគម្លាតពីស្រ្គីនទូរស័ព្ទយ៉ាងហោច៤ម៉ោងមុនចូលគេង។

៤.អាហារូបត្ថម្ភ ៖ ក្នុងអារហារដែលទទួលទានប្រចាំថ្ងៃ គួរមាននូវសារធាតុផ្សេងៗដែលសម្បូរទៅដោយសារធាតុចិញ្ចឹមដូចជា អាស៊ីតខ្លាញ់ Omega-3 អាហារមានជាតិស្ករទាប រួមបញ្ចូលនូវគ្រាប់ធញ្ញជាតិ ដែលមាននាទីគាំទ្រដល់សុខភាពខួរក្បាល និងកាត់បន្ថយហានិភ័យនៃជំងឺធ្លាក់ទឹកចិត្ត។

៥.រក្សាទំនាក់ទំនង ៖ ទំនាក់ទំនងសំខាន់ៗ ដែលមិនគួរបណ្តែតបណ្តោយដូចជា សមាជិកគ្រួសារ មិត្តភ័ក្តិ ដៃគូស្និទ្ធស្នាល ឬមិត្តរួមការងារជាដើម បានរួមចំណែកផ្តល់នូវអត្ថន័យទៅកាន់ការរស់នៅតាមរយៈការនិយាយសន្ទនាជាមួយគ្នាបានទៀងទាត់ ឬក៏ផ្ញើសារ ហៅទូរស័ព្ទជជែកគ្នា ការចំណាយពេលវេលា បង្ហាញពីមោទនភាពនិងភាពស្និទ្ធស្នាល ការគាំទ្រគ្នា ឬការប្រារព្ធកម្មវិធីសំខាន់ៗជាមួយគ្នា និងព្យាយាមយល់ពីគ្នាទៅវិញទៅមក។

៦.បន្ថយការប្រើប្រាស់ស្រ្គីន ៖ ការកាត់បន្ថយសកម្មភាពអូសចុះ អូសឡើងបានរួមចំណែកដល់ការបន្ថយស្រ្តេស ភាពតានតឹង ជំនួសមកវិញនូវការបង្កើនផលិតភាពនិងការផ្តោតលើគុណភាពដំណេក រួមទាំងមានពេលជាច្រើនសម្រាប់ធ្វើសកម្មភាពសំខាន់ៗដទៃទៀត។ ប្រើប្រាស់ប្រព័ន្ធផ្សព្វផ្សាយលើសលប់នាំឱ្យកើតក្ដីមន្ទិលចំពោះខ្លួនឯង បង្កើនការប្រៀបធៀប និងប៉ះពាល់ធ្ងន់ធ្ងរទៅកាន់សុខភាពផ្លូវចិត្ត។

៧.ប្រកួតប្រជែងជាមួយខ្លួនឯង ៖ ប្រកួតប្រជែងជាមួយខ្លួនឯង តាមរយៈសកម្មភាពសាមញ្ញដូចជា រៀនមុខជំនាញថ្មីៗ លេងកីឡា និងរៀនភាសាថ្មី សុទ្ធសឹងតែជាការរួមចំណែកឱ្យមានការប្រកួតប្រជែងជាមួយនឹងខ្លួនឯង ក៏ដូចជាការដុសខាត់សមត្ថភាព និងសុខុមាលភាព។ បន្ថែមពីនោះ ការជ្រើសរើសជំនាញថ្មីៗ ជាការផ្តល់ឱកាសស្គាល់ពីខ្លួនឯង និងការទប់ទល់ភាពតានតឹង និងជួយបន្ថយសម្ពាធសុខភាពផ្លូវចិត្ត៕