ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ឧកញ៉ា ប៉ិច បូឡែន អគ្គនាយកបណ្ដាញគ្រឹះស្ថានអប់រំ និងបណ្តុះបណ្ដាល វ៉េស្ទឡាញន៍ អេឌ្យូខេសិន គ្រុប មានប្រសាសន៍ថា ការបង្កើតក្លឹបអតីតសិស្ស ត្រូវបានធ្វើឡើងក្នុងគោលបំណងជួយកសាងបណ្ដាញទំនាក់ទំនងរវាងអតីតសិស្សជាមួយលោកគ្រូ អ្នកគ្រូ សិស្សានុសិស្សគ្រប់ជំនាន់ ម្ចាស់អាជីវកម្ម និងឱកាសអភិវឌ្ឍសមត្ថភាពបន្ថែមដល់អតីតសិស្ស។
ឧកញ៉ា ប៉ិច បូឡែន មានប្រសាសន៍បញ្ជាក់ថា មានសិស្សានុសិស្សដែលធ្លាប់បានរៀននៅសាលាវ៉េស្ទឡាញន៍ អេឌ្យូខេសិន គ្រុប និងដៃគូទាំងអស់ រាប់ចាប់តាំងពីឆ្នាំ២០០៩មក ដោយអាចមានសិស្សមួយចំនួនក្លាយជាម្ចាស់អាជីវកម្ម សិស្សខ្លះទៀតកំពុងធ្វើការ ហើយក៏មានសិស្សខ្លះកំពុងស្វែងរកការងារធ្វើ ដែលនេះជាឱកាសដើម្បីភ្ជាប់ទំនាក់ទំនងគ្នាទៅវិញទៅមកដើម្បីជួយគ្នាក្នុងការផ្ដល់យោបល់ និងជួយផ្ដល់ឱកាសការងារជាដើម។
ឧកញ៉ា ប៉ិច បូឡែន
“សិស្សដែលកំពុងស្វែងរកការងារធ្វើ អាចទៅធ្វើការនៅក្រុមហ៊ុនសិស្សច្បងរបស់ខ្លួន ហើយអតិតសិស្សដែលមានអាជីវកម្មស្រាប់ សិស្សានុសិស្សទាំងអស់របស់យើងក៏អាចជួយគាំទ្រអាជីវកម្មរបស់សិស្សច្បងផងដែរ”
បើតាមលោកឧកញ៉ា ប៉ិច បូឡែន នៅពេលដែលសិស្សរៀនចប់ចេញពីវិទ្យាល័យទៅ សាលាតែងតែផ្ដល់ការគាំទ្របន្ថែម ដូចជា ទី១. ការប្រឹក្សាយោបល់នៅពេលទៅបន្តការសិក្សានៅមហាវិទ្យាល័យ ទី២. ផ្ដល់វគ្គបណ្ដុះបណ្ដាលដល់សិស្សានុសិស្សតាមរយៈវិទ្យាស្ថានអភិវឌ្ឍវិស័យអប់រំ (EDI) ទី៣. ផ្ដល់វគ្គបណ្ដុះបណ្ដាលជំនាញអាជីវកម្ម និងទី៤. ផ្ដល់ការប្រឹក្សាក្នុងការកសាងគ្រួសារ។
លោក កន សុវណ្ណតារា ប្រធានជាន់ខ្ពស់ផ្នែកទំនាក់ទំនង និងភាពជាដៃគូ ក៏បានឱ្យដឹងដែរថា ពេលដែលសិស្សានុសិស្សកំពុងរៀននៅសាលារបស់វ៉េស្ទឡាញន៍ អេឌ្យូខេសិន គ្រុប ពួកគេពិតជាបានទទួលអត្ថប្រយោជន៍ផ្សេងៗជាច្រើន ប៉ុន្តែនៅពេលសិស្សរៀនចប់ សាលាមិនចង់ផ្ដាច់ទំនាក់ទំនងគ្នានោះឡើយ ទើបសាលាបង្កើតឱ្យមានក្លឹបអតីតសិស្សឡើង។ លោក សុវណ្ណតារា បន្តថា ក្លឹបអតីតសិស្សនេះ ផ្ដល់ឱកាសដល់សិស្សានុសិស្ស រួមមាន ទី១. កសាងបណ្តាញទំនាក់ទំនង រួមមាន រក្សាទំនាក់ទំនងជាមួយលោកគ្រូ អ្នកគ្រូ មិត្តិភក្ដិ បណ្ដាញដៃគូ អាជីវកម្ម ទី២. ផ្ដល់វគ្គបណ្តុះបណ្តាលកសាងសមត្ថភាពឥតគិតថ្លៃ ទី៣. ផ្ដល់ឱកាសចូលរួមសកម្មភាពភាពសង្គម (សប្បុរសធម៌) ជាពិសេស ផ្ដល់ឱកាសការងារ និងភាគលាភ ករណីសិស្សានុសិស្សចូលរួមធ្វើជាបណ្ដាញការងាររបស់វេសឡាញ អេឌ្យូខេសិន គ្រុប។
គួរជម្រាបជូនថា កាលពីចុងសប្តាហ៍កន្លងទៅនេះ បណ្តាញគ្រឹះស្ថានអប់រំ វ៉េស្ទឡាញន៍ បានរៀបចំកម្មវិធីជួបជុំអតីតសិស្ស ដោយមានបុគ្គលិក និងគ្រូបង្រៀនចូលរួមជាង ១០០នាក់ និងសិស្សចំនួន ៤០០នាក់ ៕
