ក្នុងដំណើរទស្សនកិច្ចសាលាមត្តេយ្យសិក្សាសហគមន៍ ដើម្បីលើកកម្ពស់គុណភាពអប់រំកុមារតូចនៅកម្ពុជា នៅភូមិជ្រលង ឃុំទឹកល្អក ស្រុកព្រៃនប់ ខេត្តព្រះសីហនុ កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការចាប់ផ្ដើមយល់ដឹងរបស់អាណាព្យាបាលដែលពីមុនមានប្រមាណ៤០ភាគរយ តែបច្ចុប្បន្នមានប្រមាណ៧០ភាគរយដែលបានយល់ពីសារៈសំខាន់នៃការចូលរៀនមត្តេយ្យសិក្សា ធ្វើឱ្យកុមារមានបំណិនមុននឹងឈានចូលបឋមសិក្សា។

ឯកឧត្តម ហង់ជួន ណារ៉ុន មានប្រសាសន៍ថា ការអប់រំកុមារតូច គឺជាមូលដ្ឋានគ្រឹះដ៏សំខាន់ និងទាមទារភាពរឹងមាំសម្រាប់សិស្សានុសិស្សឱ្យទទួលបានទាំងជំនាញរឹង និងជំនាញទន់ ការសិក្សាពេញមួយជីវិត និងបំណិនសតវត្សទី២១ ដូចជា ការគិតស៊ីជម្រៅ ជំនាញដោះស្រាយបញ្ហា ចេះចែករំលែក ចេះធ្វើការងារជាក្រុម ដែលទាំងអស់នេះនឹងក្លាយជាស្ពានឈានទៅរកភាពជោគជ័យក្នុងការសិក្សាបន្តបន្ទាប់ទៀត។

ឯកឧត្តម ប្រាក់ កុសល ប្រធាននាយកដ្ឋានអប់រំកុមារតូច នៃក្រសួងអប់រំ យុវជន និងកីឡា មានប្រសាសន៍ថា ប្រសិនជាឪពុកម្ដាយ ឬអាណាព្យាបាលយកចិត្តទុកដាក់បញ្ជូនកូនទៅរៀននៅមត្តេយ្យសិក្សាចាប់ពីអាយុ៣ឆ្នាំ នោះពួកគេនឹងបានបន្សាំខ្លួនតាមរយៈគ្រូផ្ដល់ការអប់រំដែលជាមូលដ្ឋានគ្រឹះមិនអាចខ្វះបាន ក្នុងការបណ្ដុះភាពក្លាហាន អំណត់អត់ធន់ រួមទាំងមូលដ្ឋានគ្រឹះ នៃការអនុវត្តផ្នែករាងកាយ សុខភាព និងការវិឌ្ឍអារម្មណ៍ សង្គម នៅពេលរៀននៅមត្តេយ្យសិក្សា។ ទន្ទឹមគ្នានេះ ការអភិវឌ្ឍផ្នែកភាសា ការអភិវឌ្ឍផ្នែកបញ្ញា និងការអភិវឌ្ឍការគិត មានមូលដ្ឋានពីមត្តេយ្យសិក្សា ដើម្បីឱ្យកុមារអាចត្រៀមទៅរៀនថ្នាក់ទី១ នៅអាយុ៦ឆ្នាំ។

គួរជំរាបជូនថា ចាប់តាំងពីឆ្នាំ២០០២ ស្របតាមគោលនយោបាយ វិមជ្ឈការនិង វិសហមជ្ឈការ រាជរដ្ឋាភិបាលបានធ្វើវិមជ្ឈការ ប្រតិភូកម្ម ការអប់រំកុមារតូច បឋម និងការអប់រំក្រៅប្រព័ន្ធទៅដល់រដ្ឋបាលស្រុកក្នុងការគ្រប់គ្រង។ លើសពីនេះរដ្ឋបាលឃុំបានដើរតួនាទីយ៉ាងសំខាន់ក្នុងការផ្ដល់ថវិកាគាំទ្រទៅដល់ដំណើរការនៃមតេ្តយ្យសិក្សាសហគមន៍។ យ៉ាងណាក៏ដោយ រដ្ឋមន្រ្តីក្រសួងអប់រំ បានលើកទឹកចិត្តដល់សហគមន៍ និងដៃគូពាក់ព័ន្ធ បន្តជួយឧបត្ថម្ភគាំទ្រដល់មត្តេយ្យសហគមន៍ដើម្បីការអភិវឌ្ឍកុមារតូចប្រកបដោយគុណភាព ដើម្បីពួកគាត់ត្រៀមខ្លួនរួចជាស្រេចសម្រាប់ការអប់រំកម្រិតបឋមសិក្សា ក្លាយខ្លួនជាធនធានមនុស្ស ឆ្លើយតបនឹងចក្ខុវិស័យរបស់រាជរដ្ឋាភិបាល៕