ការឆ្លុះបញ្ចាំងខ្លួនឯង ជាកត្តាដ៏មានឥទ្ធិពលមួយ ជួយឱ្យយល់ច្បាស់ពីខ្លួនឯងច្រើនជាងមុន ស្គាល់ពីតម្លៃរបស់ខ្លួនឯង និងសេចក្ដីប៉ងប្រាថ្នានៅពេលខាងមុន។ តាមរយៈគេហទំព័រ verywellmind បានបង្ហាញហេតុផលប្រាំពីរចំណុចដែលបង្ហាញថា ការឆ្លុះបញ្ចាំងជាវិធីដែលយុវវ័យមិនគួរមើលរំលងនៅពេលបាត់បង់ខ្លួនឯង។

១. សញ្ជឹងគិតពីរបៀបដែលទទួលបានការចិញ្ចឹមពេលកន្លងមក ៖ ការក្រឡេកទៅមើលពីបែបបទ នៃការចិញ្ចឹមបីបាច់ថែរក្សាកាលពីវ័យកុមារ​​ តាមរយៈការបំផុសសំណួរទៅកាន់ខ្លួនឯងដូចជា តើវប្បធម៌និងច្បាប់ដែលគ្រួសារបង្កើតកន្លងមកនៅអាចប្រើប្រាស់បានទៀតទេ? ហើយបន្តទៅខាងមុខទៀត តើមានចំណុចណាខ្លះដែលគួរផ្លាស់ប្តូរ?

២. វិភាគពីបទពិសោធន៍ចាស់ៗ ៖ ចំពោះបទពិសោធន៍ វិភាគរាល់ចំណុចសំខាន់ៗដែលបានកើតមាននៅក្នុងដំណើរជីវិត។ តើបទពិសោធន៍ទាំងនោះបានសម្រួចផ្នត់គំនិត សកម្មភាព និងក្ដីសង្ឃឹមជឿជាក់អ្វីខ្លះ? ការរំឮករឿងចាស់ៗ អាចជួយឱ្យខ្លួនឯងយល់ពីបច្ចុប្បន្នភាព ដោយហេតុថាបច្ចុប្បន្នភាពពាក់ព័ន្ធនឹងអតីតកាល។

២. កត់សម្គាល់គុណតម្លៃខ្លួនឯង ៖ គិតឱ្យបានជាក់លាក់ជាមួយនឹងហេតុផលច្បាស់ៗ ថា តើអ្វីទៅពិតជាបានផ្តល់នូវគុណតម្លៃចំពោះបុគ្គលម្នាក់ៗ ? ការអនុវត្តន៍បែបនេះបានជារឿយៗ មិនត្រឹមតែជាគន្លឹះក្នុងការរកខ្លួនឯងនោះទេ ប៉ុន្តែជាកត្តាបង្កើនជំនឿ ជឿជាក់ចំពោះខ្លួនឯងនៅពេលមានការសម្រេចចិត្តណាមួយ។

៤. ដាក់សំណួរចំពោះខ្លួនឯងពេលមានមន្ទិល ៖ ការមានមន្ទិលសង្ស័យចំពោះខ្លួនឯង ឬមនុស្សជុំវិញខ្លួនតែងកើតមានឡើង គ្រាន់តែយូរឬឆាប់​ ការសង្ស័យខ្លះក៏បង្កើនការប្រុងប្រយ័ត្ន ប៉ុន្តែការសង្ស័យខ្លះទៀតកាន់តែបង្កើននូវភាពស្មុគស្មាញចំពោះខ្លួនឯង និងការបាត់បង់ទំនុកចិត្តទៅលើអ្នកដទៃ ដូច្នេះ ត្រូវដាក់សំណួរទៅកាន់ស្ថានភាពនីមួយៗ ហើយឆ្លុះបញ្ចាំង និងស្វែងរកភាពសមទំនងណាមួយ មុននឹងសម្រេចចិត្តជឿជាក់។

៥. ដល់ពេលដែលកំណត់គោលដៅ ៖ ចំណាយពេលគិតអំពីសកម្មភាពនៅថ្ងៃអនាគត ដូចជាអាជីពវិជ្ជាជីវៈ ផែនការគ្រួសារ និងទំនាក់ទំនង ឬក៏ផលប្រយោជន៍ដទៃទៀត បន្ទាប់មកស្វែងរកវិធីសាស្រ្តដើម្បីទៅដល់គោលដៅតាមក្រោយ។​

៦. ស្គាល់ទាំងចំណុចខ្លាំង និងខ្សោយ ៖ កត់ទុករាល់ចំណុចខ្លាំងនិងចំណុចខ្សោយប្រកបដោយភាពស្មោះត្រង់ទៅកាន់ខ្លួនឯងនិងរក្សាអារម្មណ៍វិជ្ជមាន។ ដោយហេតុថា បុគ្គលម្នាក់ៗ សុទ្ធតែមានភាពខ្លាំង និងភាពខ្សោយ រៀងៗខ្លួន​ ក្រៅពីរកឃើញហើយ យកចំណុចមិនល្អទាំងនោះ ទៅដុសខាត់បន្ថែម រួចប្រើចំណុចខ្លាំងទៅបន្តអភិវឌ្ឍន៍សមត្ថភាព។

៧.​ សិក្សាពីកំហុសចាស់ៗ ៖​ នៅពេលមានកំហុសកើតមាន ការតាំងចិត្តរៀនសូត្រពីវាបន្ថែមឱ្យបានច្រើនជាងការបន្ទោសខ្លួនឯង ឬក៏បោះបង់ខ្លួនឯងចោល។ ដោយសារតែការប្រព្រឹត្តកំហុសណាមួយ ហើយបណ្តាលឱ្យស្ថានភាពផ្លូវចិត្តចុះខ្សោយ អ្វីដែលសំខាន់ គឺការផ្តោតលើអ្វីដែលអាចកែប្រែបាននៅពេលខាងមុខ៕