ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សមាគមយុវជនជនជាតិដើមភាគតិចកម្ពុជា ហៅកាត់ថា CIYA ត្រូវបានបង្កើតឡើងកាលពីឆ្នាំ២០០៥, អស់រយៈពេល២០ឆ្នាំមកនេះ CIYA បានដើរតួនាទីសំខាន់ជាកន្លែងបណ្ដុះបណ្ដាលយុវជនជនជាតិដើមភាគតិចទាំងប្រពៃណី វប្បធម៌របស់ខ្លួន ហើយពិសេសទៅទៀត គឺការជំរុញពួកគេឱ្យទទួលបានការអប់រំខ្ពស់រហូតដល់បញ្ចប់ការសិក្សាថ្នាក់បរិញ្ញាបត្រ។
លោក រម៉ាម ប្លេន ជនជាតិដើមភាគតិចចារ៉ាយ និងជាប្រធានសមាគមយុវជនជនជាតិដើមភាគតិចកម្ពុជា (CIYA) មានប្រសាសន៍ថា CIYA បានដើរតួនាទីជាច្រើន គឺជាបណ្ដុំនៃការបណ្ដុះគ្រាប់ពូជយុវជនជនជាតិដើមភាគតិចនៅប្រទេសកម្ពុជាពាក់ព័ន្ធនឹងប្រពៃណី វប្បធម៌ ក៏ដូចជាជំរុញយុវជនជនជាតិដើមភាគតិចជំនាន់ក្រោយឱ្យចេះថែរក្សាបន្ត និងមានមោទនភាពសម្រាប់ប្រពៃណីវប្បធម៌របស់ខ្លួន។ ហើយគិតត្រឹមរយៈពេល៥ឆ្នាំចុងក្រោយនេះ CIYA ក៏គាំទ្រយុវជនជនជាតិដើមភាគតិចប្រមាណជាង ៥០នាក់ឱ្យបញ្ចប់ការសិក្សាថ្នាក់បរិញ្ញាបត្រដោយជោគជ័យ ដែលនេះគឺជាសមិទ្ធិផលតាមរយៈការអនុវត្តសិទ្ធិអប់រំសម្រាប់យុវជនជនជាតិដើមភាគតិចកម្ពុជា។
កញ្ញា រចំ មុន្នី និស្សិតផ្នែក Cyber Security នៃសាកលវិទ្យាល័យខេមតិច បានលើកឡើងថា កញ្ញាបានក្លាយជាសមាជិក CIYA តាំងពីឆ្នាំ២០១៩ អំឡុងពេលរៀននៅវិទ្យាល័យ។ មុន្នី បន្តថា នាងទទួលបានចំណេះដឹង បទពិសោធន៍ ភាពជាអ្នកដឹកនាំ ការចូលរួមក្នុងកិច្ចការងារសង្គម ដែលជំរុញឱ្យនាងមានភាពក្លាហាន ជំនះគ្រប់ឧបគ្គរហូតបានបន្តការសិក្សានៅភ្នំពេញ។
ជនជាតិដើមភាគតិចចារ៉ាយរូបនេះ បន្ថែមថា តាមរយៈ CIYA រូបនាងទទួលបានឱកាស និងបទពិសោធន៍ច្រើន រហូតទទួលបានតួនាទីជាអ្នកទទួលបន្ទុកលើផ្នែកព័ត៌មានវិទ្យា ប្រព័ន្ធផ្សព្វផ្សាយ និងទំនាក់ទំនង នៅសមាគមន៍ស្រ្តីជនជាតិដើមភាគតិចកម្ពុជា (CIWA) ដែលជាការងារក្រៅម៉ោង អំឡុងពេលសិក្សានៅសាកលវិទ្យាល័យ។ មុន្នី បន្តថា ក្នុងអំឡុងពេលធ្វើការ កញ្ញាក៏ទទួលបានឱកាសផ្លាស់ប្ដូរបទពិសោធន៍ទៅក្រៅប្រទេស រួមមាន ឥណ្ឌូនេស៊ី ម៉ាឡេស៊ី រួមទាំងប៉ែកអ៊ឺរ៉ុប និងប៉ែកអាហ្វ្រិកផងដែរ។
“ពេលដែលខ្ញុំចេញពីសហគមន៍ ខ្ញុំគិតថា អ្វីដែលចង់ផ្ដល់ទៅវិញ គឺព្យាយាមជួយប្រទេសជាតិតាមរយៈចំណេះ ជំនាញ បទពិសោធន៍ដែលខ្លួនមាន ដើម្បីជាផ្នែកមួយចូលរួមជួយដោះស្រាយបញ្ហាប្រទេសជាតិ”
យុវតីមកពីខេត្តរតនគិរី កញ្ញា រចំ មុន្នី ក៏បានលើកទឹកចិត្តយុវជន យុវនារី ដែលនៅតំបន់ដាច់ស្រយាល ដែលចង់រៀនសូត្រត្រូវជឿជាក់លើខ្លួនឯង ពុះពារជំនះរាល់ឧសគ្គ ស្វែងរកជំនួយតាមដែលយើងអាចធ្វើបាន។ សូមកុំអៀនខ្មាស់ក្នុងការទទួលយកឱកាសក្នុងការរៀនសូត្រ ព្រោះ មានតែការអប់រំទេ ដែលអាចធ្វើឱ្យយើងចាកចេញពីភាពក្រីក្រ អាចធ្វើឱ្យសហគមន៍មានភាពរីកចម្រើន និងអាចក្លាយជាធនធានគំរូសម្រាប់យុវជនជំនាន់ក្រោយ។
គួរជំរាបជូនថា សមាគមយុវជនជនជាតិដើមភាគតិចកម្ពុជា (CIYA) ផ្តល់កន្លែងស្នាក់នៅ និងឱកាសទទួលបានការអប់រំកំរិតឧត្តមសិក្សានៅរាជធានីភ្នំពេញ ដល់យុវជនជនជាតិដើមភាគតិចដោយឥតគិតថ្លៃ ដើម្បីលើកកម្ពស់ និងផ្តល់ឱកាសដល់យុវជនជនជាតិដើមភាគតិចនៅកម្ពុជាឱ្យទទួលបានការអប់រំខ្ពង់ខ្ពស់ បណ្តុះបណ្តាល និងកសាងសមត្ថភាព ដើម្បីចូលរួមអភិវឌ្ឍសង្គមជាតិ៕
